Wn/cdo/美國查數千已獲庇護案 野価中國儂可能乞遣返

From Wikimedia Incubator
< Wn‎ | cdoWn > cdo > 美國查數千已獲庇護案 野価中國儂可能乞遣返
Jump to navigation Jump to search

【2018年10月5號訊】

紐約曼哈頓下城,墿墘紅綠燈其資料相片。
紐約曼哈頓下城,墿墘其紅綠燈(資料圖)。2012年紐約其聯邦檢察官掃蕩了曼哈頓唐人街共皇后區法拉盛其律師樓

根據美國全國公共電臺報導,美國移民當局敆𡅏審查幾千件庇護案件,雖然講茲些庇護案件都已經得遘批准。報導講,超過13500隻幾年前已經得遘美國政府授予庇護其移民有可能乞遣返,其中大部分是中國儂。

報導講,茲蜀回審查共2012年紐約聯邦檢察官掃蕩曼哈頓唐人街共皇后區法拉盛律師樓有關係,共總有30隻移民律師、助理、口譯員涉案,伊儂對手移民野講、做假文件,好讓移民得遘庇護。FBI其突襲行動故此號𡅏「故事編造者行動」(Operation Fiction Writer)。茲蜀回行動臺中乞定罪其儂,共總幫助3500幾儂得遘庇護,裏勢大部分是中國人。當局指伊儂其手段包括編造情節類似其迫害故事、指導當事人敆法庭懸頂背誦虛構故事細節、製作支持假庇護申請其文件,等等。迫害故事大多是違反獨生子女政策、參加法輪功、參加民運。

2012年宣布起訴其時候,奧巴馬政府其官員——包括遐辰候擔任南區紐約聯邦檢察官其巴拉拉,決定伓對庇護案當事人刑事起訴。但是,移民局發言人敆蜀張書面聲明裏勢表示:「美國移民局、移民共海關執法辦公室首席法律顧問、移民審查執行辦公室敆審查茲些案件,去維持我國庇護製度其合法性,並且確保原來其庇護批准是合法獲得其。」

有移民律師共美國全國公共電臺講,敆移民共海關執法歷史懸頂,固未看見過什乇對舊庇護案其審查規模會做茲蠻大。根據移民局其最新數據,幾年以來中國儂乞庇護其比率第一懸,2016年20455件獲准庇護案臺中,中國申請庇護其儂乞批准其比率佔22%。第二、第三其薩爾瓦多共危地馬拉分別是10%共9%。中國儂申請庇護成功比率野懸其來由是,申請人遞交其迫害故事幾乎完全符合庇護官員共移民法官批准其標準。敆美國,申請庇護其儂必須顯示申請人會驚受遘迫害。必須是因爲種族、宗教,或政治言論,或參與某隻社會團體,會驚受治。對中美洲國家申請者來講,無管是針對伊儂其威脅,固是政府無採取行動制止迫害,都伓好證明。但中國申請者無總款其問題,野価件庇護故事裏勢,都是講自家會驚政府。

2016年12月,共當局合作,提供證詞其李女士,敆得遘庇護5年後固等𡅏綠卡其時候,接遘移民局其批,通知伊庇護身份已乞終止。FBI敆共伊其合作協議懸頂講過,如果需要,會敆移民執法當局夫塊乞伊講好話。但是當局取消伊庇護身份使其理由正正好就是伊作證時指證律師幫伊編故事的其證詞。李女士接受公共電臺採訪其時候講:「無綻,我騙過政府。但是遘尾政府復騙了我。」

消息來源[edit]