Wn/cdo/拗九粥香氤氲榕城 遊子千里思鄉情切
【2018年3月16號訊】
今旦（16號）正月廿九，是福州傳統節日拗九節。茲蜀日，野価福州儂都會食復甜復熱倛拗九粥。
維基記者採訪了兩隻現在讀大學倛福州儂，蜀隻固著本地，蜀隻著外兜。著本地倛今旦暝晡無轉厝，宿舍也無辦法煮，就帶朋友去學校附近倛館店，食去粥，心定定。伊朋友是泉州儂，來遘福州乍會仈有茲萆節日，見覺野有味。頭蜀回食拗九粥，伊講：「野有好。」
著外兜讀書倛表示，遘了別塊，看見了𣍐蜀樣倛世界，也更加珍視自家家鄉倛特色文化。前幾日伊就意識遘「此刻就是拗九」，但是別塊儂基本𣍐仈固有茲蜀萆節日，伊來自三明倛福建同鄉都𣍐會意拗九是什乇，真是出了十邑無儂過。
伊也探究了茲萆節日倛歷史。福州儂一般講拗九節來自目連送粥救母倛傳說，嚽是佛教故事。但是伊看了《大藏經》，發現㑚有目連救母，無送粥。㑚是講遘了福州，佛教傳說共食粥習俗結合，就有了富有本地特色倛講法。嚽反映了古代福州儂對孝文化倛價值追求。
遘暝晡9點左右，伊去食雜店，買了蜀罐八寶粥，寄託伊倛鄉愁。伊想西湖邊倛古柳，金雞山倛福道；想南後街倛人海，鼓嶺頂倛𩄻霧；想愛變就變倛天氣，看熱罔熱倛氣溫：伊只蠻想厝。
