Wb/skr/پڳ دی لڄ

From Wikimedia Incubator
< Wb‎ | skrWb > skr > پڳ دی لڄ

اج اوکوں پورا مہینہ تھی گیا ہا آپڑیں سہیلی نازی دے گھر آندیں ہوئیں نازی ہنس مُکھ طبیعت دی وجہ نال بہوں جلدی دل ءچ گھر کر گھندی ہئ ایں وجہ توں شازی وی بہوں تھوڑے وقت ءچ اوندے نال رل مل گئ شازی دے گھر آلے کجھ مہنیں پہلے ایں محلے ءچ آئے ہن شازی دا پیؤ ہک سرکاری محکمے ءچ ملازم ہا سال پسالی گھر وٹاونڑاں پُوندا ہا ۔ نازی شازی دے صرف ناں وی ننھن رلدے مزاج وی ہکو جھئیں ہن ۔ شاہنواز شانی ۔نازی دا بھرا جتناں سوھنڑاں ہا اُتناں سیرت دا بدشکل ہا کئ دفعہ بابے سئیں لوکیں دے اگو ہتھ جوڑ کے اوندے کرتوتیں دی معافی منگی ۔وت وی شانی دی صحت تے کوئ اثر نہ تھیاء ۔ہر ہفتے بعد ہک نواں محبوب گولنڑ اوندا من پسند شُغل ہا نازی وی سمجھا سمجھا کے تنگ تھی گئ ۔نازی کوں ایں گال دا ڈر ہوندا ہا ۔غلطی بھرا دی ہوندی ہئ ۔زندگی نازی دی تنگ کر ڈتی ویندی ہئ ۔اوندے ہر قدم تے پہرے لئے ویندے ہن ۔اوندے ابے جلال دا آکھنڑ ہا پُتر تاں چلو غلطی کریندے رہ ویندن پَر دھی دی غلطی ناقابل ء برداشت ہے ایں وجہ توں نازی بھرا دیاں منتاں ترلے کریندی ہئ کہ کتھائیں اوندے گناہیں دا کفارہ اوکوں نہ ادا کرنڑا پووے۔

نازی کئ ڈینھ توں ڈیھدی پئ ہئ بھرا دا رویہ اگیں نالوں اوندے نال زیادہ محبت آلا لاڈ آلا تھی گئے ۔نازی سمجھے شاید شانی کوں کجھ عقل آ گئے تہوں بھینڑ دا ہر ویلھے خیال کریندے ۔شانی ہک ڈینھ بھینڑ کوں آکھیا اگر میں تیکوں کوئ کم ڈساں توں کریسیں ۔نازی کھل کے ولدا ڈتا حکم کر میڈا ویر جان ڈے ڈیواں ۔شانی آکھیا میکوں تیڈی سہیلی شازی نال عشق تھی گئے جیویں کر میڈی شادی شازی نال کرا ۔ڈیکھ تئیں وعدہ کیتے ہُنڑ مُکریں نہ ۔ نازی پہلے تاں مزاق سمجھ کے گال کوں ٹال گئ مگر بھرا دے بار بار آکھنڑ تے راضی تھی گئ ۔کہ میں آپڑیں سہیلی کنیں پچھ کے ول اماں نال گال کریساں ۔ کجھ ڈینھ دی توں تکرار دے بعد آخر نازی گھر آلیں کوں، راضی کر گھدا ۔تے اُو وقت آ گیا جیرھے وقت دی خواہش ہر بھینڑ کریندی ہے ۔کڈاں بھرا دا پَلو بدھیساں کڈاں سہرے گاساں سہیلیں نال رل جُھمراں پئیساں بھرا دی سیج سجیساں۔سارے خواب پورے تھئے ودھو ودھ خوشیاں ہن بھرا دی شادی دی خوشی سہیلی کوں بھجائ بڑاونڑ دی خوشی ۔وقت خیر دا گزردا گیا ۔نازی دے گھر آلے نازی دے ہتھ پیلے کرنڑ دا سوچنڑ پئے گئے ۔نازی دی زندگی ءچ ہک طوفان آ پیاء جیکوں نازی پسند کریندی ہئ اُو ڈوجھی ذات دا ہا نازی کوں پتہ ہا اگر گھر آلیں کوں پتہ لگ گیا تاں ہک زلزلہ آسی جیرھا اوندے کمزور بُت کوں ہی نہ روح کوں وی تہس نہس کر ڈیسی ۔ کجھ ڈینھ دی سوچ وچار دے بعد نازی کوں خیال آیا کیوں نہ بھرا کوں آکھ کے اے ضد منوائ ونجے آخر میں وی تاں اوندا ساتھ ڈے کے شادی کرائ ہے ۔ایھا سوچ دل ءچ رکھ کے نازی بھرا کوں آپڑیں کمرے ءچ سڈ آئ ۔بھرا سارا حال سُنڑ کے باہرو نکل آیا ۔تھوڑی دیر بعد واپس ولیا تاں اوندے ہتھ ءچ رسی ہئ ۔بھینڑ دا بوچھنڑ سر تُوں چھک کے اوندے مونھ ءچ ڈیونڑ لگیا تاں بھینڑ آکھیا ادا اے تکلیف توں نہ کر میں ساہ نہ کڈھساں نہ چیکساں شانی بھینڑ دے ہتھ بدھ کے رسی اوندی گچی ءچ پاتی ۔جڈاں شتیر نال ٹگنڑ لگا نازی کھل پئ آکھیس ادا میں وعدہ پورا کیتے تیکوں آکھیا ہم حکم کر جان ڈے ڈیواں اج وعدہ پورا تھیاء ابے کوں آکھیں ابا پگ دی لج صرف دھی رکھیندی ہے شانی بھرا بدعا ہئ میڈی ۔ شالا خدا دھی نہ ڈیوی [1]

حوالے[edit | edit source]

  1. جمیل بلوچ دا لکھا ہویا سرائیکی افسانہ، فیسبک دے سرائیکی ساݙی سنڄاݨ پیج تے بتاریخ 9 جولائی 2019ء