Wb/nia/Talaho Sibatua
So samösa nono alawe si baga-baga. Töinia Vasilisa. Ba hiza no ni'elifi ia tobali talaho.
Samuza ma'ökhö, Tsar ifarou nononia matua si datölu mangalui fo'omora me no sa'ae biha boto ira. No tola mangowalu. Oroisa namara, dozi ndraononia lafana'ö nono wana. Gofu haniha zi falukha ira ba nahia atoru nono wana nifanö'öra ba da'ö ndongania.
Ononia siakhi sotöi Ivan Tsarevich mangowalu ia ba dalaho. Da'ö zifalukha ia ba nahia atoru nono wana nifana'önia. Me hada'ö gaurifa zifalukha ia nahia nono wanania, talaho. Ba hiza, talaho andrö no göna ia zihi. Tola iheta ia moroi ba guli dalaho. Ba i'enamai'ö tobali ia ono alawe sibaga-baga, safusi ösi, ba sanau bu. Ba tenga hada'ö. Talaho Vasilisa göi no samösa satua-tua, sonekhe, ba si sökhi amuata.
Ba mböröta me mangowalu Ivan khö Nono Wuti Dalaho, ba asese oroma khö nama matuania, Tsar, wa tenga talaho si to'ölö numönönia andrö.
Samuza luo, i'andrö ndra umönönia wangehaogö kue. Ba ahöli-höli dödö Tsar, hana watola kue nihaogö Vasilisa andrö wondrege zami ba gotalua numönönia.
Simanö göi me i'andrö ndra umönönia fahindri ba wososo nukha. Ba hiza nukha salösö ba la'a-la'a si sökhi no nihaogö numönönia siakhi andrö.
"Hewisa wa tola ifalua da'ö fefu talaho andre. No sibatua sibai numönögu andre," imanö ba dödönia Tsar.
Ero bongi, asese i'ila Tsar wa Vasilisa andre iheta ia moroi ba lele dalaho. Tobali ia ono alawe si baga-baga.
Me so gowasa ba mbanuara ba möi fefu ndraono Tsar awö wo'omora zamösana. Ivan Tsarevich möi ia ba i'ohe göi dalaho omasiönia. Itaya faoma tangania, ba asese ibe'e bakha ba nono mbarunia.
Ba lö'ara me no labörögö gowasa andrö, ba a'oi tokea niha sato fefu me la'ila so ndra'alawe wondrege zi baga-baga sodadao ba zinga Ivan Tsarevich. Talaho Vasilisa andrö ba tobali drunduma hörö niha fefu. Töra-töra ndraono matua.
Sambua inötö, ihalö lele dalaho andrö Ivan ba me omasi sibai ena'ö böi sa'ae tobali talaho ndrongania ba tema i itunu lele dalaho andrö.
Nifalua Ivan andre ba no sitebai. "Na ma'ifutö mena'ö öbase'ö ba ofeta inötönia awai sa'ae duo wangelifi si göna ndra'odo. Ba hiza, me lö khöu fombase'ö, ba nilaumö andrö, ba ulau mofanö ba zaröu."
Mofanö Vasilisa. Tebai itaha nidanö hörönia Ivan. Itandraigö itaha wofanö Vasilisa, ba lö fangandraili furi sa'ae.
Maniasa Ivan ba i'etu'ö ilau mofanö ba wangalui Vasilisa. Ba wofanö-fanönia falukha ia makhluk gaib soboto sihulö mbela, bekhu si tehöngö ba Rusia. Töinia Baba Yaga. Me isofu Ivan hezo wo'omonia, ba i'ombakha'ö khönia Baba Yaga.
"Fatua lö öfalukhaisi wo'omomö ba kalaisi ua nudumö. Samösa nudu si lö tola lö'ö öbunu ya'ia Koschei.
Afu tola ofeta ba nahia Koschei, itörö ndraso, itueli Mbawa danö, isösö hili salaŵa ba atua.
Koschei Si Lö amozua tehöngö, niha samu'i. Afu tola mangawuli Vasilisa tobali niha, Koschei mate. Naha Koschei no tobini. So ia ba mbalö walölöŵa si so bakha ba gadulo bebe. Adulo da'ö so bakha ba dalu bebe. Bebe andrö so bakha ba dalu kalici, kalici so'ia bakha ba weti kara. Feti kara andrö so bakha ba döla geu nifotöi Ek. Eu andre ba fondrege zalaŵa ba gotalua geu tanöbö'ö.
Tola atö angeragö hewisa wa'abua wangalui Koschei. Ba hiza, me Ivan Tsarevich andre no onomatua sibarani ba sökhi göi warangenia mendrua khö ndra aurifö sifalukha khönia. Andrö dania fefu gaurifa sifalukha andrö edöna latolo ia.
Me no lö aföli Ivan Tsarevic ba wangalui Vasilisa, fefu niwa'ö Baba Yaga ifalua. Me fefu gutu ndru'u ba saliŵa-liŵa ba gatua a'oi latolo Ivan, ba gafuriata Isöndra Koschei, fa'udu ira. Ivan möna.
Ba gamozuania, falukha ira hunö dödönia, Vasilisa. I'otarai da'ö tobali sa'ae niha Vasilisa.