Wb/nia/Tafi, Ono Mbalugu

Ba zi samuza inötö so samösa mbalugu töinia Sare. Samösa göi nononia sotöi Tafi. Tenga simane ono mbalugu tanöbö’ö ia, sasese möi ba nahia sirami, sanörö-nörö. Hadia i zomasi ia, ya’ia itöröi nahia si tesafi moroi ba zirami; möi ia falukha ba niha mbanua, falukha ia ba niha sohalöŵö ba danö, ba niha sinumana, i’ohe mbua dangania, ibe’e zadako khöra.

Me i’ila simanö warange ga Tafi, ba mofönu sebua mbalugu Sare. Me no falawu sibai wofönunia, i’oni zaradadu ena’ö lara’u nononia, ba lahie mbagi. Lahuku mate!

Lö ara ba la’ohe ga Tafi ira saradadu ba nahia wo taoŵi bagi. Fatua lö lahie mbaginia, ba i’andrö ka Tafi khö namania ena’ö lawuwu ginötö 3 za moroi ba ginötö nihonogöi. Me irongo ka Sare gangandröŵa safuria moroi khö nonia, ba ifahökö ia, itehegö la wuwu ginötö.

Ba ginötö nibe’e khönia, ba möi ia i’ondrasi zihambu firö ka Tafi. I’andrö ena’ö lahaogö khönia tölu ngawua weti: sambua weti ana’a, sambua weti firö, ba si sambua muhaogö moroi ba döla geu nihaogö sihulö luha. Feti moroi ba geu andrö ia’andrö ena’ö la fo’onokusi. Ihalö halöŵönia Sihambu firö simane ni’oroisi ga Tafi. Me no awai ba i’osa’ö, i’ohe ba nahia wotaoŵi bagi ga Tafi.

Me no ahatö ginötö ba wanaoŵi bagi ga Tafi, ba oi tohare niha sato. So göi ndra salaŵa ba zi sagörö tanö amatöröŵa mbalugu Sare. Ibokai weti si no ifaohagö’ö ka Tafi, ifa’ele’ö hadia nösi weti andrö. Me ibokai weti nihaogö moroi ba gana’a, ba ösinia, ana’a nisösö wama’anö. Oya sibai! Afökhö hörö zato me so haga luo sitakile sangandrauli moroi ba gana’a.

Ibokai weti firö ba ösinia firö nisösö. Ba feti nihaogö moroi ba geu, ösinia tambu fabaya sasao. Me no iforoma’ö ba ifuli iduhö weti andrö ma’afefu.

Me i’ila da’ö ka Sare, ba aukhu ia ba isofu hadia geluaha nilau ga Tafi. “Hadia geluaha fefu da’a, hana wa’öfa’aso weti andrö?” “Amagu balugu, u’andrö khömö awö khö ndra salaŵa mbanua si so ba da’a, ena’ö mibe’e harago ero sambua weti andre.” Imanö ka Tafi khö namania.

Fefu ndra salaŵa hasambua lira wa harago weti ana’a zabölö alaŵa moroi ba danö bö’ö. Feti eu lö hadöi harago me ösinia ha tambu ba sasao.

Ba imane ka Tafi, “Ia da’e mifuli mibokai weti andrö ba mifaigi hadia nösinia.”

Me labokai weti ana’a, ösinia ulö, talaho, ba fefu ngawalö zi ta’unö. Labokai weti firö, ösinia fagölö. Bahiza, labokai weti moroi ba geu, ösinia i’anemai’ö tumbu ngawalö geu satabö; oya geu sowua si tola mu’a. Ba gotalua geu soya andrö ba mosindro sambua gosali ba no ifasui ia sambua kabu mbunga simozökhi sibai.

Ba i’ila hadia geluaha nifalua ga Tafi, ba alö wofönu ga Sare. Ifuli ifaretakö ndra saradadu wa lö alua lahuku ga Tafi.

Nifa'anö: Apolonius Lase

Nitöngöni

Omuso dödögu na öfazaewe nidunö-dunö andre ba media sosial ma Internet. Hiza i be'e fao gumbu heza tehalö ia. Be ba gahe zura: Moroi ba Wikibuku Nias. Nifa'anö Apolonius Lase. Aila ita ba niha na lö öbe'e gumbunia, me öhalö töiu zi tenga töiu.

Fabaliŵa lala

Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö