Wb/nia/Sura Ni'amoni'ö/Sura Moze si föföna/Faza 50

FAZA 50

I. Fogo'o Yakobo ba danö Gana'ana. II. Fa'ebolo dödö Yosefo khö ndra ga'ania. III. Fa'atuania ba fa'amatenia.

1 I. Ba ifalögu ia ba doto namania Yosefo, i'e'esi ia ba fa'ago bawa ia khönia. (F. 46, 4). 2 Aefa da'ö, ba ibe'e li Yosefo ba zolau daludalu, ngoningoninia, ena'ö lalau daludalu ba mboto namania. Ba lalau ba mboto Gizeraeli same'eme'e daludalu andrö. 3 Öfa wulu wongi wa'ara da'ö, da'ö sa wa'ara wolaulau daludalu andrö. Ba 70 wongi la'e'esi ia Dawa Miserayi. 4 Ba me no ahöwö mbongi wange'esi andrö, ba i'andrö ba ngoningoni Wara'o Yosefo, imane: Na sosó atö dödömi ndra'o ma'ifu, ba mitolo wanguma'ö khö Wara'o, wamarongogö khönia. 5 No ibe'e ba hölu ndra'o amagu ba no imane: "Lö ara tö mate ndra'odo, ba lewatö andrö, nikhaogu ba danö Gana'ana öko'o ndra'o." Ba möido ena'ö mogo'o amagu, ba aefa da'ö, ba ufulido. (F. 47, 29). 6 Ba ifafuli'ö li khönia Fara'o, imane: Ae'e, ba ko'o namau, dali wahölusa andrö, me ibe'e'ö ba hölu. 7 Ba möi sa'ae Yosefo, ba wogo'o amania, ba ahori möi ngoningoni Wara'o, awö gumandru sebua khönia, awö zatua ba danö Miserayi, fefu. 8 Ba soroiyomo Yosefo, fefu, ba talifusönia ba soroiyomo namania, fefu; ha iraono sawuyu khöra, ba biribirira ba saŵira laröi furi, ba danö Gozena. 9 Ba fao göi khönia gureta ba si fakudo; tobali ato sibai ira. 10 Ba me no larugi Goreni-Atada andrö, yefo Yoridano, ba lalau mange'esi ba da'ö, fange'esi sabölöbölö sibai; fitu bongi wa'ara ifange'esi'ö namania Yosefo. 11 Ba me la'ila wange'esi andrö ba Goreni-Atada niha ba danö, Dawa Gana'ana, ba lamane: Fange'esi Ndrawa Miserayi da'ö, sabölöbölö. Andrö wa labe'e töi naha andrö "wange'esi Ndrawa Miserayi", yefo Yoridano. 12 Ba lalau iraono Yakobo ni'oroi'önia khöra. 13 Fa la'ohe ba danö Gana'ana ia iraononia ba lako'o ia ba dögi narö hili andrö ba mbenua Makhefela andrö, benua ni'öli Gaberahamo ba Ndraono Kheti andrö, Eferoni, lewatö ondröita, ba gamaudu Mamere. (F. 28, 17).

14 II. Ba mangawuli ba danö Miserayi Yosefo, me no iko'o namania, ya'ia ba talifusönia ba awöra fao, fefu, me möi mogo'o amania. 15 Ba lamane ira ga'a Yosefo — börö me no mate namara —: Ma dania i'afökhöi tödö ita Yosefo, ma isulöni khöda zi lö sökhi andrö fefu, nilauda khönia. 16 Ba lafatenge zinenge khö Yosefo, lamane khönia: No iŵa'ö li amada, me lö si mate ia na, no imane: 17 Mimane khö Yosefo: Be'e aefa khö ndra ga'au horöra, olalöŵara andrö, me no lalau khöu zi lö sökhi! Ba be'e aefa sa'ae khöma horöma andrö, khöma andre, samosumange [göi] Lowalangi namau! Ba mo'ala'ala hörö Yosefo, me lamanö khönia. 18 Ba möi khönia ndra ga'ania, latuhi danö fönania ba lamane: Ya'e ndra'aga, halöga sawuyumö! 19 Ba imane khöra Yosefo: Böi mibusi dödömi! hadia sa, no salahi Lowalangi ndra'odo? (F. 45, 5). 20 Si lö sökhi sa nifakhaimi khögu, ba no i'ohe ba zi sökhi Lowalangi, ba wamalua ni'ilada ma'ökho — fangorifi niha si no ato! 21 Andrö böi mibusi dödömi; urorogö ami ba iraonomi. Irara dödöra, ihaogö wehede khöra.

22 III. Ba si lö tebulö ba danö Miserayi Yosefo, awö zi sawōē ya'ira, ba 110 fakhe wa'anau noso Yosefo. 23 Ba fakhamö i'ila ma'uwu Geferayi Yosefo; ba mo'ono göi na ba götö Yosefo Makhiri andrö, ono Manase. 24 Ba imane Yosefo khö ndra talifusönia: Na no ara lö ya'odo sa'ae, ba itolo ami Lowalangi ba iheta ami ba danö andre, i'ohe ami ba danö andrö, nifabu'unia khö Gaberahamo ba khö Giza'aki ba khö Yakobo, fahölusa. (Heb. 11, 22). 25 Ba ibe'e ba hölu Ndraono Gizeraeli Yosefo, imane: Na itolo dania ami Lowalangi, ba mi'ohe mbotogu, miheta ba da'e! (Moz. II. 13, 19. yos. 24, 32). 26 Ba mate Yosefo, 110 fakhe wa'arania ba guli danö. Ba lalau daludalu ba mbotonia ba labe'e ba hasi, [ba da'ö] ba danö Miserayi.

Famotokhi ba gahe[edit source]

Fabaliŵa lala[edit source]

Olayama Moze I: 1 • 2 • 3 • 4 • 5 • 6 • 7 • 8 • 9 • 10 • 11 • 12 • 13 • 14 • 15 • 16 • 17 • 18 • 19 • 20 • 21 • 22 • 23 • 24 • 25 • 26 • 27 • 28 • 29 • 30 • 31 • 32 • 33 • 34 • 35 • 36 • 37 • 38 • 39 • 40 • 41 • 42 • 43 • 44 • 45 • 46 • 47 • 48 • 49 • 50