Wb/nia/Sura Ni'amoni'ö/Sura Moze si föföna/Faza 25

From Wikimedia Incubator
FAZA 25

I. Ifuli mangowalu Gaberahamo. Ononia ba da'ö. II. Fa'amatenia ba fogo'o ya'ia. III. Nga'ötö Zima'eli ba fa'amatenia. IV. Amabu'uala li Lowalangi khö Rebeka. Fa'atumbu ndra Ezau Yakobo. V. Lö ba dödö Gezau fa'asia'ania.

I. Ba ifuli mangai ira alawe Aberahamo, Ketura döi, ba mo'ono da'ö khönia: Simera ba Yokisa ba Medano ba Midiano ba Yisibaki ba Sua. Ba ono Yokisa, ba Seba ba Dedano; ba ma'uwu Dedano Ndrawa Asuri andrö ba Dawa Letusi ba Dawa Loimeni. Ba ono Midiano, ba Efa ba Eferi ba Hanokhi, ba Abida ba Elida'a; oi iraono Getura andrö da'ö. Ba hadia ia zi so khönia, fefu, ba ibe'e khö Giza'aki Aberahamo. Ba ba ndraono ndrongania ba döi, khönia, ba mamuala Gaberahamo ba ifofanö ira, ifabali khö nononia Iza'aki, me auri ia na, ifofanö ba danö tanö ba gatumbukha luo.

II. Ba da'ö wa'anau noso Gaberahamo, si so ia ba guli danö: 175 fakhe. Ba aetu noso Gaberahamo, mate ia ba wa'atua omasiö, no atua ia ba no aföli fa'auri; ba te'orudugö ia ba niwara. Ba lako'o ia ononia Iza'aki ba Sima'eli ba dögi narö hili Makhefela andrö, ba mbenua Ndraono Kheti andrö, Eferono, ono Zohara, ba gamaudu Mamere. Ba mbenua andrö, ni'öli Gaberahamo ba Ndraono Kheti: ba da'ö teko'o Gaberahamo ba fo'omonia Sara. Ba me no mate Gaberahamo, ba ifahowu'ö nononia Iza'aki Lowalangi. Ba ba ngai "mba'a zauri, samaigi ya'odo" soso Giza'aki.

III. Ba da'ö nga'ötö Zima'eli andrö, ono Gaberahamo, ononia ba Ndrawa Miserayi andrö, Hagara, sawuyu yomo khö Zara. Da'e döi nono Zima'eli, wanötöi ya'ira, ngenolira: Si a'a khö Zima'eli, ba Nebayoti, ba Kedara ba Adibe'eli ba Mibisa ba Misima ba Duma ba Masa, ba Hadadi ba Tema ba Yeturi ba Nafisi ba Kedema. Da'ö nono Zima'eli andrö, ba da'ö döira, ba mbanuara andrö, ba naha nosera: felendrua zalaŵa, ba niwara andrö. Ba fa'anau noso Zima'eli andrö, ba 137 fakhe. Ba aetu nosonia, mate ba te'orudugö ba niwara. Ba nahiara, banuara, ba i'otarai Hawila, numalö ba Zuri, tanö ba gatumbukha, na ta'otarai danö Miserayi, irugi misa danö Ndrawa Asiria; tanö ba gatumbukha mowanua ia föna-föna dalifusönia fefu.

Dombua soi ba dalumö; dombua mado zi tumbu khöu dania, ba wasuwöta. Ba abölö dania mado si sambua, ba sawuyu zi akhi dania zi a'a

IV. Ba da'ö khö Giza'aki, ono Gaberahamo: Ono Gaberahamo Giza'aki. Ba öfa wulu fakhe Giza'aki, me ihalö Rebeka andrö, ono Ndrawa Garamo andrö, Betueli, ba Mezofotamia, akhi Ndrawa Garamo andrö, Labano. Ba mangandrö Giza'akı khö Yehowa ba khö wo'omonia andrö, me no si lö ono. Ba ifondrondrongo wangandrönia Yehowa, ba manabina wo'omonia Rebeka [si faero]. Ba fagobi-gobi nononia ba dalunia; ba imane: Na si manö, ba hana wa aurido? Ba möi ia musofu khö Yehowa. Ba imane khönia Yehowa: Dombua soi ba dalumö; dombua mado zi tumbu khöu dania, ba wasuwöta. Ba abölö dania mado si sambua, ba sawuyu zi akhi dania zi a'a. Ba me irugi baŵania ba wo'ono, ba hiza zi faero ba dalunia. Ba böla zi a'a, no oyo-oyo, hulö mbaru luo sobubu, ma'asageu. Andrö wa labe'e töinia Gezau. Ba böla göi nakhinia andrö, ba no igogohe mbörö sisi Gezau tangania; andrö wa labe'e töinia Yakobo. Ba no önö ngafulu fakhe Giza'aki, me tumbu ira.

V. Ba me manöi ndraono andrö, ba tobali sabölö ba wealu Gezau, niha ba ndru'u, ba Yakobo, ba niha sahono-hono, si iagö ose. Ba Iza'aki, ba i'omasi'ö Gezau, ami khönia gahulua andrö; ba Rebeka, ba i'omasi'ö Yakobo. Ba samuza ma'ökhö, ba ituge'ö gönia Yakobo. Ba so Gezau, olofo sibai, i'otarai danö si mate. Ba imane Ezau khö Yakobo: Ta'i-ta'i be'e ögu zoyo andrö, soyo andrö we! solofo sibai sa'ae ndra'o. Andrö wa labe'e töinia Gedomo (Soyo). Ba imane Yakobo: Amawa khögu wa'asia'amö ua! Ba imane Ezau: A! mate sa atö ndra'o dania, ba ha uwai wa'asia'a andrö! Imane Yakobo: Ba ae ba hölu ua khögu! Ba möi ba hölu ia khönia ba tobali i'amawa khö Yakobo wa'asia'ania andrö. Ba ibe'e khö Gezau roti ba samösa mö'ö harita side'ide; ba manga ia, ba ifazaŵa ia, ilau mofanö. Ba tobali i'ositengagö wa'asia'ania Ezau.



Sura Ni'amoni'ö: Mataio | Mareko | Luka | Yohane | Halöŵö Zinenge | Roma | Korindro I | Korindro II | Galatia | Efeso | Filifi | Kolose | Tesalonika I | Tesalonika II | Timoteo I | Timoteo II | Tito | Filemo | Heberaio | Yakobo | Fetero I | Fetero II | Yohane I | Yohane II | Yohane III | Yuda | Fama'ele'ö

Fanolo wanura: Lala wanura | Fama'oli nösi | Ngawalö templat | Ngawalö kategori
Kategori: Amaedola | Budaya | Cerpen | Fangi'ila (Ilmu Pengetahuan) | Hendri-hendri | Hoho | Hikaya | Kamus Nias-Jerman | Kese-Kese | Lala wondrino (Resep) | Maena | Manö-manö | Manö-manö Nono Niha | Uso dödö (Entertainment) | Novela | Sejarah | Seni | Sinanö | Sinunö | Sura Ni'amoni'ö | Taromali Ero Migu | Turia Somuso Dödö

Fanolo wofanö: Olayama | Angombakhata | Bawagöli zato | Monganga afo | Nahia wamakori | Nga'örö spesial | Ngawalö wanolo | Sangai halöŵö | Safuria tebulö | Wikibuku | Wikikamus | Wikipedia | Wikiyunior