Wb/nia/Sura Ni'amoni'ö/Sura Moze si föföna/Faza 21

From Wikimedia Incubator
FAZA 21

I. Fa'atumbu Giza'aki. II. Fanibo Sima'eli. III. Amabu'ula li Lowalangi khö Hagara. IV. Fawu'u li ira Gabimelekhi Gaberahamo.

I. Ba no ifatörö khö Zara Yehowa nifabu'unia; ilau khönia niŵa'önia Yehowa. Ba manabina Zara ba mo'ono khö Gaberahamo, ba wa'atuaniä, ono matua, ba ginötö andrö, niŵa'ö Lowalangi. Ba ibe'e töi nononia Giza'aki Aberahamo, töi nono sawena tumbu andrö khönia khö Zara. Ba iboto nononia Iza'aki Aberahamo, me no fitu bongi, i'o'ö niŵa'ö Lowalangi khönia. Ba no otu fakhe Gaberahamo, me tumbu khönia nononia Iza'aki andrö. Ba imane Sara: Fama'iki nilau Lowalangi khögu; dozi ha niha zamondrongo, ba la'igi-igi'ö ndra'odo. Ba imane na: Ha niha zirai möi ba dödö, khö Gaberahamo andrö, wa samaenu ono na dania Zara! Ba noa sa mo'onodo khönia, ba wa'atuania. Ba manöi nono andrö ba aefa ba mbagi zusu; ba ibe'e gö niha, Aberahamo, ebua ihalö, me luo aefa ba mbagi zusu Giza'aki.

II. Ba me i'ila Sara nono Hagara andrö, Dawa Miserayi, ononia khö Gaberahamo, wa saiki-iki ia, ba imane khö Gaberahamo: Fofanö zawuyu andrö, awö nononia; lö'ö sa tola manema ondröita dania nono zawuyu andrö, awö nonogu Iza'aki. Ba fatuwu sibai da'ö khö Gaberahamo, börö nononia andrö. Ba imane Lowalangi khö Gaberahamo: Böi abua khöu ba nono andrö ba ba zawuyumö andrö; ahori ö'o'ö ni'andrö Zara khöu; ha sa ma'uwu Giza'aki dania, niŵa'ö sindruhu nga'ötöu. Ba he ono zawuyu andrö göi, ba soi sebua dania ube'e, me no onou. Ba mamahemolu ö, ba ihulö wongi Aberahamo, ihalö roti ba sara asoa nidanö, ibe'e khö Hagara, ba ifalu'igö khönia nono, ba ifofanö. Ba mofanö ia ba elungu-lungu ia ba danö si mate ba Mbereseba. Ba me no ahori nidanö ba nasoa, ba itibo'ö tou ba mbörö da'uli nono, ba möi ia dumadao ba zi tambai, mato ikhamö ono wana wa'aröu; imane sa: Tebai unehegö wa'amate nono! Andrö i'aröu'ö ia ma'ifu; ba ibörötaigö me'e nono.

III. Ba me irongo Lowalangi we'e nono, ba mu'ao mala'ika Lowalangi khö Hagara, moroi ba mbanua si yaŵa, imane khönia: Hadia khöu, Hagara? Böi busi dödöu! No irongo Lowalangi we'e nono andrö, ba zi so ia. Ae fazaŵa nono ba ohe dangania, tobali soi sebua sa ia ube'e. Ba ibokai hörönia Lowalangi, ba i'ila gumbu nidanö. Ba möi ia, ifo'ösi nasoa idanö, ba ifabadugö khö nono. Ba itolo nono andrö Lowalangi; manöi ia, ba ba danö si mate soso ia ba tobali sonekhe fafanata. Ba danö si mate Farana i'iagö, ba ifangowalu ia inania, moroi ba danö Miserayi.

IV. Ba me luo da'ö, ba lamane khö Gaberahamo Abimelekhi no ba kumandra andrö khönia, Fikholo: Itolo-tolo'ö Lowalangi ba nilaumö fefu. Andrö ae ba hölu khögu iya'e ba da'e, ba Lowalangi, wa lö'ö manö falimo ndra'ugö khögu ba he ba dana khögu, si mane ya'odo, me no si fahuwu ndra'o khöu, ba no si fahuwu khögu göi ndra'ugö ba ba zi so ba danö andre fefu, ba zi soso ndra'ugö si fatewu. Ba imane Aberahamo: Möido ba hölu. Ba isekhegö Gabimelekhi Aberahamo, ba mba'a nidanö andrö, ni'okhögö zawuyu Gabimelekhi, ni'anösö'ö. Ba imane Abimelekhi: Lö u'ila, ha niha zolau da'ö; lö hadia ia ni'ombakha'öu khögu, ba lö'ö göi nirongogu ya'ia, irege ma'ökhö. Ba ihalö mbiri-biri ba saŵi Aberahamo, ibe'e khö Gabimelekhi, ba fawu'u li ira. Ba i'oniagö zi fitu rozi, ono mbiribiri, Aberahamo. Ba imane Abimelekhi khö Gaberahamo: Heza labe'e nono mbiribiri andrö, si fitu rozi, ni'oniagömö? Imane Aberahamo: Ono mbiribiri andrö, si fitu rozi, ba ya sinemau khögu; ya famaduhu'ö da'ö khögu, wa no ya'o zogao ba'a andrö. Andrö wa labe'e töi naha andrö: Mbereseba, me no ba da'ö faoma fahölu ira khö nawöra. Si manö: wawu'usa li khöra ba Mbereseba. Ba maoso ndra Abimelekhi kumandra andrö khönia, Fikholo, ba lafuli ira ba danö Ndrawa Wilisiti. Ba: itanö mbou Aberahamo, ba Mbereseba andrö ba i'angaröfi li döi Yehowa ba da'ö, töi Lowalangi si lö aetu andrö. Ba ara Gaberahamo: ba danö Ndrawa Wilisiti.



Sura Ni'amoni'ö: Mataio | Mareko | Luka | Yohane | Halöŵö Zinenge | Roma | Korindro I | Korindro II | Galatia | Efeso | Filifi | Kolose | Tesalonika I | Tesalonika II | Timoteo I | Timoteo II | Tito | Filemo | Heberaio | Yakobo | Fetero I | Fetero II | Yohane I | Yohane II | Yohane III | Yuda | Fama'ele'ö

Fanolo wanura: Lala wanura | Fama'oli nösi | Ngawalö templat | Ngawalö kategori
Kategori: Amaedola | Budaya | Cerpen | Fangi'ila (Ilmu Pengetahuan) | Hendri-hendri | Hoho | Hikaya | Kamus Nias-Jerman | Kese-Kese | Lala wondrino (Resep) | Maena | Manö-manö | Manö-manö Nono Niha | Uso dödö (Entertainment) | Novela | Sejarah | Seni | Sinanö | Sinunö | Sura Ni'amoni'ö | Taromali Ero Migu | Turia Somuso Dödö

Fanolo wofanö: Olayama | Angombakhata | Bawagöli zato | Monganga afo | Nahia wamakori | Nga'örö spesial | Ngawalö wanolo | Sangai halöŵö | Safuria tebulö | Wikibuku | Wikikamus | Wikipedia | Wikiyunior