Wb/nia/Sura Ni'amoni'ö/Sura Moze si föföna/Faza 2

From Wikimedia Incubator
Faza 2

I. Fangoroi'ö luo wolombase andrö. II. Fomböi niha. III. Nahia niha. IV. Oroisa. V. Famazökhi ira alawe. Fanguma'ö farongasa andrö.

I. Si manö wangasiwai banua si yaŵa ba tanö, awö nösi fefu. Ba me luo si fitu i'o'ozui womböinia andrö Lowalangi, nifazökhinia andrö; ba molombase ia me luo si fitu, me no awai womböinia andrö fefu, nifazökhinia. Ba ifahowu'ö Lowalangi luo si fitu, ni'amoni'ö iŵa'ö, me no molombase ia ba da'ö, me no awai halöŵönia andrö fefu, niwöwöinia ba nifazökhinia.

II. Da'ö mböröta mbanua si yaŵa, fabaya tanö, me tefazökhi: Me luo ifazökhi Yehowa Lowalangi danö, awö mbanua si yaŵa, ba lö eu-eu na ba mbenua ba lö sinanö na ba mbolo mbenua; lö'ö na nifoteu Yehowa Lowalangi tanö, ba lö niha na, sonowi mena'ö. Ba sau zi möi miyaŵa moroi ba danö, inamoi guli danö ma'asagörö. Ba iwöwöi niha Yehowa Lowalangi, tanö mböröta, nihalö ba mbenua ba iwuwusi ba dögi nikhunia hanu-hanu fangorifi ba tobali sonoso niha andrö. Ba ifazökhi kabu Yehowa Lowalangi, ba Gedena, tanö ba gatumbukha luo, ba ifa'aso ba da'ö niha andrö, nifazökhinia. Ba ifatumbu'ö moroi ba danö ngawalö geu sowua Lowalangi, eu somasi ita famaigi ba sami bua, ba eu fangorifi ba dalu kabu ba eu famotokhi ba dödö si sökhi ba si lö sökhi. Ba sara nidanö si otarai Gedena, ba wamo'idanö kabu andrö; ba si fabali dania ia, tobali öfa rozi; si sara, ba Fizona döi; da'ö zamasui tanö Hewila andrö ma'afefu, ba nisöndra balaki. Ba balaki ba danö andrö, ba no si sökhi. Ba tesöndra göi ba da'ö mbaluri ba feremata una. Ba töi nidanö si sara, ba Gihona, samasui tanö Gusi da'ö. Ba si sara zui, ba Hideke döi, ya'ia föna-föna danö Asiria; ba si sara, ba Oiferati. Ba ihalö niha no mege Yehowa Lowalangi, ifa'aso ba kabu Edena andrö, ba wangehao ba ba wanaro.

IV. Ba ibe'e li ba niha Yehowa Lowalangi, imane: Ö'a sa'ae mbua geu ba kabu fefu, ba bua geu famotokhi ba dödö si sökhi ba si lö sökhi, ba lö tola ö'a; ö'a si'aikö da'ö, ba mate ndra'ugö!

Ö'a sa'ae mbua geu ba kabu fefu, ba bua geu famotokhi ba dödö si sökhi ba si lö sökhi, ba lö tola ö'a

V. Ba imane Yehowa Lowalangi: Lö sökhi ba niha, na ha ya'i-ya'ia; da'ufazökhi khönia nawö, si fabohö khönia. Me noa sa'ae ifazökhi Yehowa Lowalangi moroi ba danö fefu zaliŵa-liŵa ba danö, awö wofo ba dalu mbanua, ba i'ohe ba niha, ena'ö ifaigi, hadia döi ibe'e, ba hadia si'ai nibe'e niha töi zonoso andrö, da'ö döira dania. Ya ifotöi niha fefu gurifö niha, awö wofo ba dalu mbanua, awö gutu ndru'u fefu; ba ba niha, ba lö falukha nawö, si faböbö khönia. Ba ifaförö niha Yehowa Lowalangi, femörö sabölö, ba me no mörö ia, ba ihalö zara döla nosunia ba ifo'ösi nagole nahania. Ba ibali'ö ira alawe Yehowa Lowalangi döla nosu andrö, nihalönia ba niha, ba ifasao ba niha. Ba imane niha: Töla föfö dölagu da'ö ba nagole föfö nagolegu; labe'e töinia ndra alawe, me no ba ndra matua tehalö ia. Andrö i'erogö ndra amania inania niha, ba molemba ia ba ngambatönia, ba tobali ha sambua boto ira. Ba si lö nukha ira, darua ira niha ngambatönia, ba lö'ö sa aila ira.



Sura Ni'amoni'ö: Mataio | Mareko | Luka | Yohane | Halöŵö Zinenge | Roma | Korindro I | Korindro II | Galatia | Efeso | Filifi | Kolose | Tesalonika I | Tesalonika II | Timoteo I | Timoteo II | Tito | Filemo | Heberaio | Yakobo | Fetero I | Fetero II | Yohane I | Yohane II | Yohane III | Yuda | Fama'ele'ö

Fanolo wanura: Lala wanura | Fama'oli nösi | Ngawalö templat | Ngawalö kategori
Kategori: Amaedola | Budaya | Cerpen | Fangi'ila (Ilmu Pengetahuan) | Hendri-hendri | Hoho | Hikaya | Kamus Nias-Jerman | Kese-Kese | Lala wondrino (Resep) | Maena | Manö-manö | Manö-manö Nono Niha | Uso dödö (Entertainment) | Novela | Sejarah | Seni | Sinanö | Sinunö | Sura Ni'amoni'ö | Taromali Ero Migu | Turia Somuso Dödö

Fanolo wofanö: Olayama | Angombakhata | Bawagöli zato | Monganga afo | Nahia wamakori | Nga'örö spesial | Ngawalö wanolo | Sangai halöŵö | Safuria tebulö | Wikibuku | Wikikamus | Wikipedia | Wikiyunior