Wb/nia/Sura Ni'amoni'ö/Sura Moze si föföna/Faza 19

From Wikimedia Incubator
FAZA 19

I. Möi tome Loti mala'ika andrö. Horö mbanua Zodoma. II. Fangorifi Loti. III. Fa'ahöndrö Zodoma, fabaya si fasui. IV. Horö Loti khö nononia alawe.

I. Ba larugi Zodoma mala'ika andrö si darua, me tänö owi. Ba no dumadao Loti barö mbawa göli Zodoma. Ba me i'ila ira, ba maoso ia, ifaondragö ira ba ifaöndrö ia, irege danö tou. Ba imane: He Tua, mi'ae yomo ba nomo zawuyumi, ba wemörö, ba misasai gahemi; ba mahemolu mbanua, ba hana na mofandö ami. Ba lamane: Lö'ö, baewali soga bongi. Ba iforege khöra, irege fao ira khönia, irege möi baomonia. Ba ihalö göra, ba ifazökhi kue, si lö mu'aisöni, ba manga ira. Ba lö si mörö ira na, ba lafasui nomo ira matua mbanuara andrö, banua Zodoma andrö, he ono matua, ba he satua, samba banua manö, lahurufai. Mu'ao ira khö Loti, lamane khönia: Heza so niha andrö, si no möi yomo khöu bongi? Ohe baero ira khöma, ena'ö oruduga khöra. Ba möi tou khöra Loti — ba bawandruhö, ba ikusi furinia.— Ba imane: He ga'a! Böi manao horö ami! Hiza! Dombua khögu nono alawe, si lö irai mangila ira matua; da'ö ube'e baero khömi, ba hana na milau khöra zomasi ami. Ba lö tola milau hadia ia ba niha andrö, me no atö möi ira ba lumö zagö khögu. Ba lamane: Fa'ese'ö! lamane: Ha samö-samösa ia, si möi fatewu ba da'e, ba lö aetu idegu-degu ita. Ba damalau khöu zabölö-bölö, moroi ba nilauma khöra ena'ö! Ba ladegeni ira khö Loti andrö; so ira, ba wamoto bawandruhö. Ba la'oro'ö dangara moroi yomo niha no mege, lasöbi yomo khöra Loti ba lakusi mbawandruhö. Ba lahawui bösi niha andrö, si so tou, he iraono ba he satua, tobali la'alu-alui manö mbawandruhö, ba lö lasöndra.

II. Ba lamane niha no mege khö Loti: Hadia, so khöu na ba da'e, ha niha? Umönöu ba ma onou matua ba ma onou alawe ba ha niha na tana khöu, ba mbanua andre, ba ohe misa! Mafakiko sa mbanua da'e, me no te'adugö sibai ira khö Yehowa; andrö ifatenge ndra'aga Yehowa, ba wamakiko ya'ira. Ba möi tou Loti, humede ia ba numönönia, sangai ononia ena'ö, imane: Milabu, miheta ami ba da'e! Ifakiko sa'ae mbanua da'e Yehowa! Ba labali budenia khöra umönönia andrö. Ba me ibörötaigö moluo, ba lafangaösö Loti mala'ika andrö, lamane: Labu, ohe wo'omou ba onou andrö si dombua, si so ba da'e, fa böi tekiko ndra'ugö göi ba horö mbanua andre! Ba me arörö-rörö ia na, ba latuyu da'ionia niha andrö, fabaya fo'omonia ba ononia andrö si dombua, me no edöna i'orifi ia Yehowa, la'ohe baero ba laröi ia ba da'ö baero mbanua. Ba ba wolohe ya'ira baero, ba lamane : Orifi'ö, nosou mbalazi! Böi bali'ögdö furi ba böi badugö'ö heza, ba ndraso. Ba hili orifi'ö, fa böi fao ndra'ugö ba wa'atekiko! Ba imane khöra Loti: Böi, Tua! Noa sa atö isöndra wa'ebua dödö sawuyumö, wamaigiu, tobali no ebua wa'ahakhö dödöu khögu, ba no ö'orifido; ba tebai moloi ndra'o ba hili; ma dania so zi göna ndra'o, famunugu. Hiza mbanua, si no ahatö, si tola usaŵa ; ba no side-ide, da'ö zomasido usaŵa, — noa sa atö side-ide ia — ena'ö aurido. Ba imane khönia: Hiza, ba da'ö göi u'o'ö khöu, ba lö ufakiko mbanua andrö niŵa'öu. Ta'i-ta'i, saŵa da'ö ; lö'ö sa u'ila ulau hadia ia, balazi no örugi. Andrö wa labe'e töi mbanua andrö Zoara (side-ide). Ba no tumbu luo ba guli danö, me irugi Zoara Loti.

Milabu, miheta ami ba da'e! Ifakiko sa'ae mbanua da'e Yehowa!

III. Ba aekhu dalö balera ba alitö ba Zodoma ba ba Gomora, ibe'e Yehowa, moroi yaŵa ba mbanua, idudugö mbanua andrö, fabaya tanö tou, tefarahu ndraso andrö ma'asagörö, awö niha, banua da'ö, awö zinanö ba danö andrö. Ba ibali'ö ia furi, ba wamaigi, fo'omo Loti, furinia, ba tobali kara mo'asio. Ba mahemolu ö, ba ihulö wongi Aberahamo, we'amöi ba zi so ia mege, khö Yehowa. Ba me ifaigi mitou Zodoma ba Gomora, awö ndraso andrö ma'asagörö, ba i'ila, numalö yaŵa zimbo, moroi ba danö andrö, hulö zimbo zino wa'u. Ba me idudugö Lowalangi mbanua ba ndraso andrö, ba itörö tödö Lowalangi Gaberahamo andrö, ba ifasao misa Loti, iheta ba wa'adudu andrö, me idudugö mbanua andrö, fabaya tanö tou, banua si so Loti mege.

IV. Ba ifuli iheta ia ba Zoara Loti, isaŵa miyaŵa ba i'iagö hili, awö nononia alawe andrö, si dombua; ata'u sa'ae ia, ba Zoara soso ia; ba dögi narö hili nahiania, awö nononia andrö si dombua. Ba imane si a'a khö nakhinia: Satua sa'ae namada, ba lö niha ba guli danö, sorudu khöda ena'ö, si mane huku ba guli danö ma'afefu. Tabu, datafabadugö nagu khö namada, ba orudu mörö ita khönia, ena'ö lö aetu nga'ötöda ibe'e amada. Ba latema lafabadugö nagu khö namara, ba zi bongi andrö; ba möi si bakha zi a'a, orudu mörö ia khö namara. Ba lö i'ila, me ifadölö tou ia, ba lö'ö göi i'ila, me maaso. Ba mahemolu mbanua, ba imane si a'a andrö khö nakhinia: Noa sa orudu mörö ndra'o khö namada; tafuli tafabadugö khönia nagu, bongi dania göi; ba ae si bakha ba förö ba ngainia, ena'ö lö aetu nga'ötöda ibe'e amada. Ba lafuli lafabadugö nagu khö namara, ba zi bongi andrö göi; ba möi mörö ba ngainia zi akhi. Ba lö i'ila, me ifadölö ia ba he me maoso ia. Ba tobali manabina nono Loti andrö, ma'adombua, khö namara. Ba madono zi a'a, ono matua, ba ibe'e töi nononia andrö Moabi; da'ö wurugö Ndraono Moabi andrö ma'ökhö. Ba siakhi göi, ba madono göi, ono matua, ba ibe'e töinia Gamoni; da'ö wurugö Ndraono Gamoni ma'ökhö.



Sura Ni'amoni'ö: Mataio | Mareko | Luka | Yohane | Halöŵö Zinenge | Roma | Korindro I | Korindro II | Galatia | Efeso | Filifi | Kolose | Tesalonika I | Tesalonika II | Timoteo I | Timoteo II | Tito | Filemo | Heberaio | Yakobo | Fetero I | Fetero II | Yohane I | Yohane II | Yohane III | Yuda | Fama'ele'ö

Fanolo wanura: Lala wanura | Fama'oli nösi | Ngawalö templat | Ngawalö kategori
Kategori: Amaedola | Budaya | Cerpen | Fangi'ila (Ilmu Pengetahuan) | Hendri-hendri | Hoho | Hikaya | Kamus Nias-Jerman | Kese-Kese | Lala wondrino (Resep) | Maena | Manö-manö | Manö-manö Nono Niha | Uso dödö (Entertainment) | Novela | Sejarah | Seni | Sinanö | Sinunö | Sura Ni'amoni'ö | Taromali Ero Migu | Turia Somuso Dödö

Fanolo wofanö: Olayama | Angombakhata | Bawagöli zato | Monganga afo | Nahia wamakori | Nga'örö spesial | Ngawalö wanolo | Sangai halöŵö | Safuria tebulö | Wikibuku | Wikikamus | Wikipedia | Wikiyunior