Wb/nia/Sura Ni'amoni'ö/Sura Moze si föföna/Faza 12
I. Awu'a Gaberamo, awö Loti, laheta ira ba mbanuara. II. Lasaŵa danö Miserayi. Itimba khöra zi lö sökhi Lowalangi.
I. Ba imane Yehowa khö Gaberamo: Heta'ö ba danömi ba ba dalifusöu ba ba nomo namau, ba ae ba danö ni'oroma'ögu khöu dania. Ba ubali'ö soi sebua ndra'ugö, ba ufahowu'ö ndra'ugö ba u'ebua'ö döimö ba tobali howu-howu ndra'ugö. Ufahowu'ö zamahowu'ö ya'ugö, ba sangelifi ya'ugö, ba u'elifi göi, ba moroi khöu tefahowu'ö dania fefu soi ba guli danö. Ba awu'a Gaberamo, i'o'ö niŵa'ö Yehowa khönia, ba fao khönia Loti. Ba no 75 fakhe Geberamo, me aheta ia ba Harana. Ba i'ohe wo'omonia Sara'i Aberamo, awö Loti, ono dalifusönia, awö nibaya-bayara fefu, si so khöra, awö niha andrö (sangai halöŵö) nisöndrara ba Harana, ba laheta ira, ba we'amöi ba danö Gana'ana, ba larugi danö Gana'ana. Ba itöröi danö andrö Aberamo, irugi mbanua Zikhema, irugi gatua More; ba me luo da'ö, ba Dawa Gana'ana zi so ba danö. Ba i'oroma'ö ia khö Gaberamo Yehowa, imane khönia: Ba ma'uwumö ube'e danö andre! Ba ifa'anö naha wame'e sumange ba da'ö khö Yehowa, si no mangoroma'ö ya'ia khönia. Ba ifa'ese ia föna, isaŵa hili tanö ba gatumbukha luo, i'otarai Mbetieli, ba da'ö itaru'ö nosenia, tobali tanö ba gaekhula Mbetieli ba tanö ba gatumbukha Ga'i, i'otarai zi so ia. Ba ifa'anö ba da'ö naha wame'e sumange khö Yehowa ba i'angaröfi li Yehowa. Aefa da'ö, ba idou'ö-dou'ö ia Aberamo miraya.
II. Ba itörö lofo danö andrö. Ba möi misi tou ba danö Miserayi Gaberamo, ba we'aso ba da'ö ma'ifu; noa sa abölö-bölö lofo ba danö. Ba me no ahatö ira ba danö Miserayi, ba imane Aberamo khö wo'omonia Sara'i: Hiza, u'ila, wa no ira alawe si sökhi bawa ndra'ugö. Ba na la'ila'ö dania Dawa Miserayi, ba lamane dania: Fo'omonia! ba labunu ndra'o, ba la'orifi ndra'ugö. U'andrö khöu, öŵa'ö dania, akhigu ndra'ugö, ena'ö ohahau dödögu, börö ndra'ugö, fa aurido, börö ndra'ugö. Ba me no irugi danö Miserayi Aberamo, ba la'ila Dawa Miserayi, wa no si sökhi sibai ndra alawe andrö. Ba me no la'ila ia kumandru sebua andrö khö Wara'o ba lasuno ia khö Wara'o, ba te'ohe ba gödo Wara'o ndra alawe andrö. Ba oböwö Wara'o khö Gaberamo, börö ndra alawe, ba isöndra Aberamo mbiribiri ba saŵi ba kalide ba sawuyu ono matua ba sawuyu ono alawe ba kalide si alawe ba ondra. Ba ifatörö wamakao sebua Yehowa khö Wara'o ba ba zoroiyomonia, börö Zara'i, fo'omo Gaberamo. Ba ifakaoni'ö Gaberamo Fara'o, imane: Hana wa ölau khögu da'ö? Hana wa lö öŵa'ö khögu, wa fo'omou? Hana wa öŵa'ö: akhigu, fa tobali uhalö ia fo'omogu? Ba iada'e, ba hiza wo'omou, ohe ia ba fuli'ö! Ba iŵa'ö niha Fara'o, khönia, ena'ö möi ira awöra ba lala, ba fao wo'omonia, awö fefu hadia ia khönia.Heta'ö ba danömi ba ba dalifusöu ba ba nomo namau, ba ae ba danö ni'oroma'ögu khöu dania.
Fanolo ba wanura: Lala wanura | Fama'oli nösi | Ngawalö templat | Ngawalö kategori
Kategori: Amaedola | Budaya | Cerpen | Fangi'ila (Ilmu Pengetahuan) | Hendri-hendri | Hoho | Hikaya | Kamus Nias-Jerman | Kese-Kese | Lala wondrino (Resep) | Maena | Manö-manö | Manö-manö Nono Niha | Uso dödö (Entertainment) | Novela | Sejarah | Seni | Sinanö | Sinunö | Sura Ni'amoni'ö | Taromali Ero Migu | Turia Somuso Dödö
Fabaliŵa lala: Olayama | Angombakhata | Bawagöli zato | Irö'öta | Monganga afo | Nahia wamakori | Nga'örö spesial | Ngawalö wanolo | Sangai halöŵö | Safuria tebulö