Wb/nia/Sura Ni'amoni'ö/Sura Moze si föföna/Faza 1

From Wikimedia Incubator
Faza 1

I. Famazökhi tanö'a.[1] II. Haga. III. Famazökhi banua. IV. Famöfö'ö asi. V. Luo ba baŵa ba döfi. VI. I'a ba fofo. VII. Saliŵa-liŵa ba danö. VIII. Niha, famaedo Lowalangi.

I. Ba mböröta ifazökhi Lowalangi mbanua si yaŵa, awö danö.

II. Ba no si fakuyu manö guli danö ba si lö ösi;[2] ba manaha-nahae Geheha Lowalangi yaŵa nidanö. Ba imane Lowalangi: Yamohaga! Ba mohaga. Ba i'ila Lowalangi, wa no si sökhi haga andrö, ba iföfö'ö ira haga andrö sogömi-gömi Lowalangi. Ba ibe'e töi haga andrö zi ma'ökhö Lowalangi ba töi zogömi-gömi andrö ba si bongi ibe'e. Ba bongi ba moluo, ba luo si föföna.

III. Ba imane Lowalangi: Yamubologö ia banua ba gotalua nidanö, ena'ö famabali ia ba gotalua nidanö si dua balö andrö. Ba itörö. Ba ifazökhi wa'ebolo mbanua andrö Lowalangi, famabali nidanö tou mbanua ba nidanö yaŵa mbanua. Ba ibe'e töi wa'ebolo andrö mbanua Lowalangi. Ba bongi ba moluo, ba luo si dua.

VI. Ba imane Lowalangi: Yamu'oniagö ia idanö barö mbanua ba zi ha sambua nahia, ena'ö oroma zabe'e tanö. Ba itörö. Ba ibe'e töi zabe'e andrö danö Lowalangi, ba si tonia idanö, ba asi ifotöi. Ba i'ila Lowalangi, wa no si sökhi. Ba imane Lowalangi: Yatumbu ba danö ndru'u, awö gule-gule sowua, tanömö dania, ba eu sowua ngawalö mbua ba danö, sohunö, tanömönia. Ba itörö. Ba tumbu ba danö ndru'u ba gule-gule sowua dania, tanömö, ngawa-ngawalö, ba eu sowua si so hunö, tanömö dania, ngawa-ngawalö. Ba i'ila Lowalangi, wa no si sökhi. Ba bongi, ba moluo, ba luo si tölu.

V. Ba imane Lowalangi: Yaso zihaga ba wa'ebolo mbanua andrö, ba wamöfö'ö si ma'ökhö ba si bongi, ba yatobali tandra nga'ötö ba tandra ngaluo ba tandra ndröfi wakhe; tobali sihaga ba wa'ebolo mbanua andrö, ba wohagaini uli danö. Ba itörö. Ba ifazökhi zihaga andrö Lowalangi, si dombua: sihaga sebua andrö, famatörö zi ma'ökhö ba sihaga side-ide andrö, famatörö zi bongi, ba awönia ndröfi andrö. Ba ifataro ira ba wa'ebolo mbanua andrö Lowalangi, ena'ö lahagaini guli danö, ba wamatörö si ma'ökhö ba si bongi ba ba wamöfö'ö si moluo ba si bongi. Ba i'ila Lowalangi wa no si sökhi. Ba bongi ba moluo, ba luo si öfa.

Ba i'ila Lowalangi, sökhi sibai fefu nifazökhinia.

VI. Ba imane Lowalangi : Yamaliŵa-liŵa ba nidanö zaliŵa-liŵa sonoso ba yamuhombo wofo yaŵa guli danö, ba wa'ebolo mbanua andrö. Ba ifazökhi Lowalangi zaliŵa-liŵa ba nasi andrö, segebua, ba sonoso andrö fefu, saliŵa-liŵa, soliha-liha ba nidanö, ngawa-ngawalö, awö ngawalö zihombo. Ba i'ila Lowalangi wa no si sökhi. Ba ifahowu'ö ira Lowalangi, imane: Mi'o'ono ba mi'oya'ö ami ba mifo'ösi nasi; ba fofo andrö, ba ya'oya sibai ba guli danö. Ba bongi ba moluo, ba luo si lima. Ba imane Lowalangi: Yamulua ba danö zonoso, ngawa-ngawalö, urifö niha ba kuö-kuö ba utu ndru'u, ngawa-ngawalö. Ba itörö.

VII. Ba ifazökhi gutu ndru'u andrö Lowalangi, hadia ia ngawalö, awö ngawalö gurifö niha ba saliŵa-liŵa ba danö fefu, sanana ba danö, ngawa-ngawalö. Ba i'ila Lowalangi, wa no si sökhi.

VIll. Ba imane Lowalangi: Datafazökhi niha, famaedoda, si fakhili-khili khöda, samatörö i'a ba nasi dania ba fofo ba dalu mbanua ba urifö niha andrö ba utu ndru'u fefu, awö kuö-kuö andrö, sanana-nana ba guli danö. Ba ifazökhi niha Lowalangi, famaedonia — famaedo Lowalangi ibali'ö; ira matua ba ira alawe womböinia ya'ira. Ba ifahowu'ö ira Lowalangi, imane khöra: Mi'o'ono ba mi'oya'ö ami, mifo'ösi guli danö ba mibe'e barö mbawami, samatörö i'a ba nasi ami, awö wofo ba dalu mbanua, awö zaliŵa-liŵa ba danö fefu, sanana-nana ba guli danö. Ba imane Lowalangi: Hiza, ube'e fönami fefu zinanö sowua ba guli danö heza, awö geu sowua sohunö, tanömö dania — da'ö gömi. Ba ba zaliŵa-liŵa ba danö andrö fefu ba ba wofo ba dalu mbanua fefu, möi ba zanana ba danö, sonoso ba bulu ndru'u hadia ia göra. Ba itörö. Ba i'ila Lowalangi, sökhi sibai fefu nifazökhinia. Ba bongi ba moluo, ba luo si önö.


Umbu[edit | edit source]

  1. Tanö'a no fehede ni'oguna'ö Sundermann me i'ali Zura Ni'amoni'ö ba li Niha ba wanötöi banua si yaŵa awö danö, eluahania he tanö si so barö gahe (li Indonesia, bumi) ba he göi atmosfer si so yaŵa. Lö ta'ila heza na sa te'oguna'ö wehede andre, ba hiza sökhi me na na la'oguna'ö wehede tanöa tobali fangali nifotöi planet ba li Indonesia, ya'ia da'ö tanö tou ba banua samasui ya'ia nifotöi atmosfer.
  2. Fakuyu eluahania lö khala-khala ma zui lö boto, hulö gangowuloa zoya ngawalö si no oi faruka manö. Fakuyu asese te'oguna'ö na oi fawuka mbana sanau, no oi fatali irege tebai tafadölö ia sa'ae. Heŵa'ae simanö fehede ni'oguna'ö ba li Ibrani fabö'ö ma'ifu. Tenga si fakuyu ba si lö ösi gulidanö ba mböröta, ba hiza lö moboto ba lö ösi.





Sura Ni'amoni'ö: Mataio | Mareko | Luka | Yohane | Halöŵö Zinenge | Roma | Korindro I | Korindro II | Galatia | Nefeso | Filifi | Kolose | Tesalonika I | Tesalonika II | Timoteo I | Timoteo II | Tito | Filemo | Heberaio | Yakobo | Fetero I | Fetero II | Yohane I | Yohane II | Yohane III | Yuda | Fama'ele'ö

Fanolo wanura: Lala wanura | Fama'oli nösi | Ngawalö templat | Ngawalö kategori
Kategori: Amaedola | Budaya | Cerpen | Fangi'ila (Ilmu Pengetahuan) | Hendri-hendri | Hoho | Hikaya | Kamus Nias-Jerman | Kese-Kese | Lala wondrino (Resep) | Maena | Manö-manö | Manö-manö Nono Niha | Uso dödö (Entertainment) | Novela | Sejarah | Seni | Sinanö | Sinunö | Sura Ni'amoni'ö | Taromali Ero Migu | Turia Somuso Dödö

Fanolo wofanö: Olayama | Angombakhata | Bawagöli zato | Monganga afo | Nahia wamakori | Nga'örö spesial | Ngawalö wanolo | Sangai halöŵö | Safuria tebulö | Wikibuku | Wikikamus | Wikipedia | Wikiyunior