Wb/nia/So Mbuala 100 Zuta..,

So dalifusöda toröi ia ba Hilimböŵö Badalu, Desa Hiligara-Ombölata Simenari ba Kecamatan Gunungsitoli Selatan. Taŵa'ö manö töinia Ama Regi. Na so döi sifagölö, ba no tenga ni'odödögö.

Ngaluo Sinaya, ba no ihönagö mbalazonia, fakhe nilöwösi, ba adulo manu ni'oma'ae ba no ifaruka lada Ina Regi. Me no fagambö-gambö ira, ba adulo sisambua ba labagi dua. Matonga gö nononia, Regi, i'ohe ba zekola, ba matonga gö nama Regi i'ohe ba kabu.

Sambua wangalösi fa'erege dödö nama Regi ba so hape nibe'e nakhinia sitoröi ba Siantar, döfi si lalö. "Fake-fake hape da'a ga'a, ena'ö tola faoma ta'ila duriada. Na hada-hada'ia ba tola öhape ndra'odo." Simanö wehede nakhinia me iröi hape andrö.

Ero-ero ba isaisi zinöndrania Ama Regi ba wowöli pulusa. Na ibato wogai gitö ba molombase ia ba ibokai hapenia. Me ambö-ambö ia ba wamokai-mokai ngawalö wakake si so ba hape ba sasese ifaigi-faigi hadia zi so ba Whatsapp, ba ifataria ibokai göi Fesibuku.

Samuza luo, awena modadao ia ba nosenia ba halama, mo li hapenia. So zo telefo. Lö oroma döi hezo moroi. Ba lö i'ösö ifazaŵa. Me tohare zui telefo simendrua, ba itema'ö Ama Regi.

"Pak, selamat siang. Ini Pak Regi ya?"

"Ya'ia, Pak. Yo'odo Ama Regi." Itema li ba li Indonesia.

"Wah, ya'odo Yanu moroi ba Bank Nias Indonesia, no göna'ö mbuala Pak, 100 zuta. Me'owi no lafili, ba kalua döimö. Na tola u'ila, hezo dania ö'oguna'ö gefe andre Pak?

"Saohagölö ua duria da'a. Na sindruhu atö, ba kefe andrö ufake ba wosahe omo khögu, ugati zagö beleki, ba u'ilö zalo sabu, awö u'öli zoguna khö Ina Regi ba khö nono khögu."

"Lau, baga da'ö. Ba ginötö iada'e ba nindrohugö manö Pak he. Moguna u'ombakha'ö khö Pak Regi wa kefe si otu zuta andre ba fatua lö lafa'ohe'ö khömö ba so biaya nibe'e, pajak 20 forose. Eluahania öfa'ohe'ö Rp 20 zuta ua awena dania ötöma mbuala andre. Hadia so khöu gefe da'ö pak?"

"Hezo mahalö khöu gefe da'ö, Pak. Niha silö'ö ndra'odo. Lö badangagu."

"Simane Pak, böi abu dödöu, iada'e ae yöu ba fasa, ba ohe zura akatö nomo ba halö ua gefe ba BRI. Ba na no dania so gefe mbuala ba ö'ogati'ö ya'i."

"Ba lau, da ma'angeragö ua."

Aetu telefo ba ilau mangawuli yomo Ama Regi. Aoha sibai gahenia. Itaria ilau fagohi side'ide. Omasi ibe'e wamohafa khö Nina Regi. Edöna lö i'ombakha'ö nirongonia. Ilau mondri, ba aösö ihalö zura nomo.

"Hezo möi'ö Ama Regi. Hadia öwai zura nomo?"

Me no talazu i'ila Ina Regi, ba i'ombakha'ö manö Ama Regi wa so khöra mbuala Otu Zuta.

"Hezo moroi khöra da'ö? Hadia sindruhu ba?"

Nifa'anö: Apolonius Lase

Nitöngöni

Omuso dödögu na öfazaewe nidunö-dunö andre ba media sosial ma Internet. Hiza i be'e fao gumbu heza tehalö ia. Be ba gahe zura: Moroi ba Wikibuku Nias. Nifa'anö ???. Aila ita ba niha na lö öbe'e gumbunia, me öhalö töiu zi tenga töiu.

Fabaliŵa lala

Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö