Wb/nia/Samihara Barasi
Meföna so samösa nono'alawe si sökhi sibai amuata. Wa'asökhi gamuatania, irege gofu haniha niha ba oi la'omasi'ö ia. Töra-töra i'omasi'ö ia awenia. Samuza ma'ökhö i'amulagö khönia awenia nöu soyo fombalugö mbunia. Ba no faudu sibai ia khönia, irege lö aetu i'oguna'ö ia na möi ia baero nomo. Tenga ha sökhi gamuatania, ba sökhi sibai göi nukha awö nöunia irege to'ölö lakaoni khönia Samihara Barasi
Samuza ma'ökhö iŵaö khönia inania, "Aine, Samihara Barasi. Ya'e löwö-löwö gö ba ae fasao ia khö gaweu. Abölö sibai wökhönia ba silötolalö'ö omuso dödönia na ö'ohe gönia." Ba itohugö na inania, "Faigi-faigi ba lala ba böi röi lala sebua faböi elungu ndra'ugö ba lala. Ba na no örugi anonai gaweu ua fatua lö öfalua halöŵö bö'ö."
"Böi mangiwa dödöu, na. U'o'ö fefu niŵa'öu." Itema linia Samihara Barasi. Ba ibua'ö ia lumalö ba nomo gawenia.
Omo khö gawenia so ba dalu gatua. Mato alölö nafo wa'aröu.
Me irugi gatua Samihara Barasi falukha khönia nasu gatua. Hiza lö i'ila Samihara Barasi wa aurifö safaito nasu gatua. Andrö wa lö ata'u ia me i'ila ia.
"Ya'ahowu Samihara Barasi," i'owai ia asu gatua.
"Ya'ahowu göi asu gatua," itema linia.
"Heza ölau'ö balö ba zahulö andre."
"Möi ba nomo gawegu," ifa'ema Samihara Barasi.
"Ba hadia göi nisakheimö andrö, balö?"
"Löwö-löwö ö gawegu. Mofökhö sibai ia ba te omuso dödönia na u'ohe khönia gö."
"Aha... heza so nomo gaweu, balö?"
"Bakha ba gatua. Lö aröu tö. So ba da'ö eu sebua sibai. Silötolalö'ö ö'ila geu andrö, fondrege ebua ba gatua andre."
Ba imane ba dödönia asu gatua, Ombuyu nasa döla nono da'a ba oya göi dawö. Ha wa'ami. Abölö ami moroi ba döla gawenia satua andrö. Lau uhaogö-haogö sa, ena'ö tola u'a darua manö ira.
Me latohugö ma'ifu tö wofanö, imane asu gatua andrö, "He Samihara Barasi. Faigi tö oi mbunga si sökhi andrö ba zinga lala. Hana wa lö möi ndra'ugö öteu ösa ba ö'ohe khö gaweu? Silötolalö'ö omuso dödönia dania wamaigi bunga si sökhi ba dangau."
Ba imane ba dödönia Samihara Barasi, Sindruhu göi. Omuso dödö gawegu na u'ohe khönia ösa mbunga andre. Ahulö sibai nasa, fakhamö möi ndra'o waneteu bunga andrö, irege lö ahou ndra'o."
Ba iröi döla lala ba möi ia ba zinga lala heza oya mbunga si sökhi. Ba ero i'ila mbunga bö'ö i'ila abölö sökhi da'ö nasa, andrö wa itugu ifa'ese ia ba itugu aröu ia moroi ba mboto lala.
Hiza no idölö ia asu gatua ba nomo gawe Samihara Barasi. Me irugi ba ihaogö ibökö mbawandruhö. Mulimba-limba dödönia ba wa'omuso dödönia.
"Haniha baero da'ö?" mu'ao gawe Samihara Barasi moroi ba wuröma.
"Ya'o wö, awe. Samihara Barasi. U'ohe göu löwö-löwö. Bokai khögu mbawandruhö," no ihekhe mbawa asu gatua.
"Lulugö manö mbawandruhö. Tebai ufaoso ndra'o moroi ba mbate'e khögu."
Ida'i-da'i wolulugö bawandruhö asu gatua. Ba ihaogö wofanö irege lö ruru-ruru. Ba i'anaoka, ira'u gawe Samihara Barasi ba i'a ia önia.
Ba ifohani ia faoma baru gawe Samihara Barasi. Möi ia ba mbate'e ba ibologö yaŵania gambala.
Ba Samihara Barasi? Me no i'owulo-wuloi mbunga si sökhi khönia, itörö tödönia gawenia, ba lö omasi ia ahou ia wondrugi omo gawenia.
Me irugi nomo, ahöli ma'ifu dödönia, me no teboka mbawandruhö.
"Ya'ahowu, awe!"
Ba ahöli dödönia me lö itema-tema awenia. Imane tödönia, "Hmmm... hadia mörö ia nasa?"
Me irugi mbate'e, ihatö'ö ia ba ibokai gambala gawenia. Ba tobali ahöli sibai dödönia.
"He gawe. Hana anau sibai dalingau?" isofu Samihara Barasi.
"Ena'ö tola urongo hadia niŵa'öu," itema asu gatua.
"Ba hana göi egebua sibai nono höröu?"
'"Ena'ö tola abölö u'ila ndra'ugö, nogu."
"He bale. Ba hana aganau sibai da'iou, balö?" itohugö wanofu Samihara Barasi.
"Ena'ö tola ukhamö ndra'ugö.'"
"Ba hana ebua sibai mbawamö, gawe?"
"Ena'ö tola u'a ndra'ugö." Ba lö na ahori iŵa'ö da'ö asu gatua ba no ira'u danga Zamihara Barasi, idöni ia ba mbawania ba itölö manö owulo-wulo. Me no awai ba ileagö zui ia, alau hörönia, irege mohago-hago dötölönia.
I'anema'ö itörö föna nomo samösa niha si möi malu. Ba manofu dödönia, hana wa ebua sibai wohago-hago ndra'awe satu andrö. Ba ihatö'ö ia ba mbate'e gawe Samihara Barasi.
"Ya'ugö i da'a asu gatua," tokea ia. "No ara u'alu-alui ndra'ugö. Ba ba da'a i usöndra'ö." Edöna ihandrogö dohonia. Bahiza imane tödönia, te no i'a gaweda satu asu gatua andrö ba te tola nasa mutolo ia.
Ihalö sara guti ba ibörötaigö woguti talu nasu gatua. Ba me teboka ma'ifu i'ila mbalö nöu soyo. Ba me awai iguti manaoka baero Samihara Barasi.
"Saohagölö, baya. Arakhagö aetu nosogu bakha ba dalu nasu gatua. Harizaki no so ndra'ugö."
Ba möi göi baero gawe Samihara Barasi. Auri ia nasa bahiza arakhagö tebai mohanu-hanu ia sa'ae.
I'alio'ö i'owuloi gara Samihara Barasi ba izozo bakha ba dalu nasu gatua.
Lö ara aefa da'ö maoso nasu gatua moroi ba wemörö sabölö-bölö khönia. Manaoka ia moroi ba mbate'e ba tehandro abölö-bölö ia tou ba zalo, börö wa'abua gara, irege i'anema'ö mate ia.
Ba omuso sibai dödöra fefu si datölu niha. Ahulu asu gatua namada si möi malu. Abölö wemanga gawe Samihara Barasi moroi löwö-löwö ni'ohenia. Ba omuso dödö Samihara Barasi me auri ia nasa.
Ba imane tödönia, "Ube'e tödö sa'ae niŵa'ö ninagu. Lö sa'ae uröi dalu lala sadölö, na no iŵa'ö inagu. Ha sabila lala zondröi lala sadölö."
Nitöngöni
[edit | edit source]Omuso dödögu na öfazaewe nidunö-dunö andre ba media sosial ma Internet. Hiza i be'e fao gumbu heza tehalö ia. Be ba gahe zura: Moroi ba Wikibuku Nias. Nifa'anö Sirus Laia. Aila ita ba niha na lö öbe'e gumbunia, me öhalö töiu zi tenga töiu.
Fabaliŵa lala
[edit | edit source]Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö