Wb/nia/Razo Midas

Razo Midas no samösa Razo fondrege sambö tödö ba solu'a-lu'a. Ba zisambua inötö göi ba tola sökhi ia ba soböwö ba niha. Ba hiza Silenus, sambua zauri sohögö niha ba soboto nambi, si lumalö ba gödonia si no owökhi tödö ba solofo me no aefa itöröi mbotohili. Ba ibe'e gönia Razo Midas ba irorogö ia.

Silenus no awö Dewa Dionysus ba wanöröi tanö. Omuso dödönia ba wa'asökhi dödö Razo Midas khö Silenus irege möi ia i'ondrasi Razo. "U'asogö khöu sambua angandröŵa, gofu hadia ia tola ö'andrö," fehede Dionysus. Ba ilau mangera Midas, ba i'ombakha'ö nösi dödönia. "Omasido mena'ö na hadia ia nibabayagu tobali ana'a," fehedenia.

"Tola tobali tahi khöu da'a, hadia no faduhu dödömö ba ni'andrömö?" fehede Dionysus. "Ya'ia. Da'ö zomasido," fanema Midas ba wa'omuso dödönia. "Lau na simanö," fehede Dionysus, "u'asogö gangandröŵamö da'ö," ba ataya ia aefa da'ö.

Ifaigi ba zifasuinia Midas. I'oro'ö dangania ba ibabaya meza. Ba ha samuza, no tobali ana'a meza andrö. "Awena itörö hörögu da'a," fehede Midas maigi-igi ia. "Hasambalö tobali ndra'o niha si kayo ba gulidanö." Ba ifasui gödonia, ibabaya mbaku-baku, towa, bawandruhö, salo, toga, sagoni rigi, nukha, ba tanöbö'önia, fefu a'oi tobali ana'a.

Ba ibe'e wehede khö ndra ngoni-ngoninia ba wolohe ö sami ba mezania. Me no ofeta gö ba tete meza ana'a, ba ibabaya ngawua wiga si so fönania Razo. I'oroi mböröta no i'era-era wemanga ba wiga gana'a. Bahiza, me isou'ö gönia, izumaigö göi tobali ana'a gö da'ö. Ba awena i'angeragö wa lö i'ila ilau mamadu awö manga.

Ba fagohi nononia side-ide ba mbate'enia ba isofu khönia, "He Ama, hadia zalua ba gödo da'a?" Ibabaya galisi nononia Midas ba izumaigö tobali adu gana'a. "Hadia zi no ufalua?" fehede Midas mu'ira-ira ia.

Me bongi, itörö ia fa'olofo ba atö ya'ia. I'andrö khö Dionysus ba wanolo ya'ia fatua lö mate olofo ia. "No nasa uŵa'ö khöu mböröta," fehede Dionysus me izumaigö tohare ia. "Mahemolu mbanua, u'u ndra'ugö ba nidanö ba mbombo, ba ataya dania fefu zi göna khömö. Tobali famangelamamö zalua andre."

Moluo mahemolu, ba ilau ia Midas ba mbombo ebua ba manaoka ia bakha ba nidanö. Me möi ia baero, ba ibabaya ngöfi nidanö, ba hiza dambu si so ba da'ö lö tobali ana'a. "Harazaki, no awai," ifahasu ia. Me irugi gödonia, hadia ia fefu zi no tobali ana'a no tobali mane sito'ölö, ba ilau fagohi ononia khönia.

Ba no itanö ba mbörö dödönia Midas wa tebai ifau'u'u manö mane nilau dödönia, ba hiza sa'atö ifuli-fuli ia ba wa'ambö dödönia. Samuza ma'ökhö, so wahulösa ba gotalua Dewa Apollo faoma Pan ba wamoli fakake si so li si sökhi. Ba ifoli lira Apollo irege fawikho-wikho wofo ba wamandrongo. Ifoli göi zurunenia Pan, ba terongo li sanga'asogö fa'abu dödö.

Ba la'ombakha'ö ira sanga'i angetula wa Apollo zi möna ba wahulösa. Bahiza Razo Midas si no mamondrongo i'oroi wamobörö, mu'ao ia imane, "Famaigigu, abölö sökhi nasa Pan ba wahulösa da'a."

Me irongo da'ö Apollo ba no oyo mbawania. "So zi fasala ba dögi dalingamö andrö," fo'aonia. "Te me no ide-ide dalingamö, ba da u'ebua'ö wamoli ya'ia." Ba ibe'e yaŵa duru laŵania föna-föna Midas.

Ba ibabaya högönia razo ba irasoi itugu anau dalingania ba mobu hulö dalinga galide. Sögö i'alio'ö wangawuli ba gödonia ba ibini'ö högönia bakha ba mbalu-balu högö nukhania.

Lö omasi ia na so zangila awö zama'oyosi ya'ia. Andrö wa ibalugö dalingania faoma takula salaŵa. Ero ma'ökhö lö aefa dakula ba högönia, he göi na inötö ilau mörö. Bahiza, tumbu mbunia itugu anau, ba hasambalö si möi ia ba zanaba bu.

Ba ifaso zanaba bunia Midas wemöi ba hölu, ba wa lö ifatunö gofu khö haniha zi no alua ba dalingania. "Heŵa'ae ha öngöngögö wangombakha talingagu, si mate sa'ae ndra'ugö," fehedenia. Ba fawu'u zanaba bu da'ö wa lö ifatunö hadia ia zalua ba dalinga Razo Midas. No ha'uga migu no mutalu'i, ba no iduhö manö zi no i'ila sanaba bu, bahiza omasi sibai ia göi ba wangombakha.

Ba tebai itaha sa'ae wamini'ö zi no i'ila. Ilau ia ba ngöfi nidanö, ikhao danö, ba faŵai ia imane, "No motalinga Razo hulö dalinga galide." Ifuli iduhö danö nikhaonia ba i'ila wa lö hadöi samösa zi tola mangila mbini'ötania.

Me baŵa wa'aukhu zino, ba tumbu ndru'u ba ngöfi nidanö. Me ibözi angi ndru'u andrö, ba terongo li imane, "No motalinga galide Razo." Ba iada'a fefu a'oi mangila hadia ia zalua khö Razo Midas börö ba wa'ambö tödönia.

Nifa'anö Tiru Zendratö. Tehalö nidunö-dunö andre moroi ba mitologi Yunani.

Nitöngöni

Omuso dödögu na öfazaewe nidunö-dunö andre ba media sosial ma Internet. Hiza i be'e fao gumbu heza tehalö ia. Be ba gahe zura: Moroi ba Wikibuku Nias. Nifa'anö ???. Aila ita ba niha na lö öbe'e gumbunia, me öhalö töiu zi tenga töiu.

Fabaliŵa lala

Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö