Wb/nia/Ono Razo Si Taya

Ba zi sambua inötö, auri samösa Razo, töinia Tisare, ba fo'omonia sotöi Tisarita. Sambua khöra nono, ono matua nibe'e töi Sarevi. Samuza luo ba mofanö namada Razo Tisare, iröi nahia wa'arazonia. Ba ginötö wofanönia ba alua zikho ma fangabu dödö: taya nononia huno dödönia, Sarevi.

Me irongo da'ö Tisare ba abu sibai dödönia, ba aösö ilau mangawuli ba nomonia. Simanö göi nina Sarevi, dongania. Latöröi danö wangalui-ngalui Sarevi ba lö lasöndra hezo so ia. Oi lafareso mbaŵa, la'ogo'ö tabe gi'a, ma no awai alömö ia. La'osisi nidanö, la hene zinga nasi, ba lö tesöndra Sarevi. He zo so'ia...? manofu-nogu dödö nama ba ina Sarevi. Ma'ifu lö'ö hadöi niha mbanua göi sangila ba samondrongo he zo so nono Razo andrö.

Felelima fakhe aefa da'ö, no sa'ae arakhagö aetu dötönafö Razo Tisare. Ba zi lö mudöna-döna terongo khönia duria wa so samösa niha zohalöŵö ba danö, töinia Zalenaki, no isöndra ba samaliaro samösa ndraono side'ide, 4 fakhe wa'ebua. Ba iada'e no ebua-bua, no 19 fakhe ndröfinia sa'ae. Alaŵa niha ba no alaŵa göi nikhu. Tenga ha siga-siga, no maulu göi wa'atua-tua.

Ifatenge niha Tisare bawamaondragö niha danö sanöndra iraono andrö. Metohare Zalenaki, ba isofu khönia Tisare hewisa waö-waö me isöndra nono selengu andrö. I'ombakha'ö Zalenaki wa me felelima fakhe si lalö isöndra nono andrö ba naha wolokhoi rigi, no ifake nukha si baga ba si maha. Moroi ba ngawalö dandra nitutunö Zalenaki, aolo wa ono da'ö ono Razo.

"Ŵa'ö khö nono nisöndramö andrö akha i'ondrasido. Töngöni wa tohare lö ifake mbaru, ba hulö göi zamake baru; lö itörö ahe ba lögöi ilu'i ia kudo; tenga ba dalu luo, ba tenga göi ba zi bongi; tenga ba newali ba tenga göi ba lala," imanö Tisare khö Zalenaki.

Mangawuli Zalenaki. Ba zi sara lala, ba abu sibai dödönia. Ifatou-tou tödönia hewisa wa tola alua simane goroisa Razo. I'ila wa duana tola ifalua da'ö Sarevi.

Me irongo fefu goroisa Tisare andrö, ba imane Sarevi khö Zalenaki, "Aoha da'ö Ama. Tola utahö dahö-dahö da'ö."

Iheta mbarunia fefu irege sara gumi-gumi nukha lö hadöi ba mbotonia, ihalö ndriala ba da'ö i'onukha. Mofanö ia lö itörö kudo, i'ohe nambi sebua zo'osa'ö ya'ia. Ofeta ia ba zi tanö'owi. Me ofeta ia föna nomora, ifolombase nambi, ahe föna ba newali, ba ahe furi ba lala.

Me i'ila da'ö Razo Tisare, ba omuso sibai dödönia, iŵa'ö, "Onogu da'ö, Sarevi!" Ono sitaya no mangawuli.

Nifa'anö: Apolonius Lase

Nitöngöni

Omuso dödögu na öfazaewe nidunö-dunö andre ba media sosial ma Internet. Hiza i be'e fao gumbu heza tehalö ia. Be ba gahe zura: Moroi ba Wikibuku Nias. Nifa'anö Apolonius Lase. Aila ita ba niha na lö öbe'e gumbunia, me öhalö töiu zi tenga töiu.

Fabaliŵa lala

Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö