Wb/nia/Ono'alawe Sobu Ana'a
Ba zisambua banua, so samösa nono'alawe sobu anau. Bunia mola'a hulö gana'a wa'atakile. Faduhu dödönia, wa bunia andrö tola mame'e fa'abölö ba falö ata'u. Ba hiza, tobali adöniŵa dödö ndra sorabu mbunia. Omasi ira wangokhögö ya'ia. No göi sa latandraigö tölara ira sorabu ba wanaba bu gana'a nono'alawe andrö, bahiza lö irai ahulu ira. Tebai latimba wa'abölö zi so khö nono'alawe.
Samuza inötö, möi nono'alawe sobu gana'a andre mamolo ba gatua. Falukha ia gulö sebua ba da'ö.
"Hadia nifaluamö ba da'a?" isofu khönia ulö andrö sifao li so'ugu ebua same'e tohafa ia.
"Na tola u'alani gulö andre, itugu muhöngö duria wa'abölögu ba mbanua saröu," ni'era-era nono'alawe andrö.
Ba ifangewe mbunia andrö ba wolaŵa ulö. Ba ha samuza ifangewe mbunia, ba te'ala gulö no mege, irege möi barö mbawania. Omuso dödönia, me hasambalö tehöngö wa'abölönia ba zisagörö banua.
Atulö sa. Fa'abölö nono'alawe andrö itugu teturia. A'oi ahöli-höli dödö niha khönia. Hiza'i ba zitambai da'ö, no so ba dödö ndra sorabu ba wangokhögö bu nono'alawe andrö.
"Hewisa lala ba wanga'i bu gana'a andrö?" fehede zorabu.
Ba zi ha'uga ngaluo, i'alui-alui lala sorabu ba wanaba bu nono'alawe andrö. Irege ŵa i isöndra sambua lala.
"Akha ufahöngö duria ba niha soya, wa so gaurifö sabölö sibai bakha ba gatua. Hasambalö atö möi nono'alawe andrö ba wangalui ya'ia ba gatua. Sindruhunia sa, lö atulö duria da'a. Mowongi na atö ia bakha ba gatua ofeta isöndra gaurifö da'ö. Ba utaba mbunia na inötö ilau mörö," fehede zorabu andrö.
Tehöngö ŵa i duria si lö atulö da'ö ba niha soya. Adöni göi dödö nono'alawe da'a ba wangalani aurifö andrö. Sögö möi ia ba gatua ba wangalui aurifö sabölö da'ö, Bahiza, no me ha'uga ifasui gatua andrö, ba lö isöndra. Arakhagö bongi, ba lö nasa omasi mangawuli ia dali isöndra gurifö sabölö mege no. Ilau mörö bakha ba gatua. Ba hiza göi zorabu samauze ya'ia ibörögö ifalua halöŵönia. Me inötö mörö nono'alawe andrö, ba itaba mbu gana'a khönia sorabu. Tokea sibai ia me ilau maoso. No tobali mola'a aitö ba adogo-dogo mbunia. Abu sibai dödönia ba da'ö.
Lö ara ba döröhöŵa ia. No tohare fönania gaurifö sabölö ni'alui-aluinia. Ata'u ia. Mangera ia me lö sa'ae fa'abölönia, börö me no ataya mbu gana'a khönia. I'uduni ia aurifö sabölö andrö. Ba itayaigö wa'ata'unia ono'alawe andrö, ba ilaŵa. Ba hiza tola ibe'e te'ala gaurifö sabölö andrö irege möi barö mbawania. Omuso sibai dödönia, me no te'ala nudunia, heŵa'ae lö hadöi sa'ae bu gana'ania.
Me no isöndra wa'amöna, ba mangawuli ia sa'ae. Lö sa'ae itörö tödönia mbu gana'a si no latagö ira sorabu. Dozi niha sangila ya'ia ba ao'i manofu-nofu. Bahiza, itunö khöra wa fa'abölö andrö moroi ba wa'afaduhu tödö ba ba wa'adölö dödö, andrö wa tola lö hadöi fa'atau na so nudu ma somba'agö hadia ia. Ba me irugi nomo ba ifalua halöŵönia simane sito'ölö. Tobali ia ono'alawe satua-tua. Me sökhi gamuatania, ba tobali omasi'ö niha sato ia irege lö hadöi si fatiu tödö khönia bakha ba mbanua andrö.
Nitöngöni
[edit | edit source]Omuso dödögu na öfazaewe nidunö-dunö andre ba media sosial ma Internet. Hiza i be'e fao gumbu heza tehalö ia. Be ba gahe zura: Moroi ba Wikibuku Nias. Ni'ali Tiru Zendratö. Aila ita ba niha na lö öbe'e gumbunia, me öhalö töiu zi tenga töiu.
Fabaliŵa lala
[edit | edit source]Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö