Wb/nia/Niha Simabu-mabu
Me föna so samösa ndra matua simabu-mabu. Ero ma'ökhö awai halöŵönia möi ba lafo, mamadu tuo. Tuo khönia mane sa'ae nidanö safusi.
Ero mangawuli ba nomo ba gariti gahe. Manole-nolea. Itaria tesuru-suru. Alabu ba mbandra ba no sa'ae asese. Lö sa'ae i'ila wa'ailania. Lö manö ihalö fusi na ikiöni zareŵania. Na inötö mangawuli ia ba nomora ba lö zi lö i'ötö nidanö.
Töinia zi no mabu. Iwalingagö manö satulö ia. I'ötö nidanö, lö khönia fangelama, hezo zinangea tola itörö, ba hezo nidanö zabakha. Si so ba gera-erania, abölö ia, ba gofu hada'ia ya'ia manö khönia.
Iheta mbadagahe sanau, ba i'ötö nidanö sasese itörö. Silö'önia, dua kali ma'ökhö i'ötö nidanö andre. Ba hiza, aefa iheta mbadagahenia, i'ofanöi mbawa nidanö. Dörö me gariti gahe, ba zilö idöna-döna itendre gara, ahele ba alau ia. Fao dayonia, manifa gahenia, edöna mozizio ba tebai. Lö ara ba no taya ia. Lö mu'ila hezo so ia.
Niha simabu-mabu si no taya da'ö so samösa nononia sotöi Fetero. Laŵa'ö-ŵa'ö khönia Fetero Safaito. Meno taya namania, ba no abu sibai dödönia. Ilau mege'ege ba ifalua wangandrö ba nomora, ifa'aso wandrita awö sisambua osali khönia. Aefa da'ö ba ibörötaigö iföfögö gondröita harato namania.
Ba zi sambua luo Migu, möi ba gosali Wetero. Omasi ilau mangandrö khö Zo'aya. Ba dalu lala numalö ba gosali i'ila samösa ndra'alawe salau. Fakara-kara ndra alawe andrö me manendre ia ba itudu so niha zodoro ya'ia. Ilau falele-lele. Ilau dayonia ena'ö tola ifuli mozizio. I'olembai döla geu si so fönania, ba maoso ia, ilau mozizio.
"Haniha zatana, zowöhö mowa, zolulugö ya'o. Hiza oi ta'unö nukhagu."
Afökhö wiso Wetero wamondrongo wakara-karasania. "Ya'ahowu nagu lawe. Hezo möi'ö?" Isofu Fetero hezo möi ndra'alawe da'ö.
"Möido ba gosali, omasido göi mangandrö khö Zo'aya."
"Hadia tenga fasala, wa möi'ö ba gosali, ba hiza ölau fakara-kara, öfa'aso Zatana, nagu lawe? Habörö me alau'ö, ba ösalaikö zatana."
Me aefa da'ö, itohugö wofanö Fetero. Irugi gosali ba ilau mangandrö. Me aefa migu, me mangawuli ia. Ba dalu lala, ba zi lö idöna-döna, tohare samösa nono matua si siga-siga. Lö i'ila hezo moroi ndramatua da'ö.
"Ya'ahowu Fetero," ifaköu ia wame'e sumange. "Saohagölö, Fetero, wehedeu mege khö ndra alawe salabu andrö."
"Hadia makasumö? Haniha ndra'ugö andre ua, hana wamangandrö saohagölö ndra'ugö khögu?" itema linia Fetero.
"Ya'odo andre satana," itema li Wetero. "U'andrö saohagölö me alau mege ndra'alawe andre, ba isalaikö ndra'odo. Ba hiza ya'ugö i ö'owögödo. Sökhi wehedeu khögu."
Aefa da'ö ba i'andrö satana andrö ena'ö möi fatome Wetero ba nomonia. "Ae fatome ba nomogu mahemolu. Ube'e khöu mbuala, ana'a ba firö. Halö hawa'oya manö zomasi'ö."
Tumbu ba dödö Wetero wa edöna. "Lau, möido khöu mahemolu."
Ifatunö lala khönia satana. Aefa da'ö ba i'anemai'ö taya Zatana andrö. Ilau mangawuli göi ba nomonia Fetero.
Mahemolunia, ihulö wongi khöda Fetero ba wofalukhaisi Satana. Tölu ngaluo nomowaö-waö ia. Igo'ö lala nifatunö Zatana khönia. Irugi ba zi sambua gatua. No ogömi-gömi gatua andrö. Me'oya sibai geu ba lö oroma sa'ae mbanua. Manizi dödö Wetero, mehaya'i-ya'ia ba ata'u sibai ia. Irugi bakha ba dalu gatua, ba i'ila so sambua nomo sebua. Ba da'ö toroi Zatana.
Me ofeta Wetero, ba so samösa nono alawe si sökhi bawa sangila ya'ia. Ono alawe andrö göi no ni'oloi'ö mbela ia moroi ba mbanuania.
"Hana wa so'ö ba da'a, ono matua sibarani? Ba da'a owulo ndra satana. Tola la'ö'ökhi'ö. Tola labali'ögö hatö toröi töla."
Ifatunö fefu Fetero zalua khönia irege tola ofeta ia ba nahia Zatana.
"Lau, fondrondrongo. Ufatunö khöu da'a. Na ibe'e khöu gana'a ba firö dania Satana, ba böi halö. Andrö sambua manö: kudo satua nibali'öra sawuyu ba wonoro-noro eu galitö ba monoro-noro idanö."
"Ena'ö ö'ila, kudo satua andrö," inönö wangombakha ira alawe andrö, "amau da'ö. Me alau ia me i'ötö nidanö, ba lara'u ia ira satana, la'oloi'ö ia. ba labali'ö ia kudo sonoro-noro eu ba idanö."
Me irongo da'ö ba omuso dödö Wetero. Tola zui falukha ia namania, niwalingania no mate.
Lö ara ba tohare Zatana. I'ondrasi Wetero. Sökhi sibai lagunia khö Wetero. I faosa gö sami khö Wetero. Lalau manga.
Irugi inötö mofanö Wetero.
"Fatua lö fabali ita, ba so mbualagau khöu," imanö Satana, "ube'e khöu gefe ba ufaogö khöu sageu kudo sabölö. Lö marase'ö wangawuli, tola i'onoro'ö kudo."
"Bologö dödöu Satana. Lö moguna khögu gefe. Hasambua zomasido öbe'e khögu, hewisa nafao khögu kudo satua andrö, sonoro-noro eu galitö ba idanö andrö," imanö Fetero.
"Hadia öwai kudo satua da'ö. Na ö'ohe ia tola manö lö örugi nomou ba no mate ia ba dalu lala," imanö Satana.
“Lö hana-hana Satana. Ha kudo satua da'ö zomasido."
Alulu dödö Zatana. Ibe'e manö kudo satua andrö khö Zatana. I'ohe Fetero kudo satua andrö fao awönia mangawuli. Ba golayama, falukha ia khö ndra alawe si so ba nomor razo mege.
"Hadia no ö'ohe kudo satua andrö?" isofu ono alawe da'ö khö Wetero.
"Ya'ia. No fao khögu kudo satua da'ö," itema linia Fetero.
"Ta'andrö saohagölö. Na ofeta'ö dania ba mbanuami, halö naya röfau ôfaligoi tölu kali öfuta'ö, öfusui kudo andrö. Aefa da'ö saetagö naya röfa da'ö ba mbagi kudo andrö," imanö ira alawe andrö.
I'andrö saohagölö khö nono alawe da'ö Fetero. "Saohagölö manö fefu wanolou ya'o."
Ofeta Wetero ba mbanuara. Ba ifalua simane ni'ombakha'ö nono alawe sanolo ya'ia ba nomo Zatana andrö.
Aefa ifo'aya kudo andö faoma aya röfania, ba taya kudo andrö ba si so fönania samösa niha satua, amania samösa.
Me fazuzu höröra, ba alua nidanö hörö. Fatalagui ira. Tölu hari wa'ara lö i'ila mohede amania. No akölu lelania.
Me aefa tölu ngaluo ba ibörötaigö i'ila mohede amania. Ba i'otarai da'ö lö sa'ae mamadu tuo Nama Wetero.
Nitöngöni
[edit | edit source]Omuso dödögu na öfazaewe nidunö-dunö andre ba media sosial ma Internet. Hiza i be'e fao gumbu heza tehalö ia. Be ba gahe zura: Moroi ba Wikibuku Nias. Nifa'anö ??? (fo'ösi ??? faoma töi zama'anö andrö yaŵa). Aila ita ba niha na lö öbe'e gumbunia, me öhalö töiu zi tenga töiu.
Fabaliŵa lala
[edit | edit source]Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö