Wb/nia/Moze V/1
Hikaya Ndraono Gizaraeli i'otarai hili Zina'i irege larugi Gadesi[edit | edit source]
I. 1 Da'e huhuo Moze yefo Yoridano, ba danö si mate, ba zalo'o tanö andrö, ba gamaudu Zufi, ba gotaluara Warana Dofeli Labano Haseroti Disahaba, huhuonia ba Ndraono Gizeraeli fefu. 2 Felezara ngaluo fofanö lala ba hili Ze'ira, i'otarai hili Horebi, irugi Gadesi Mbarenea.
3 Ba ba ndröfi si öfa wulu, me tesa'a lö faoro, ba mbaŵa si felezara, ba i'ombakha'ö ba Ndraono Gizeraeli Moze fefu hadia ia ni'oroi'ö Yehowa khönia, niŵa'ö khöra, 4 me no aefa i'alani razo Ndraono Gamori andrö, Sihona, ba Hesibona, ba Ogi andrö, razo Mbazana, ba Gasaroto, ba zinga Gedera no andrö.[1]
5 Yefo Yoridano, ba danö Ndraono Moabi, ibörötaigö Moze ibotokhi khöra goroisa andrö, 6 imane: No imane khöda Lowalangida Yehowa, ba gahe hili Horebi no: Noa wa'arami ba gahe hili andre, 7 mifazaŵa ami ba midölö ami ba hili Ndraono Gamori andrö ba ba zi faola tanö khöra, ba zalo'o tanö, ba ba hili ba ba ndraso ba tanö raya ba ba mbewe nasi, ba danö Ndrawa Gana'ana ba ba hili Libano ba irugi nidanö sebua andrö, Oiferati. 8 Tanö da'ö ube'e sa'ae khömi, misaŵa ia, ba mi'okhögö, si no möi ba hölu Yehowa khö ndra tuami Aberahamo, Iza'aki, Yakobo, ba wame'e khöra ba ba ma'uwura mitou.[2]
Famataro satua[edit | edit source]
II. 9 Ba me luo da'ö, ba no umane khömi: Tebai utaha, na ha ya'o zi onoro tödö ya'ami.[3] 10 No ato sibai ami ibe'e Lowalangimi Yehowa, fa'oya ndröfi ba mbanua sa'ae ami ma'ökhö. 11 Ba yamube'e Lowalangi ndra tuami, Yehowa, mehönö wa'atomi andrö tedou ami, ba yamufahowu'ö ami, si mane nifabu'unia!
12 Ba hadia, tola utaha wamakao andrö khömi ba fa'abu dödö ba huhuo andrö fefu khömi, na ha ya'odo? 13 Mi'ohe khögu niha satua-tua, si sökhi turia, dozi mado, ena'ö ufataro satuami. 14 Ba no mitema ligu, no mimane: Si sökhi niŵa'ömö andrö! 15 Ba uhalö högö mado andrö khömi, niha satua-tua, si sökhi turia, ba ufataro satuami, högö zi hönö ba högö zi otu ba högö zi lima wulu ba högö zi dafulu, kumandru ba madomi andrö.
16 Ba me luo da'ö, ba ube'e li ba zanguhuku ya'ami andrö, umane: Misekhegö niwami andrö, ba mi'atulö'ö wanguhuku, he na so nifadönira ba niwara, ba he na ba niha bö'ö. 17 Böi ebua dödömi zambuana, ba wanguhuku hadia ia; faoma mifondrondrongo niŵa'öra, he si numana, ba he sebua töi! Böi mi'ata'ufi niha; khö Lowalangi sa wanguhuku. Ba na so huhuo si tebai mi'asiwai, ba mi'ohe khögu, ena'ö usekhegö ira.[4]
18 Si manö wame'egu li khömi, me luo da'ö, ba halöŵömi andrö fefu.
Famatenge samauze ba fekökö-kökö zato[edit | edit source]
III. 19 Ba me aefa da'ö ba tafazaŵa ita ba gahe hili Horebi andrö, ba tatörö danö si mate andrö sebolo sibai ba sata'u ita, ma'asagörö, dali goroisa Lowalangida, Yehowa, tasaŵa hili Ndraono Gamori andrö. Ba me no tarugi Gadesi Mbarenea, ba umane khömi:
20 Ba no mirugi hili Ndraono Gamori andrö, nibe'e Lowalangida, Yehowa khöda. 21 Hiza, noa sa'ae ibe'e ba dangau danö andrö Lowalangiu, Yehowa; ba ae okhögö, o'ö niŵa'ö Lowalangi ndra tuau andrö, Yehowa, khöu. Böi ata'u ndra'ugö, ba böi abu dödöu! 22 Ba mi'ondrasido, dozi ami, ba nimane: Da tafowaö-waö ösa, ba wamauze tanö andrö khöda, ba ena'ö la'ombakha'ö khöda lala, lalada miyaŵa, ba he wisa mbanua andrö, nirugida dania.[5]
23 Ba me si sökhi da'ö uŵa'ö, ba ututuyu niha ba khömi, felendrua, samösa zambua mado. 24 Ba ladölö ira miyawa ba hili da'ö, larugi ndraso Esikoli ba lafauzei danö. 25 Ba lahalö göi ösa mbua danö, la'ohe khöda, mitou. Ba la'ombakha'ö khöda, lamane: Tanö andrö, nibe'e Lowalangida, Yehowa, khöda, ba no si sökhi.
26 Ba lö edöna ami möi misi yaŵa, ba mitandro niŵa'ö Lowalangimi, Yehowa. 27 Mukökö-kökö ami baose khömi, mimane: Fatiusa Yehowa khöda, wa no iheta ita ba danö Miserayi, ba wame'e ba danga Ndraono Gamori andrö ya'ita, ena'ö lahori ita. 28 Ba heza atö tasaŵa! Iwada andrö zame'e atalö dödöda, wanguma'ö: Sebua niha ira, salaŵa moroi khöda, ba banua, ba no sebua sibai, irugi mbanua si yaŵa fa'alaŵa göli, ba ma'uwu Genaki na'i ma'ila ba da'ö.[6]
29 Ba umane khömi: Böi muhokha mbumi ba böi mi'ata'ufi ira! 30 Si fasöndra salahimi dania Lowalangimi, Yehowa, sowaö-waö fönami, si mane me itolo ami ba danö Miserayi no, si no anehe ita, 31 ba si mane ba danö si mate, ni'ila höröu, nilu'i Lowalangimö, Yehowa, ya'ugö, nifolu'i niha ononia, ma'asara lala andrö, nitörömi, irege ofeta ami ba da'e.
32 Ba lö lai da'ö fefu, ba lö fanötönami khö Yehowa, 33 Lowalangimi, sowaö-waö fönami ba lala, ba wamaigi olombaseŵa khömi: ba zi bongi, ba ba galitö, ena'ö oroma khömi lala nitörömi, ba na ma'ökhö ba ba lawuo.[7]
Fotu ba wa lö molo'ö[edit | edit source]
IV. 34 Ba me irongo wehedemi andrö Yehowa, ba mofönu ia, fahölu ia, imane:
35 Ba niha andrö, niha si lö sökhi, ba samösa lö sangila dania tanö si sökhi andrö, nifabu'ugu khö ndra tuami fahölusa.[8] 36 Ha Kalebi andrö, ono Yefune, zangila dania; khönia ba ba ndraononia ube'e dania danö andrö, si no möi ia, me no a'oi dödönia wolo'ö khö Yehowa.
37 Khögu göi mofönu Yehowa, börö ami, tobali imane: Ba ya'ugö göi, ba lö örugi[9] 38 Yosua andrö, ono Nuni, si lö aefa-aefa ngoni-ngoniu, da'ö zondrugi dania; abe'e'ö dödönia, ya'ia dania zamaosa ba Ndraono Gizeraeli [tanö andrö]. 39 Ba iraonomi andrö, niŵa'ömi, ö nemali dania! onomi matua, si lö mangila na ma'ökhö hadia zi sökhi ba hadia zi lö sökhi, da'ö dania zondrugi; khöra ube'e [danö] ba ya'ira zi okhögö.[10] 40 Ba ya'ami andrö, ba mifuli ami, mifazaŵa ami ba misaŵa danö si mate andrö, lala ba nasi zukhu mitörö!
41 Ba mitema ligu, mimane khögu: Horöma khö Yehowa da'ö; da möiga miyaŵa manuwö, ma'o'ö manö niŵa'ö Lowalangida Yehowa khöda! Ba mangaro ami fefu, ba möi ami miyaŵa ba hili, sambö era-era.[11]
42 Ba imane khögu Yehowa: Ömane khöra: Böi mi'ae miyaŵa, böi manuwö, lö'ö sa fao ndra'o khömi; fa böi te'ala ami ba nemalimi andrö!
43 Ba uŵa'ö khömi, ba lö mifondrondrongo, mitandro manö niŵa'ö Yehowa, mi'abe'e'ö manö dödömi, we'amöi miyaŵa ba hili. 44 Ba faondra khömi Ndraono Gamori ba hili andrö, ba lagohi ami, hulö ŵani, ba lafazawili ami ba Ze'ira, irugi Horema.
45 Ba me no mangawuli ami, ba mangarö-ngarö ami khö Yehowa, ba i'osilömilagö wangarö-ngarömi Yehowa, 46 i'osilömurongogö. Ba ara ami ba Gadesi, ha wa'ara we'asomi ba da'ö.
Famotokhi ba gahe[edit | edit source]
Fabaliŵa lala[edit source]
Olayama Moze V: 1 • 2 • 3 • 4 • 5 • 6 • 7 • 8 • 9 • 10 • 11 • 12 • 13 • 14 • 15 • 16 • 17 • 18 • 19 • 20 • 21 • 22 • 23 • 24 • 25 • 26 • 27 • 28 • 29 • 30 • 31 • 32 • 33 • 34
Amabu'ulali Siföföna: Moze I • Moze II • Moze III • Moze IV • Moze V • Yosua • Sanguhuku • Ruti • Samueli I • Samueli II • Razo I • Razo II • Nga'ötö I • Nga'ötö II • Esera • Nehemia • Esitera • Yobi • Sinunö • Amaedola Zelomo • Sangombakha • Sinunö Sebua • Yesaya • Yeremia • Ngenu-Ngenu Yeremia • Hezekieli • Danieli • Hosea • Yoeli • Amosi • Obadia • Yona • Mikha • Nakhumi • Habakuki • Sefania • Hagai • Sakharia • Maleakhi
Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö