Wb/nia/Moze II/6
Ifuli ifabuʼu wangefa Lowalangi ba ifuli ibeʼe goroisa khö Moze[edit | edit source]
I . 1 Ba imane Yehowa khö Mose: Iadaʼe dania öʼila hadia nilaugu khö Waraʼo andrö: niʼanösöʼö tanga sabeʼe ifofanö ira, ba niʼanösöʼö tanga sabeʼe itimba ira, iheta ira ba danönia. [1].
2 Ba humede Lowalangi khö Moze, imane khönia: Yehowa ndraʼodo!
3 No uʼoromaʼö ndraʼodo no, Lowalangi si lö ambö faʼabölö, khö ndra Aberahamo, Izaʼaki, Yakobo; ba tenga Yehowa döigu ba wangoromaʼögu yaʼodo khöra. [2].
4 Ba noa naʼi ulau fawuʼu li khöra, wa ubeʼe khöra danö Ganaʼana andrö, tanö andrö ba zi fatewu ira mege [3].
5 Ba iyaʼe, ba no ufondrodrongo wangaröngarö Ndraono Gizeraëli andrö ba wangosawuyu Ndrawa Miserayi andrö yaʼira, ba no itörö tödögu gamabuʼula ligu andrö.
6 Andrö ömane ba Ndraono Gizeraëli: Yehowa ndraʼodo, uʼefaʼö ami ba halöŵö zawuyu andrö, halöŵömi ba Ndrawa Miserayi, usöbi ami, wameta yaʼami ba halöŵömi andrö, halöŵö zawuyu, uʼefaʼö ami tangagu niʼoroʼö andrö ba fao wangoromaʼö faʼabölö si lö ambö.
7 Ba utuyu ami banuagu, ba Lowalangimi ndraʼodo ba yaʼaboto dania ba dödömi, wa no Yehowa ndraʼodo, Lowalangimi, sangefaʼö yaʼami ba halöŵö zawuyu andrö, ba danö Miserayi.
8 Ba uʼohe ami ba danö andrö nifabuʼugu fahölusa khö ndra Aberahamo, Izaʼaki, Yakobo, fameʼe khöra; ba ubeʼe okhötami, yaʼodo, Yehowa andre!
9 Ba ifaʼema daʼö ba Ndraono Gizeraëli Moze. Ba lö lafondrondrongo khö Moze, ba waʼalangu dödöra andrö ba me no si manö waʼabeʼe halöŵöra.
10 Ba humede Yehowa khö Moze, imane:
11 Ae ŵaʼö khö Waraʼo andrö, razo Miserayi, yamufofanö Ndraono Gizeraëli, yaʼaheta ba danönia.
12 Ba humede Moze khö Yehowa, imane: Me lö nifondrondrongo Ndraono Gizeraëli khögu, ba he moroi ifondrondrongo Faraʼo? ba mendrua manö, me tenga si toʼölö ba wahuhuosa ndraʼodo. [4].
13 Ba humede Yehowa khö ndra Moze Aʼaroni, ifatenge ira ba Ndraono Gizeraëli ba khö Waraʼo, razo Miserayi, ba wangeheta Iraono Gizeraëli ba danö Miserayi.
Ngaʼötö ndra Rubeno, Simeoni, Lewi. Mose ba Aʼaroni[edit | edit source]
II . 14 Daʼe zatua baomo, ira tuara: Ono Rubeno andrö, si aʼa ndraono Gizeraëli, ba Hanokhi ba Fálu ba Heseroni ba kharimi; daʼö ngaʼötö Rubeno. [5].
15 Ba ono Zimeoni, ba Yemuëli ba Yamini ba Ohadi ba Yakhino ba Sohara, ba Saulo, ono ndrongania Dawa Ganaʼana andrö; daʼö ngaʼötö Zimeoni.
16 Ba töi nono Lewi ba ngaʼötöra, ba Gereso ba Kahati ba Merari. Ba 137 fakhe waʼanau noso Lewi. [6].
17 Ono Gereso andrö, ba Libini ba Simei, ba ngaʼötöra.
18 Ba ono Gahati, ba Ameramo ba Yeseari ba Heberona ba uziëli. Ba 133 fakhe waʼanau noso Gahati.
19 Ba ono Merari, ba Maheli ba Musi. Daʼö maʼuwu Lewi, ba ngaʼötöra andrö.
20 Ba Ameramo andrö, ba ihalö Yokhebe, inania si akhi; ba moʼono daʼö khönia, Aʼaroni ba Moze nononia. Ba 137 fakhe waʼanau noso Gameramo. [7].
21 Ba ono Yeseari andrö, ba Kora ba Nefegi ba Sikhiri.
22 Ba ono Guziëli, ba Mizaëli ba Elisafa ba Sitiri.
23 Ba Aʼaroni andrö, ba ihalö Gelizabe, ono Gaminadabi, talifusö Nahaso. Ba moʼono daʼö khönia; yaʼia Nadabi ba Abihu ba Eleazari ba Itamaro.
24 Ba ono Gora andrö, ba Asiri ba Elikana ba Abiazafi; daʼö ngaʼötö Gora andrö.
25 Ba Eleazari andrö ono Gaʼaroni, ba ihalö nono Wutiëli sambua; ba moʼono daʼö khönia; yaʼia Wineha andrö. Daʼö wurugö nono Lewi, ba ngaʼötöra andrö. [8].
26 Daʼö Gaʼaroni andrö ba Moze andrö, ba niŵaʼö Yehowa: Miheta ba danö Miserayi ngahönö Ndraono Gizeraëli andrö.
27 Daʼö ira, samaʼema khö Waraʼo, razo Miserayi, wa edöna laheta ba danö Miserayi Ndraono Gizeraëli — Mose ba Aʼaroni.
28 Ba me humede Yehowa khö Moze ba danö Miserayi, ba imane Yehowa khö Moze:
29 Faʼema khö Waraʼo, razo Miserayi, fefu hadia ia, niŵaʼögu khöu.
30 Ba imane Moze khö Yehowa: Ba si lö toʼölö ba wahuhuosa ndraʼodo; he moroi ifondrondrongo khögu Faraʼo?
Famotokhi ba gahe[edit source]
Fabaliŵa lala[edit source]
Olayama Moze II: 1 • 2 • 3 • 4 • 5 • 6 • 7 • 8 • 9 • 10 • 11 • 12 • 13 • 14 • 15 • 16 • 17 • 18 • 19 • 20 • 21 • 22 • 23 • 24 • 25 • 26 • 27 • 28 • 29 • 30 • 31 • 32 • 33 • 34 • 35 • 36 • 37 • 38 • 39 • 40
Amabu'ulali Siföföna: Moze I • Moze II • Moze III • Moze IV • Moze V • Yosua • Sanguhuku • Ruti • Samueli I • Samueli II • Razo I • Razo II • Nga'ötö I • Nga'ötö II • Esera • Nehemia • Esitera • Yobi • Sinunö • Amaedola Zelomo • Sangombakha • Sinunö Sebua • Yesaya • Yeremia • Ngenu-Ngenu Yeremia • Hezekieli • Danieli • Hosea • Yoeli • Amosi • Obadia • Yona • Mikha • Nakhumi • Habakuki • Sefania • Hagai • Sakharia • Maleakhi
Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö