Wb/nia/Moze II/10
Famakao fanete zi fitu: Tamo; ba[edit | edit source]
I . 1 Ba imane Yehowa khö Moze: Ae khö Waraʼo, noa sa uʼabeʼeʼö dödönia ba tödö ngoni-ngoninia, ba wolau khönia tandra andrö khögu.
2 Ba enaʼö ödunödunö dania ba ndraonou ba ba maʼuwumö, hadia nifatörögu ba Ndrawa Miserayi, awö dandra andrö khögu, nilaugu khöra, enaʼö aboto ba dödömi, wa no yaʼo Yehowa.
3 Ba möi khö Waraʼo ndra Moze Aʼaroni, ba lamane khönia: Daʼö niŵaʼö Yehowa andrö, Lowalangi niha Heberaio: Ha waʼara na tekhöu öʼideideʼö ndraʼugö fönagu? Fofanö mbanuagu andrö, enaʼö lafosumange ndraʼo!
4 Na tekhöu sa öfofanö mbanuagu, ba mahemolu, ba uasogö damo ba danöu,
5 ba alakha lahawui danö maʼasagörö, irege löʼö saʼae oroma danö tou. Laʼā dania zi tosai andrö, sauri na, ba si lö ahori na ba deu kara andrö, ba bulu geu fefu, sauri ba mbenua, ba lahori.
6 Ba moliha-liha dania ira ba mbateʼe khömö ba ba mbateʼe ngoni-ngoniu fefu ba ba mbateʼe Ndrawa Miserayi fefu, irege zi lö larai mila ira tua moroi yaŵa, irugi maʼökhṍ, götö wa no so ira ba guli danö. Aefa iŵaʼö daʼö, ba iʼerogö Waraʼo, ilau mofanö.
7 Ba lamane khö Waraʼo ngoni-ngoninia: Ha waʼara tö na tatehe tandraŵada niha andrö? Fofanö saʼae niha andrö, enaʼö lafosumange Lowalangira Yehowa. Hadia lö saboto ba dödöu na wa si tekiko danö Miserayi?
8 Ba lakaoni mangawuli khö Waraʼo ndra Moze Aʼaroni, ba imane khöra: Ba miʼaeʼe ba mifosumange Lowalangimi Yehowa; ba ha niha atṍ zi möi miŵaʼö?
9 Imane Moze: Ono sawuyu khöma ba satua khöma, ba maʼohe; ba ono matua khöma ba ono alawe ba biri-birima ba saŵima, ba maʼohe; so sa khöma gowasa, nilau khö Yehowa. [1].
10 Ba imane khöra: Lau! yamutolo ami Yehowa, na ufaʼoheʼö khömi ndraono sawuyu khömi; si ndruhu, no so ba dödömi zi lö sökhi!
11 Tebai daʼö; akha möi ndra matua mamosumange Yehowa; ha sa daʼö niŵaʼömi! Ba lafofanö ira ba daʼö khö Waraʼo.
12 Ba imane Yehowa khö Moze: Oroʼö dangau yaŵa danö Miserayi ba asogö damo, alakha lahawui danö Miserayi, ba wangohori fefu zinanö ba danö, fefu hadia ia zi tosai ba deu kara no.
13 Ba iʼoroʼö ziʼonia Moze yaŵa danö Miserayi, ba ifatörö ba danö nangi timu Yehowa, sara luo sara mbongi; ba me moluo, ba no iʼohe damo angi timu andrö.
14 Ba lahawui danö Miserayi tamo andrö, dozi banua ba danö Miserayi aekhu ira, oya sibai; lö irai si manö waʼoya föna, damo, ba löʼö manö göi ifuli si manö dania.
15 Ba lahawui danö maʼasagörö, tobali löʼö saʼae oroma danö tou; ba lahori fefu zinanö ba danö ba bua geu fefu, si tosai ba deu kara no; tobali maʼifu lö tosai bulu sauri, he ba geu ba he ba zinanö ba danö, ba danö Miserayi, maʼasagörö.
16 Ba iʼaliogö ifakaoniʼö ndra Moze Aʼaroni Faraʼo, ba imane: No sala ndraʼodo khö Yehowa, Lowalangimi, ba khömi göi. [2].
17 Ba mibologö dödömi khögu ba lalögu andrö, hatö zi samuza andre, ba miʼangandrö khö Lowalangimi, Yehowa, salahigu, enaʼö itimba atṍ khögu wamunu andre!
18 Ba iröi Waraʼo [Moze] ba mangandrö ia khö Yehowa.
19 Ba ifatörö nangi sabeʼe moroi ba gaekhula Yehowa, zuzumö, sangoloiʼö tamo andrö ba sanibo ba nasi zukhu; sambua lö tosai tamo, ba danö Miserayi maʼasagörö.
20 Ba iʼabeʼeʼö dödö Waraʼo Yehowa, ba lö ifofanö Ndraono Gizeraëli.
fanete zi ŵalu: Faʼogömi-gömi[edit | edit source]
II . 21 Ba imane Yehowa khö Moze: Oroʼö dangau miyaŵa ba mbanua, ba ihawui danö Miserayi faʼogömi-gömi, tobali laʼila muraʼu tanga waʼogömi-gömi andrö. [3].
22 Ba iʼoroʼö dangania miyaŵa, ba mbanua, Moze, ba ihawui faʼogömi-gömi danö Miserayi maʼasagörö, tölu bongi waʼara.
23 Tobali lö iʼila nawönia zamösana, ba tebai maoso, tebai iröi nahania zi tölu bongi andrö. Ba ba Ndraono Gizeraëli fefu, ba moluo ba nahiara.
24 Ba ifakaoni ö Moze Faraʼo, imane: Miʼaeʼe ba wamosumange Yehowa; ba biri-birimi ba saŵimi, ba toröi; iraono sawuyu khömi, ba hana na fao.
25 Ba imane Moze: Yaʼugö zamaʼoheʼö khöma sumange nitaba ba sumange nitunu, enaʼö maʼasiwai khö Lowalangima Yehowa,
26 ba si fao göi guriföma — sambua saʼa lö tola toröi furi, me soguna khöma ba wamosumange Lowalangima Yehowa; löʼö sa maʼila na, he mawisa wamosumange Yehowa, irege no marugi daʼö.
27 Ba iʼabeʼeʼö dödö Waraʼo Yehowa, ba tekhönia ifofanö ira.
28 Ba imane khönia Faraʼo: Labuʼögö! Angelama, fa böi saʼae faʼila bawa ita; na faʼila bawa ita sa, ba si mate ndraʼugö.
29 Ba imane Moze: Ba no öŵaʼö; löʼö saʼae faʼila bawa ita.
Famotokhi ba gahe[edit source]
Fabaliŵa lala[edit source]
Olayama Moze II: 1 • 2 • 3 • 4 • 5 • 6 • 7 • 8 • 9 • 10 • 11 • 12 • 13 • 14 • 15 • 16 • 17 • 18 • 19 • 20 • 21 • 22 • 23 • 24 • 25 • 26 • 27 • 28 • 29 • 30 • 31 • 32 • 33 • 34 • 35 • 36 • 37 • 38 • 39 • 40
Amabu'ulali Siföföna: Moze I • Moze II • Moze III • Moze IV • Moze V • Yosua • Sanguhuku • Ruti • Samueli I • Samueli II • Razo I • Razo II • Nga'ötö I • Nga'ötö II • Esera • Nehemia • Esitera • Yobi • Sinunö • Amaedola Zelomo • Sangombakha • Sinunö Sebua • Yesaya • Yeremia • Ngenu-Ngenu Yeremia • Hezekieli • Danieli • Hosea • Yoeli • Amosi • Obadia • Yona • Mikha • Nakhumi • Habakuki • Sefania • Hagai • Sakharia • Maleakhi
Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö