Wb/nia/Molö Manaho

Hiza sitou molö Manaho,
no fagaya-gaya fanono.
Molö sebua sonönöi tanö,
molö sebua sombala daso.

Tölu nono Zalaŵa möi ba danö,
datölu nono Duha möi milo.
Lö lalara wangawuli yomo,
me no iba'a ira molö Manaho.

Hadia nifaluara?

Gasa-gasa wa alö molö
ba lalau fa lailö zanu-zanu dödö,
ba ngöfi nidanö.
La'oföna'ö zia'a falailö,
ba la fondrondongo ira akhinia.

"Falailö zia'a ba wa'atumbu,
falailö zia'a ba we'aso.
Ya'e lailögu hunö-hunö dödö,
ya'e lailögu hunö-hunö mbo.
Na ta'ötö molö Manaho,
aoha gölögu wonga'eu,
aoha gölögu woboto.
Aoha gölögu na mate ndra'odo,
ebua dödögu na'auri nawögu."

Aefa sibai falailö zia'a,
ihatö'ö ia ba mbewe nidanö,
ifazaumba ia sitou ba dalu nidanö,
me irongo na so niha sahani,
ba alio alö molö.

Harazaki wa fakhamö,
lagogohe mbarunia,
lataha ira akhinia,
ba larara dödönia.

Mato sambadu me no ahono zia'a,
ba ilau falailö sitatalu,
itura'ö nösi dödönia:

"Falailö zitatalu ba wa'atumbu
falailö zitatalu ba we'aso.
Na ta'ötö molö manaho,
aoha gölögu na mate nawögu,
ebua dödögu na auri ndra'o.
Ya'odo zangokhögö harato,
ya'odo zangokhögö yomo walo,
ya'o ganofula zato."

Me no aefa falailö,
gösö ilau modadao sitatalu,
igogohe mbulu zukhu,
ata'u ma ahani ia ba molö.

Mowöi nidanö hörö
nakhira siakhi,
aröuröu ba dödönia,
lailö ndra ga'ania.

Andrö falailö ia asöndru dödö wamondrongo:

"Falailö ziakhi ba wa'atumbu
falailö ziakhi ba we'aso.
Na ta'ötö molö Manaho,
ebua dödögu na auri nawögu,
ebua dödögu göi na auri ndra'o.
Tafakhai dangada wanörö saelo,
tafakhai dangada wanörö tambu,
afu a'ozu ita fao-fao."

Aefa sibai falailö ziakhi,
latalagui mbaginia
ira ga'ania si fao fege-ege.
Ba gafuriata
lalau fagogohe tanga,
la'ötö nidanö me no ibörögö alö molö.

Aetu manömanögu.

Fabaliŵa lala

Fanolo ba wanura: Lala wanura • Fama'oli nösi • Ngawalö templat • Ngawalö kategori

Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö