Wb/nia/Mataio/2/Ere si otarai danö ba gatumbukha luo

I. 1 Ba me no tumbu Yesu ba Mbetilekhema, ba Yudaia, me luo razo Herode andrö, ba hiza gere, moroi ba danö ba gatumbukha, si möi ba Yeruzalema.^[1]

2 Lamane: Hezo razo Niha Yehuda andrö, sawena tumbu? No oroma khöma ndröfinia ba danö ba gatumbukha, ba möiga mangalulu khönia.^[2]

3 Ba me irongo da'ö razo andrö, Herode, ba tobali dödönia ba samba banua manö Yeruzalema, awönia.

4 Ba ifalukha'ö gere sebua fefu, awö zangila amakhoita ba niha Yehuda, ba izofu-zofu khöra, hadia niŵa'ö, heza tumbu Keriso.

5 Ba lamane khönia da'ö: Ba Mbetilekhema ba Yudaia, si mane sa ba zura zama'ele'ö:^[3]

6 "Ba ya'ugö, Betilekhema, ba danö mado Yuda, ma'ifu tenga fondrege zide-ide ndra'ugö ba zolohe mado Yuda andrö, me ba khöu i'otarai dania solohe andrö, sokubaloi banuagu andrö Iraono Gizeraëli."^[4]

7 Awena ifakaoni'ö gere no mege Herode, ibini'ö wamakaoni'ö, ba izofu-zofu sibai khöra, ha mega oroma ndröfi andrö.^[5]

8 Ba ifatenge ira ba Mbetilekhema, imane: Mi'ae'e, mi'alu-alui sibai, heza so nono andrö, ba na no misöndra, ba mi'ombakha'ö khögu, ena'ö möido göi mangalulu khönia.

9 Ba me no larongo niŵa'ö razo andrö, ba möi ira, ba hiza ndröfi andrö, ni'ilara ba danö ba gatumbukha, mowaö-waö fönara, irugi tebato ia faudu zi so ono andrö.

10 Ba me la'ila ndröfi andrö ba omuso sibai dödöra.

11 Ba möi ira yomo ba da'ö, ba hiza nono, awö ninania Maria, ba labalöduhini tou danö, mangalulu khönia ba labokai naha gana'ara, mamuala ira khönia, balaki ba kumöyö ba emuri.^[6]

12 Ba iŵa'ö khöra Lowalangi, ba wangifi, böi lafuli ira khö Herode; ba latörö lala bö'ö, wangawuli ba danöra.

(Mataio 2:1-12)

Famotokhi ba gahe[edit | edit source]

↑ Luk 2:4 b.t.
↑ MozIV 24:17
↑ Yoh 7:42
↑ Mikh 5:1
↑ Yes 60:1)
↑ Sin 72:10 b.t.

Faza 2: Ere si otarai danö ba gatumbukha luo (1-12) | Foloi ba danö Miserayi (13-15) | Famunu ono ba Mbetilekhema (16-18) | Fangawuli moroi ba danö Miserayi (19-23)

Halöŵö si fakhai: Wikikamus | Wikipedia | Wikiyunior

[1] Luk 2:4 b.t.

[2] MozIV 24:17

[3] Yoh 7:42

[4] Mikh 5:1

[5] Yes 60:1)

[6] Sin 72:10 b.t.

[1]

[2]

[3]

[4]

[5]

[6]