Wb/nia/Maola-Maola Nafo

From Wikimedia Incubator
< Wb‎ | nia
Wb > nia > Maola-Maola Nafo

Famaola nafo andre mufalua ba watomesa sebua ma'ifu si mane fanaru banua, tahö dödö gana'a ma latötöi göi "fangaruwusi ana'a", tahö dödö ndra'alawe ba owasa sebua si mane folau öri.

Itaria göi lafalua ia ba walöŵa na mame'e afo zangowalu. Samösa moroi ba dome zamaolagö afo nibe'e zangowalu andrö, si fao fanari-nari, ba noa göi i'ohe tangania mbola nafo.

So göi na ba gowuloa sebua, na no owulo dome tou baewali, ba samösa moroi ba zowatö, sasesenia ba Sinöwu Gana'a Si Boho-Bohou. Möi da'ö wamaolagö ba nöri si no owulo tou ba golayama.

Sarara sa'ae wamonukha-nukha hada ia, si fao fefu gama-gama famoadu. Hulö sa göi zanari-nari ia, ba no lafasui ia ira ina tanö bö'ö, si tobali sanehe-nehe maola-maolania. Si falailö sa göi ia, ba latehe-tehe si no mamasui (sato), wanguŵa'ö:

SINDRUHU NIŴA'ÖU BASAMAOLA, ARARA NIŴA'ÖU MEYA'IA..!


Sowatö:

Tobali ero aetu zandrohu wamaola ba latehe niha samasui. Ya'e ma'ifu maedo-maedo li lailönia ba wamaola andrö:

1. He le inagu Barasi Saota, tome salua ba nuwu zinata.
2. Ba da'ulabu-labu falailö, ba da'uŵaö zambua naya-naya.
3. Tenga wö lailö hokha sumbanö, tenga sanudu bu baolayama.
4. No lailö khögu alöŵa dödö, no lailö khögu fa'anumana.
5. Andrö khawaitö mbulu newali, andrö aomö mbulu golayama.
6. Me lö manö khöma hulö-hulö, me lö manö khöma dema-dema.
7. Fanema dome bauwu zinata, tome salua bauwu golayama.
8. Me lö afo si lima endronga, me lö afo si dua ba wonganga.
9. Me lö bago masire masira, me lö bago masire ana'a.
10. Me lö bago siriri sihole, ba siriri ba nuwu lela.
11. Ba ha wö i mömö ndraowi mömömöta, ba ha mömö ndraölö mömö gara.
12. Andrö wa lö sia'a lahina, lö sia'a nafo ba wamu'a.
13. Ba lö tawuo sini tawuo lara, me lö tawuo ba lali manawa.
14. Ba lö tawuo sodoi gasi-gasi, ba lö tawuo sodoi lahumawa.
15. Awai zi so khöma hulö-hulö, awai zi so khöma dema-dema.
16. Ha tawuo danö ngali möta, ha tawuo danö lambuaya.
17. Tawuo sanöi ba döla zilimo, tawuo sanöi ba döla dugala.
18. Si medölu ibobo bae'a, si mendrua inganga talaho lemba.
19. Ba lö fino belu fino kawa, lö fino magiao ba harefa.
20. Awai zi so khöma hulö-hulö, awai zi so khöma dema-dema.
21. Ha bua mawö bua hoya, si lö a'oi i'a fofo maera.
22. Andrö afusi mbawa zonuza, andrö andruo hörö zotaroma.
23. Me lö betua tuturu hösi, me lö betua uto wela-wela.
24. Me lö betua niduru'ö nangi, me lö betua niduru'ö mbara.
25. Awai zi so khöma hulö-hulö, awai zi so khöma dema-dema.
26. Hawu-hawu ndrögö töla ndraölö, ha hawu-hawu ndrögö manawa.
27. Ba lö fangoyo nafo fangami, lö fangoyo gambe nilata.
28. Awai zi so khöma bulu la'e, ba ha bulu magai garurua.

Tome:

Na no aefa wamaola zamaola no mege moroi ba zowatö, ba lalau mbude ira ina, da'ö nifotöi taba'ele. Faoma lafa'ema-ema ba gafuriata mbude ba lakaraini wa'iki, nifangeto-ngetou.

Ba da'ö sa göi oroma ndra ina ma sinöwu gana'a sonekhe ba gamaedola, awö ba hendrihendri, si tobali tanömö wa lakaraini wa'iki. Itaria göi ba fasamösa moroi ba dome (ina) zolau famaola wanema maola-maola zowatö no mege.

Ösi maola-maolania, ba isuno-suno nafo awö zumange nibe'e zowatö ba dome. Tafaigi ma'ifu duma-duma, wamaola fanema afo/tahö, nilau dome:

1. He ya'ita tome soroi sa, he ya'ita tome si tolata!
2. Ba dataŵa'ö gomusola dödö, sinemada nibe'e zonuza.
3. Me no tarugi mbulu newali, me no tarugi tou golayama.
4. Awena oi taboho wa'iki, awena oi sumöla wekaka.
5. Me no tanganga nafo zohadi, no tanganga lahina zonuza.
6. Da'ö nafo tenga si to'ölö, tenga mane afoda me föna.
7. Ba da'uzara-zara wamaholi, ba da'uzara-zara wangombakha.
8. Da'ö nafo si lima endronga, da'ö nafo si dua ba wonganga.
9. Zafeto mege gate me u'a, zafeto mege guto me unganga.
10. Hadia zoli-zoli famabaya, mege nafo si lima endronga?
11. Da'ö dawuo sini dawuo lara, da'ö dawuo ba lali manawa.
12. Da'ö dawuo sodoi gasi-gasi, da'ö dawuo sodoi lahumawa.
13. Tawuo sanöi lö manendre, da'ö dawuo sanöi lö anöita.
14. Irugi yaŵa langi dadaunga, irugi yaŵa luo bara'ata.
15. Hadia wamasoli famabaya, hadia wanewunia na ana'a!
16. Ya'ia mbetua tuturu hösi, ya'ia mbetua tuturu gara.
17. Da'ö mbetua nduru'ö nangi, da'ö mbetua niduru'ö mbara.
18. Da'ö mbetua uto mbaeŵa hösi, da'ö mbetua uto wela-wela.
19. Hadia wamasoli famabaya, famabaya nafoda lahina.
20. Ya'ia gambe nihaogö famanöi, da'ö gambe nihare nilata.
21. Hadia na wamasoli famabaya, famabaya nafoda lahina.
22. Ya'ia wino belu fino kawa, da'ö wino si sandrohu boha.
23. Fino sotalö zegezai böra, ba oi asoso zezai föria.
24. Tenga fogolinia heluaya, tenga fogoli wörögi mbola.
25. Fogolinia sa wa'iki-iki, fogolinia sa wekaka-kaka.
26. Hadia wamasoli zoli-zoli, hadia wamasoli famabaya?
27. Ya'ia mbago böwö bago huwa, da'ö mbago masire masira.
28. Bago nilölö nga'ukhu muko, bago nilölö bagi zotöra.
29. Me bago saukhu moroi ba lada, bago sondria moroi ba lahia.
30. Zi oi wö modegaölö zi manga, ba a'oi modolea zombambaya.
31. Da'ö hareda me no tabobo, mohare ita me no tanganga.
32. A'oi döhö zöndru döhö göha, a'oi döhö mböni saböu köla.
33. A'oi abölö zakela-kela, tola manunga zo'anakhöwa.
34. A'oi atulö li zaelo lela, oi fao gahe sobuko galaŵa.
35. A'oi awuyu-wuyu zatua, tola nilölö zadeha boha.
36. A'oi fagohi zi no atifa, atulö lege si tobabara.
37. Balazinia da'ö tandra-tandra, balazinia da'ö ila-ila.
38. Na no tanganga nafo lahina, moroi khö mburuti khö da'unga.
39. Afu-afugu na sa unganga, ena u'odöra u'ohe öma.
40. Ba da'uböhöli ua maola-maola, urugi ö wangomba-ngombakha.


Fabaliŵa lala[edit source]

Fanolo ba wanura: Lala wanuraFama'oli nösiNgawalö templatNgawalö kategori

Bale zato: OlayamaAngombakhataBawagöli zatoMonganga afoNahia wamakoriNga'örö spesialNgawalö wanoloSafuria tebulöSanandrösaSangai halöŵö