Wb/nia/Manu Sikuri ba Hambuhambu Sure

Ba zi samuza ma'ökhö meföna ba mbewe nasi Luaha Laraga ba Danö Niha, so razo Manu Sikuri ba razo Hambu-Hambu Sure fahuwu sibai ira. Faoma latolo nawöra ba ginötö moguna, he na ba wa'omuso dödö ba he na ba ginötö fangabu dödö, lö laröi nawöra.

Ba zi samuza inötö so wa'omuso dödö ba mbanua Luaha Laraga ba Danö Niha, ya'ia da'ö so zamalua owasa sebua. Imane Razo Manu Sikuri kö Razo Hambu-Hambu Sure, "He gawö, no lafatenge ndra'o ira Sanuhe ba wogaoni ya'ami. So khöda wa'omuso dödö si fitu ngaluo fitu bongi, tebörögö ba luo Kami ba nomo Zanuhe Balugu Namölö ba zinga mbewe nasi Luaha Laraga. Ohe fefu ndra talifusöu sifao ndra banuau. Latötöna wa möi ita fefu, he ya'aga Manu Sikuri ba simanö göi ami ngawawa Hambu-Hambu Sure. No lahönagö dahö sumangeda. Ba oya wamehi'a dödö nifalua simane maena, folaya, ba fanari. Möi ita gawö he!"

Wa'omuso dödö Razo Hambu-Hambu Sure ba duria nifa'ema Razo Manu Sikuri andrö. Imane Razo Hambu-Hambu Sure, "Möi ndra'aga, le gawö, mendrua manö ma ba ginötö duli mufalua gowasa da'ö, mangebua lowu möi yaŵa ba mbewe nasi nidanö nasi, alio ndra'aga wondrugi."

Itohugö Razo Hambu-Hambu Sure, "Hiza i gawö, so ni'andröma tolo khömi. Börö me mufalua gowasa da'ö i'otarai ba zima'ökhö irugi ba zibongi ba ofeta ba zahulöwongi, utötöna khömi, gawö, na no arakhagö moluo ba milau miwo sitobali tandra khöma wa ma'alio'ö wangawuli. Börö na no irugi ba zahulö, alö lowu ba tola tosake ndra'aga tebai mangawuli."

Itema li Razo Manu Sikuri, "Tola da'ö, gawö, tenga halöŵö sabua da'ö. No to'ölö ndra'aga manu silatao miwo na arakagö moluo. Böi mangiwa dödöu."

Me no irugi luo Kami tefalua gowasa sebua i'otarai ba zahulöwongi. Ba meno arakhagö aekhu luo ba no tohare mbaŵa sihaga moroi raya da'ö nifotöi tuli (fa'oroma mbaŵa afönu ba ebua). Lö tebato wa'atohare dome, fatete manö wolau bölihae, solau hiŵö, solau humba, ba solau folaya. Oi alua ngawawa zato zowanua moroi yöu, moroi raya, moroi ba gatumbukha ba moroi ba gaekhula.

Simanö göi tohare ngawawa Hambu-Hambu Sure. Me inötö ebua lowu afönu ira ba mbewe nasi ba luaha Laraga, oi mokiba nasi wa'oyara.

Omuso dödö fefu zangondrasi ya mendrua manö ba wamaigi ngawalö wamehi'a tödö nifalua ba gowasa andrö. Lö aetu labözi datawo, ba simanö göi lö aetu wemanga ngawalö gö ba idanö nibadu nibe'e ba dome soya sibai. Lö i'ila ahori ba oya zitegaölö tou saekhu ba nasi, ba latema'ö da'ö ira ngawawa Hambu-Hambu Sure irege abuso ira fefu. Ba zibongi andrö lafanunö Razo sifao fo'omonia, a'oi manari fefu niha sato ba wa'omuso dödö. Me no alaŵa mbongi ato niha serege tödö ba wa'abuso ba ba wa'amabu, ato zitegaölö ba nahia wedadao ba alau hörö. Lö la rasoi wa no arakhagö moluo. fefu ndra ngawawa manu silatao alau sibai höröra lö manö simiwo irugi moluo ofeta oroma haga luo. Ya mendrua manö ndra ngawawa hambuhambu Sure, a'oi tegaölö ira ga gawu nasi me lö la'ila wa no mangalö lowu, alua khöra wa'a mokhölö danö sifao fanaoka-naoka ba wogamö singa nasi si so idanö. Mofönu sibai Razo Hambuhambu Sure, si fao fangelifi, "Hezo Razo Manu sikuri sifao ndraono mbanuania wa lö miwo ira alai na la'odödögö wamunu ya'ita" Oya sibai Hambuhambu Sure si tosake ma site'u'u ba högö gara ba hatö waraö zitola mondrugi nidanö nasi, ha Razo Hambuhambu Sure ba mato ha'ga rozi nawönia zauri sondrugi asi.

Me no aukhu haga zino awena tokea ndra manu ba simanö göi niha sato, ba me lafakhölö ira ahöli sibai dödöra me no alö nasi, ba hiza göi ngawawa hambuhambu Sure a'oi manaokha-naoka afönu mbewe gawu. A'oi fahulö niha ba wangozaragö, La fa'anö bakha ba mbola-bola, ba so göi zo'owuloi ba zi'e ba bandraga. Oya zite'ala nono mbanua hambuhambu Sure. Andrö aukhu sibai dödönia khö razo manu Sikhuri, ilau fahö'ö ba dödönia.

Ibe'e goroisa khö ndraono mbanuania, wa i'otarai ma'ökhö da'ö aetu wa huwusada khö ndra manu sikuri. Na nami'ila möi ira molangi ba mbewe nasi, ba mifa'u'u ba mibunu böi mibe'e aefa he ha sarabura ba tanganga öda!

I'otarai da'ö, aetu wahuwusa ba famusu ma faudu sibai ira hambuhambu sure ba manu sikuri. Andrö wa i'otarai me luo da'ö irugi ma'ökhö, la'oguna'ö da'ö ira niha simöi fagai raewe hambuhabu, llahalö mbu mbagi manu silatao sikuri bu tobali lakhö hambuhambu sure. Andrö wa ahulu sibai zifagai hambuhambu sure na labali'ö lakhö bu mbagi manu sikuri. Moguna ta'ila wa nifotöi manu sikuri ya'ia da'ö bunia ogara-gara aitö afusi ba faruka zoyo ma sa'usö ma'ifu.

Tuho sinangea muhalö duma-duma ba manö-manö da’e:

1. Imane ba gamaedola: "Abe'e zazi moroi ba huku" eluahania böi talalöi zo no ta zazi ba nawöda faböi abao dödönia khöda ba tola möi tekiko wahuwusada ba zilalö.

2. Fa'abao dödö sabölo-bölo, Tekiko wahuwusa li ha börö wa'amabu, olifu ia zazinia ma so no ifabu'u ba nawönia.

Nifa'anö: Edison Zega A.Lewi

Nitöngöni

Omuso dödögu na öfazaewe nidunö-dunö andre ba media sosial ma Internet. Hiza i be'e fao gumbu heza tehalö ia. Be ba gahe zura: Moroi ba Wikibuku Nias. Nifa'anö Edison Zega A.Lewi. Aila ita ba niha na lö öbe'e gumbunia, me öhalö töiu zi tenga töiu.

Fabaliŵa lala

Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö