Wb/nia/Manö-manö Wofo Haidö

Tema hasamuza luo samuza inötö, so nono wofo so li-li ma si kio-kio lö situmbu nasa bu gafi balö mbu gi'o. Mangenu-ngenu ba mangandrö-ngandrö tolo ena'ö na so zahakhö tödö khönia no i'e zagö ba mbörö ndraha hogu geu sebua, töinia wofo haidö.

Zamuza ma'ökhö, tema tohare wofo usö i'ila sitou wofo haidö mo li-li ma mo kio-kio fao fangenu-ngenu irege ahakhö dödö wofo usö me i'ila wofo haidö si lö hadöi mbu ki'o ba lö göi bu gafi.

Andrö wö dania möi ikaoni wofo tanöbö'ö fofo usö ifakaoni'ö wötö, ifahede'e khö la'oro ba fofo tanöbö'önia.

Lalau mangosara ba wanoloni nono wofo haidö mege no. Maoso wötö ba ideha gafinia tanö ba gabera, simanö tanö ba gambölö; itaru'ö ba gafi nono wofo haidö. Simanö göi la'oro ibee mbu ki'onia; simanö nasa wofo usö idedeha mbu ba itanö ba mboto wofo haidö irege afönu sae ia bu ena'ö tola mohombo wofo haidö simane fofo tanöbö'ö

Meno mo afi wofo haidö ba mo bu gi'o ia, iborögö ifanari-nari gafinia ba ifaniri-niri gi'onia.

Samuza ma'ökhö ibörögö humombo ia ba ndraha geu tanö moroi tou. Meno irugi ifahasu ia ba ibörötaigö ifakhölö ia sa'ae.

Lö uzara-zara wanutunö, irege irugi yawa madulai. Fofo haidö zumagö awena i'ila zihaga mbanua, ibörötaigö ifasui mbolo mbenua wofo haidö.

Zamuza i hama'ökhö, mangawuli ba geu sebua wofo haidö no i'ezagö yawa madulai hogu geu. Zumagö manibo wofo haidö moroi yaŵa ahori ifiri fefu wofo tanö tounia.

Ya'ia  da'ö le balugu, lö uzara-zara wanudunö, afatö dödö fefu wofo fa'alai nagu, harumani sa'e wofo haidö andre ilau khöda nidanönia ha börö meno so ia yaŵa ba madulai.

Andrö dania ha samuza ha ma'ökhö ahori mofanö wofo nomege no laröi wofo haidö ba irugi sa'e lö murongo hewisa lua-luania wa'auri wofo haidö.

Ba manö-manö andre moguna sibai khöda ya'ita niha ena'ö böi tobali ita fofo haidö, olifu ita zolau si sökhi ba sanolo yaita.

Andö lamane ba gamaedola zatua föna.

Fa'a salaŵa mbosi nora
Fa'a satua ndrela mbombo
Ahakhö nitörö zihönö
Afatö hundra-hundragö zato.

Böi mumane
Lö fa'abila ba dumula
Lö fa'aköi ba la'ore
So manö ginötönia
Aekhu tobali adolu
Adolu ndraha geu simate.

Ya'ahowu

Umbu

Tehalö moroi ba gu'ö Telegram disura Nama Pasca