Wb/nia/Lakhambanua Sinumana

Manö-manö andre alua ba ginötö so Keriso awö felendrua nifahaö-Nia ba gulidanö. Mowaö-waö ira, latöröi mbanua dozi mbanua, simane nilau niha sito’ölö, irege samösa lö sangila wa da’ö Keriso awö nifahaönia si felendrua.

Samuza luo, ofeta ira ba zi sambua banua ba molombase ira, la’andrö ena’ö tola mörö ira ba nomo niha danö sebua okhöta ba mbanua andrö. Ba hiza, lö itehe mörö niha sato andrö, iwa'ö, “So bada’ö sisa samösa lakhambanua sinumana, mi’ae khönia, ba ba da’ö milau mörö.”

Me larongo da’ö, ba lalau ira ba nomo lakhambanua andrö la’andrö tolo ena’ö itehegö ira mörö ba nomonia. Lakha mbanua andrö ba numana sibai. Lö hadöi hada-hada’ia ba nomonia. Hatö safoto side-ide roti ba sagokhö darigu. So khönia sageu göi zaŵi, ba hiza lö nasa tola mufera zusunia.

“Ira ama fefu,” imanö lakhambanua andrö, “no ide-ide nomogu, lö hadöi nahami wolombase."

“Lö hana-hana ina. No tobönö khöma da’a ya’i,” latema li lakhambanua andrö.

Itema’ö domenia andrö lakha mbanua, heŵa’ae lö i’ila hadia ibe’e gö dome andrö.

“Hewisa wame’egu gömi, hatö safoto roti andre zi so khögu ba atö sagokhö hamo darigu. Sawi khögu ba lö nasa tola lahalö nidanö zusunia. U’andrö wa mibologö manö dödömi.”

Mohede Keriso, sangefa’ö niha ba horö andrö, “Böi ata’u ndra’ugö ina, fefu lö zi lö tobönö. Fefu hadia zi so khöu ba be’e manö. Fefu ita ta’a roti. Fefu hada’ia no moroi khö nama ba Zorugo.

Lalau modadao ba zalo, lalau manga. Fefu ira oi abuso moroi ba roti si safoto moroi khö lakhambanua. Ba hiza na’i, toroi nasa woha-woha roti andrö.

“Hiza ina, öŵa’ö mege wa tebai manga ita meno ide-ide khöu roti ba ha sagokhö darigu. Iada’e ba abuso fefu ita. Toröi nasa roti khöda. Fefu hada’ia no moroi khö Lowalangi.”

Aefa manga ira, ba lalau mörö ba nomo lakhambanua andrö.

Ba zihulö wongi mahemolunia, mohede lakhambanua andrö khö nakhinia ono alawe.

“Ae’e owuloi zitoröi hamo darigu khöda ena’ö tola tahaogö marataba ba tabe’e ö ndra tomeda.”

Mofanö nakhinia ba mangawuli i’ohe sambua karaŵa darigu. Tokea lakhambanua andrö, me lö itötöna wasimanö wa’oya ni’owuloi nakhinia. Ba ihalö darigu andrö ba ihaogö marataba ba ifaosa khö Keriso ba nifahaönia.

“Milau manga ua fatua lö mitohugö wofanö; ö si hamaífu da’a, buala Lowalangi,” imanö lakhambanua.

Me no aefa manga ira, ba mangona ira, latohugö wofanö.

Ba dalu lala, falukha ira sageu nasu gatua sohawu-hawu. Ifaköu ia mefalukha ia khö Keriso. I’andrö gönia me olofo sibai ia.

“He So’aya, olofodo. Be’e gögu,” imanö asu gatua andrö.

“Ae’e ba nomo lakhambanua andrö ba a khönia zaŵi ba ono zaŵi,” itema linia Keriso.

Tokea ndra nifahaö me larongo li Gurura andrö.

“Hana wa’öfaretakö si manö, So’aya? Lakhambanua andrö ba no itema’ö ita ba no ibe’e göda. Tötönafönia afu auri ira hatö ba gurifönia, saŵi. Idöna-döna afu mo’ono zaŵi khönia ba tola göi ifera’ö susu.”

Ba itema Sangefa’ö Horö andrö, ”No sinangeania simanö.”

Mofanö nasu gatua andrö ba möi i’a zaŵi lakhambanua. Me’i’ila lakhambanua zalua andrö ba lö mofönu ia.

“Yehowa zameʼe ba Yehowa zangai; nisuno döi Yehowa!”

Latohugö wofanö ira nifaha’ö. Ba dalu lala ba zo rumbi so’ösi kefe. Mohede Zangöhöli andrö, ”He rumbi, fagaölö’ö labu’ögö ba nomo niha danö sikayo andrö.”

Oi tokea ndra nifahaö. “He So’aya, hadia lö abölö sökhi na kefe andrö tebe’e khö lakhambanua sinumana? Niha danö si kayo da’ö no i’okhögö fefu gofu hada’ia.”

Ba itema lira Sangöhöli andrö, “No sinangeania simanö.”

Ifagaölö ia rumbi safönu kefe andrö, idölö ia ba nomo niha danö sikayo. Ba ihalö gefe andrö ba i’irö’ö. He ŵa’ae simanö ba lö manö fa’atobönö.

“Tola nasa ibö’ö khögu So’aya kefe zabölö oya moroi ba ziso bakha ba rumbi andre.” Da’ö zi so bakha ba gera-erania.

Mofanö zui ndra nifaha’ö lago’ö hezo manö möi Gurura andrö. Me luo da’ö ba aukhu sibai zino. Owökhi dödö ndra nifahaö.

“He So’aya, omasiga mamadu idanö,” lamanö ira nifahaö khö Keriso.

“Mi’ae ba lala da’ö,” ituturu khöra Keriso sambua lala fönara, “So ba da’ö hele, ba mibadu nidanö fa’alö wa owökhi dödömi.”

Möi ndra nifahaö ba hele andrö. Bahiza hele andrö no ta’unö sibai; motaimba, oi so gulö ba talaho bakha ba hele. Anuzu dödö ndra nifahaö. Lö alua labadu nidanö ba lafuli ira khö Zangöhöli.

“Hana walö mibadu nidanö hele da’ö?” isofu Keriso.

“So wösa hele Guru, ba hiza no ta’unö sibai, mamaigi manö ba ogoroga, mendrua manö sa’ae ba wobadu,” latema li-Nia ira nifahaö..

Lö itema lira Sangöhöli.

Latohugö zui wofanö. Ba ifuli zui owökhi dödö ndra nifahaö.

Ituturu khöra sambua hele. “Mi’ae ba da’ö, mibadu nidanö ena’ö döhö wa’owökhi dödömi.”

Möi ndra nifahaö ba oroma khöra so hele si sökhi sibai, oya geu ba zifasui hele. Oi manunö-nunö wofo, idanönia ohahau, okafu-kafu ba möi fangalö wa’owökhi dödö. Labadu nidanö andrö. Me no abuso ira, ba lafuli ira ba naha ibase’ö ira Keriso.

Me larugi, ba isofu khöra Keriso Sangöhöli andrö, “Hana wa’ara sibai ami?”

“Lö’ö ara sibai guru,” latema li-Nia ira nifahaö.

Imane khöra Keriso, “Ena’ö mi’ila no tölu fakhe wa’arami ba hele da’ö. Simane hele siföföna, simanö göi dania lua-lua wa’auri niha danö sikayo andrö. Hele safuria simöi ami, da’ö duma-duma wa’omusö dödö nitema lakhambanua sanolo ya’ami.”

Nifa'anö: Mestika Hulu

Nitöngöni

Omuso dödögu na öfazaewe nidunö-dunö andre ba media sosial ma Internet. Hiza i be'e fao gumbu heza tehalö ia. Be ba gahe zura: Moroi ba Wikibuku Nias. Nifa'anö Mestika Hulu. Aila ita ba niha na lö öbe'e gumbunia, me öhalö töiu zi tenga töiu.

Fabaliŵa lala

Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö