Wb/nia/La’izu Ana’a

La’izu Ana’a andre ya’ia da’ö manö-manö nidunö-dunö ndra satua meföna, da utunö khöda:

So samösa ndra’alawe satua ba zi sambua banua meföna töinia Awega’i niha sibasaki sibai. No ara idö’u-dö’u enaö so nononia. Imane ba dödönia “Ha wa’owua-wua dödögu mena’ö na so khögu ndraono ba wa’atuagu andre, simöi awögu ba si tobali sanolo ya’o solului halöwögu.”

Me baginötö awai khönia wamatö bulu gowi molombase ia ilau modadao ba nose, ba hiza ba zi lö mutötöna mohisi danö ba zifasui ya’ia, wa’atokeania tohare nadaoya sebua fönania, lö awawö wa'ata'u Gawega'i wamaigi Nadaoya. Mohede Nadaoya sifao fa’igi khö Awega’i imane, “Na omasiö ndraono ba tola ube’e khöu, hiza’i na no irugi siwa fakhe ia dania ba öbe’e ia khögu ubaliö ia diwogu.”

Wa’omuso dödö Awega’i, he wa’ae lö i’ila hezo i’otarai nadaoya da’ö, bahiza i börö me no ara idö’u-dö’u wa so khönia ndraono, andrö wa itehe ba fawu’uli ia wa fao dödönia ba niwa’ö Nadaoya.

Börö me no fatema ba dödö Gawega’i, andrö ibe’e Nadaoya sambua hunö la’izu ba danga Awega’i, iamane: Tanö hunö la’izu da’e, ba na no ebua ba oya mbuania dania, ba tumbu khönia dania mbua sebua, ba öda’ida’i wanila me so dania ndraono bakha khönia, ba örorogö ö’ebua ia, sitobali ngoni-ngoiu dania.

Itema hunö la’izu da’ö Awega’i, ba me no mofanö Nadaoya ba i’alio’ö möi ia itanö ba danö saitö satabö sinanö. Ha tölu wongi aefa da'ö no tumbu nono la'izu khö Gawega'i, wa'omuso dödönia. Ha sara waŵa wa'ara no ibörögö mo bowo ba mowua la'izu khö Gawega'i, tenga sisökhi wa'oya mbua, ba so sambua mbua sebua sibai a'usö gulinia. Me no ebua ba iteu mbua la'izu khönia Awega'i, i'owuloi obe ba döwa. ba bua sebua nomege ba itema ida'i-dai wanila. Me no asila, wa'atokea Gawega'i wamaigi nösi la'izu, fakoha ndraono si so bakha ba la'izu ono alawe sowa'ewa'e wa'asökhi zikhala. Lö iradö iangai'ö ba i'ohe yamo, ba irorogö irugi ebua-bua. Ifatörö döi nono andrö La'izu ana'a me tehalö ia moroi ba mbua la'izu. La'izu Ana'a tedou todege ebua, tobali ono alawe sisökhi omböila, ba so'ölö-ölö ba wohalöŵö, i'odödögö sibai wofalua halöŵö ni fotöi Gawega'i khönia. Samuza inötö me no lima fakhe fa'ebua La'izu Ana'a, tohare Nadaoya ba nahia Gawega'i, me tohare ia oi modögö danö ba mbeka gahenia, moloi La'izu Ana'a ibini'ö ia ba narö naha wemöröra. Mo'ao ia "He Gawega'i hezo nono da'ö si no özazi khögu meno? Omasido uhalö ia ögu. I'alui lala Gawega'i enaö lö ihalö nono andrö Nadaoya. Wa'alio Gawega'i we'amöi baulu faluhka khö Nadaoya, ya'e ndra'o Nadaoya, u'andrö khöu böi ua öhalö nono da'ö, no ede'ide ia nasa lö ami na'ö'a, baloi ua dua fakhe tö enaö tedou wa'ebua nia, enaö ami ba mbörö mbohamö na'atö. Fao dödö nadaoya ba nkiwaö Gawega'i, imane "Lau na simanö ubaloi dua fakhe tö, uwaö khöu böi limodo he, na falimö ndra'ugö ba ya'ugö niagu. Me no iwa'ö da'ö ilau mofanö Nadaoya mangawuli ia ba nahania.

Moroi furi Nadaoya, mangera-ngera Awega'i hewisa lala ena'ö böi alua ihalö Nadaoya andro khonia nono sotöi La'izu Ana'a. Simanö göi Laizu Ana'a si no maminiö ya'ia ba narö naha wemörö, manizinizi dölania wamondrongo huhuo Nadaoya khö Gawega'i. Hatö dua fakhetö ginötö ba tohare zui dania Nadaoya ba wemangan La'izu Anaa. Maoso Gawega'i. i'ohe La'izu Ana'a khö Gere Göba sebua elemu, itutunö ngarö-ngarö dödönia. Imane Gere Göba böi busi dödömi ube khömi wama'ala Nadaoya andrö. Lö abua wangandrö saohagölö, ha tölu ngawua lawugalö satua, mi'ohe khögu ba ube'e khömi göi dalia botowa wama'ala Nadaoya na tohare ia ba zi dua fakhe tö. Omuso sibai dödö Gawega'i, imane Saohagölö amagu Gere Göba, tölu waŵa to moiga ba da'a khöu. Meno mangawuli Gawegai ba nomonia ba ihalö hönia danömö lawugalö ba möi ia itanö ba gaotö si so ba nowinia. Ha ambö tölu waŵa no mowua bua soya. ifili tölu ngawua bua zsegebua si sökhi omböila ba satua, moi ira la'ohe khö Gere Göba. Me no la rugi khö Gere Göba labe'e khönia lawugalö si sökhi si tölu ngawua ni ohera. Imane Gere Göba lau Gawe Ga'i böi busi dödöu da uhaogö göba sama'ala Nadaoya andrö dania na tohare ia. Ibe khöra sambua löwölöwö nasio kara, sambua löwölöwö walölöwa, ba sambua löwölöwö dai gelewazi sombuyu. Lala wamalua ya'ia, simane:

Na tohare Nadaoya na mi'ila ia moroi ba zaröu, ba mifazawili nasio föna nia, alua dania nasi sokiba samambambö ya'ia moroi khömi. Ba na lö'ö mokambila khönia da'ö ba mifazawili walölöwa sitobali tafa-tafa lewuö sifaekha si tola manöla'ö ahenia. Ba na lö mokambila khönia zui khönia ba ya'e dai gelewazi sombuyu sambua löwölöwö ötibo'ö föna nia, ba tobali dania la'uri sabakha ba fakitö gahe Nadaoya tebai ifazawa gahenia. Me no aefa latema ba labe'e ba mbolambola zi tölu löwölöwö göba da'o, ba mangona ira khö Gere Göba, ba mangawuli ira ba nomora, omusa dödö La'izu Ana'a ba simanögöi Gawega'i.

Me no irugi dua fakhe, tohare Nadaoya idölö ia ba nahia sitoröi Gawega'i. Ba zahulö wongi mosikhi danö ba zifasui omo Gawega'i, da'ö dandra wa no tohare Nadaoya. mu'ao Nadaoya imane " He Gawega'i, hezo La'izu Ana'a be ögu ia, no akao ndra'o wombaloi dua fakhe wa'ara. Fatenge ia baulu." Itema Gawegai "Lau da ukaoni ia ua, ba u'ohe ia khu baulu" Gasa-gasa da'ö wa'alio La'izu Ana'a wanga'i zi tölu ngawua löwölöwö nine'e Gere Göba khönia, me irugi baulu, ifazibo löwölöwö nasio, izumaigö tobali asi sebolo föna Nadaoya. Tokea Nadaoya me i'ila Laizu Ana'a, no owa'ewa'e si sökhi omböila, ba iza me edöna ihalö ba no awai tohare goloro nasi so mba'agö yaia, andrö fakhamö moloi La'izu Ana'a, ilau ia miraya. Igohi ia Nadaoya, me arakhagö ikhamö, ifazaumba löwölöwö walölöwa La'izu Ana'a, izumaigö so zukha-sukha lewuö satarö no faekha föna Nadaoya, a'oi mesokho gahenia aduwa ndronia. Ba he wa'ae no a'oi mesokho gahe Nadaoya ba tafa-tafa ma sukha-sukha lewuö andrö, ba lö olohi ia igohi La'uzu Ana'a. Mangelifi ia ba dödönia, hana wa fa'erao ndra'ugö ono silako, he awai urege ba ha sambalö dali u'a ndra'ugoö ma'ökhö da'a. me no ahatö tosasa ba gahe hili La'izu Ana'a andrö ifazaumba löwölöwö dai gelewazi sombuyu föna Nadaoya, ahou zamö'i alua dambu la'uri sifakitö sitobali fama'ala enaö te'umu gahe Nadaoya, fakitö tebai aefa, lö i'ila ifageha ia, abu dödönia, andrö mo'ira ia we'ao isösö danö, "tolodo...!" Ba lö simöi manolo ya'ia, irugi ahöndrö Nadaoya ba dambu la'uri sabakha andrö, hatö högö zoroma. Ba gafuriatania alömö fefu mboto Nadaoya ba mate ia. Andrö wa irugi iada'a lö sa'e oroma Nadaoya ba Danö Niha. Omuso dödö Gawega'i ba ya mendrua manö La'izu Ana'a no aefa ia moroi ba wa'amate, lö alua tobali ö Nadaoya ia. Fatalagu bagi ira Gawega'i ba La'isö Ana'a faoma alua nidanö höröra ba wa'omuso dödöra Mangawuli ira ba nahiara sifao fa'omuso dödö ba wanohugö lala wa'auri. Saohagölö

Tuho sinangea muhalö duma-duma ba manö-manö da’e:

1. Imane ba gamaedola: "So wofo yaŵa mba'e" eluahania böi osiwawöi niha bö'ö simane nilau nadaoya.

2. Na so zabu dödömö böi lau zahono, ae sofu ba zangila mamolala horömö.

Nifa'anö: Edison Zega A.Lewi

Nitöngöni

Omuso dödögu na öfazaewe nidunö-dunö andre ba media sosial ma Internet. Hiza i be'e fao gumbu heza tehalö ia. Be ba gahe zura: Moroi ba Wikibuku Nias. Nifa'anö ???. Aila ita ba niha na lö öbe'e gumbunia, me öhalö töiu zi tenga töiu.

Fabaliŵa lala

Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö