Wb/nia/Howu-Howu Lowalangi Mangumbu ba Ngawalö Hadia Ia

Ba ginötö föna, ba zisambua banua bakha ba zisambua amatöröŵa, so darua niha sangahalö ba danö, sotöi Ivan ba Naum. Noa sa sihasa-hasara dödöra ba sifao-fao manö ira ba wangalui halöŵöra. Me no ara latörö danö saröu, ba larugi sambua banua si no fahöna hadia ia. Lalau mohalöŵö khö zokhö halöŵö si fabö'ö. Me no samigu wohalöŵöra, ba awena falukha ira luo Migu.

"Ha'uga nitemamö talifusö?" fanofu Ivan.

"No itolo ndra'o Lowalangi lima rubel," fanema Naum.

"Hewisa wa öŵa'ö Itolo ndra'ugö? Moroi ba mbua wohalöŵöu wa tola ösöndra da'ö."

"Tenga ya'ia khöu da'ö talifusö. Na tenga howu-howu Lowalangi, lö hadöi fa'abölöda ya'ita niha. Mendruamanö sa'ae ba wangalui kefe si ha ma'ifu, no sa si tebai ita."

Ba lalau fada'aŵa ba da'ö, irege lahalö gangetula.

"Fabali ita. Niha si föföna falukha ita, da'ö zangila niha satulö ba gotaluada. Gofu haniha zi sala, ibe'e fefu hadia ia zi so khönia ba zatulö."

Me mofanö ira mato lima mbeka-beka, falukha ira samösa niha ya'ia mbekhu si ra'iö sihulö khala-khala niha. La'andrö mbua wangera-ngerania.

"Hadia nisöndramö moroi ba halöŵö dangamö da'ö sa zatulö. Böi manötöna ndra'ugö khö Lowalangi," fehede mbekhu. Ba ibe'e fefu gefenia Naum khö Ivan, ba mangawuli ia wohalöŵö.

Samigu aefa da'ö, falukha ira ba lalau fada'aŵa. Imane Naum, "Heŵa'ae na no öhalö gefegu me migu si lalö, faduhu dödögu wa töra wonönö Lowalangi khögu ba migu da'a."

"Na simanö, tafuli tasofu ba niha si falukha ita da'ö. Gofu haniha zi sala, tenga ha kefenia ilulu, hiza'i ibe'e aetu dangania kambölö," fehede Ivan. Fao dödö Naum.

Ba lala, falukha zui ira mbekhu sira'iö andrö, ba itema lira mane wanemania me samigu no. Ba hiza me sala Naum, ba ibe'e fefu gefenia khö Ivan. I'eŵa danga kambölö Naum Ivan ba iröi ia ba da'ö.

No tamanu manö Naum. Hewisa manö wangalui önia me lö hadöi tangania kambölö? Bahiza wa'ahakhö dödö Lowalangi, Ibokai dödö Naum. Ba mofanö Naum ba ngöfi nidanö ba ileagö ia ba dundraha si so ba da'ö.

"Ulau ua molombase ba da'a. Mahemolu mbanua u'alui lala. Abölö sökhi na mu'angeragö ia mahemolu ba zihulöwongi moroi ba zibongi andre," fehede Naum.

Me irugi talu mbongi, oya mbekhu sangondrasi ba sowulo ahatö ba dundraha andrö, ba lahöni-höni wa'abölöra ba wamaelungu niha.

Imane bekhu si föföna, "Noa sa ufa'udu darua niha sangahalö ba danö, ba fa'awö ndra'o ba zi sala. Iada'a ba no mu'ewa danga niha satulö."

"Tenga famaelungö sebua sibai da'ö khöu", fehede mbekhu tanöbö'ö. "Na ifangewe tölu kali dangania ba dete namo, ba ifuli mangali dangania."

Ba imane göi bekhu ganete zi dua, "No ube'e göi marase samösa nono'alawe ono zalaŵa irege lö i'ila maliŵa."

"Halöŵö saoha sibai da'ö khöu", fehede mbekhu bö'ö. "Halö atö dalu-dalu da'ö (ituturu mbulu zinanö si so ba ngöfi nidanö), ba örino ia. Aefa da'ö ba fabadugö khönia, hasambalö si döhö ia."

Ba imane bekhu ganetenia, "So samösa niha samazökhi ba'a nidanö. Ero ifo'ösi faoma idanö, ba hasambalö mangumbu baero nidanö börö me no ufazökhi dögi-tögi ba mba'a andrö."

"Hadia sa'ae wa lö tödö zokhö ba'a da'ö?" fanema mbekhu bö'ö. "Ihaogö manö ya i wombalo tögi andrö. Na inötö mangumbu baero nidanönia, ibe'e manö samböbö gulitö balo-balonia. Na i'ila da'a mena'ö, ba lö eluaha wamaelungu da'ö khöu."

Ba no ifondrondrongo fefu ngawalö nifatunöra Naum. Moluo mahemolunia, ifangewe dangania ba dete namo, ba ifuli mangali dangania. Ihaogö dögi-tögi mba'a, ba ifadöhö nono'alawe si lö maliŵa mege no. Si tobali fangandrö saohagölö ba labe'e khö Naum gefe sebua sibai, irege lö mo'amböta ia.

Samuza ma'ökhö, falukha ia khö Ivan. Tokea Ivan me i'ila Naum.

"Hewisa lala wa tola kayo ndra'ugö? Ba hewisa wa tola mangali dangamö?" fanofu Ivan.

Ba ifatunö fefu nifaluania Naum, lö ibini'ö khönia. Ihaogö wame'e mbörö dalingania Ivan ba mangera-ngera ia. "Da ulau zimane nifaluania. Töra na atö wa'akayogu moroi khönia na u'ila lalania."

Ba ifazaŵa ia Ivan. Ilau ia ba zinga nidanö, ba ilau mörö ba da'ö.

Ba hiza me talu mbongi, owulo mbekhu andrö ba faoma lamane, "He talifusö, alai na so niha zamondrongo amatunöŵada andre. Mifaigi danga zangahalö ba danö da'ö, no mangali. Noa göi döhö nono'alawe nifakaoda, ba no tola muhaogö dögi-tögi mba'a."

Manahö dödöra ba dundraha andrö, ba lalau ira ba da'ö. Lasöndra Ivan, ba lasasawi mbotonia tobali igide-ide.

Nifa'anö Tiru Zendratö. Tehalö nidunö-dunö andre moroi ba Rusia.

Nitöngöni

Omuso dödögu na öfazaewe nidunö-dunö andre ba media sosial ma Internet. Hiza i be'e fao gumbu heza tehalö ia. Be ba gahe zura: Moroi ba Wikibuku Nias. Nifa'anö ???. Aila ita ba niha na lö öbe'e gumbunia, me öhalö töiu zi tenga töiu.

Fabaliŵa lala

Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö