Wb/nia/Hoho Baru Nila'a Nibira Baru Ninada Barasi Saota

From Wikimedia Incubator
< Wb‎ | nia
Wb > nia > Hoho Baru Nila'a Nibira Baru Ninada Barasi Saota

HOHO BARU NILA'A NIBIRA BARU NINADA BARASI SAOTA.

Talu ma'ökhö mohaga zibaya,
ba zi ma'ökhö mohaga luo.
Iŵaö Malio Sibaya Mbaŵa,
iŵaö Malio Sibaya Luo.
Khö galawe Siwaria Walangi,
khö galawe Siwaria Luo.
Ba wola'a nukha Mbarasi Saota,
wola'a nukha nina Tuho nomo.
Ba maoso Ziwaria Walangi,
maoso Ziwaria Luo.

Ihalö gama-gama famo'indrö,
ihalö gama-gama fanumbo.
Isua nukha nina Barasi Saota,
ila'a nukha nina Tuho nomo.
Isia'aigö khönia gu'i nibira,
iföfönai'ö götö sebolo.
Ibe tane'a zotöra walangi,
ibe tane'a zotöra luo.
Da'ö zotöra, oroma satua,
da'ö zotöra uwu gasumbo.
Tane'a hiro, zotöra sa'usö,
töla hulayo zo'uli mbowo.
Ibira zinga ngenge nue sinasa,
bira ba ngai ngenge dabai'oyo.

So la'ala'a sowulu nesitö,
so la'ala'a sowulu zilimo.
Itewu mbira songenge magai,
badöbadö magai sanekaoro.
Ila'a ö, soyo mane oroma,
ibe fo'indrö zoyo kasumbo.
A'oi ihure songenge zisikhu,
ifo'ora ngenge dabai'oyo.
Nila'ania, so'arö mbulu damo,
nila'ania, mane betua nafo.
Ifobosia mane sa'usö gadulo,
ifotawöla so'uli mbowo.

Balö sisindrö mafi ba gabera,
ila'a, töla so'uli mbowo.
Ba fobira zotöla zisikhu,
fobira ngenge dabai'oyo.
Itewu songenge magai,
sobadö laehuwa sanekaoro.
Zi oi ila'a ö, sawai oroma,
zi oi ila'a uwu gasumbo.

Töla hulayo, soböwö dalö,
töla hulayo, so'uli mbowo.
Ba me no fitu bongi ba wola'a,
me no fitu bongi wangehao.
Awena maulu, me afusi wali,
awena awai, bongi asioho.
Molombase Ziwaria Walangi,
molombase Ziwaria Luo.
Me no alua haga zibaya,
me no alua haga luo.

Ifuli khönia ba mbate'e hösi,
ifuli ia ba gaekhula mbaŵa,
ba hili gaekhula luo.
Itohugö Siwaria Walangi,
itohugö Siwaria Luo.
Ila'a gawi böbö löwilöwi,
ila'a gawi böbö lafoyo.

Sara zatöla sobu wofo'usö,
da'ö gawi so'uli mbowo.
Ba sara zatöla uwu gorona,
awi da'ö soyo mokasumbo.
Za'oi ila'a ifo'indrö'indrö,
za'oi ila'a ifohulayo.
Ba zinga morohia'ö fa'enau,
ba ngai morohiaö fa'ebolo.
Za'oi bira songenge magai,
bira sobadöbadö lakhumo.

Mafi ba ngai, saita nuwu zaraina,
ba wanataigö balaota mbago.
Ba saita raeweraewe ana'a,
fanaitagö raeweraewe hamo.
Oi ele'ele wa ina mbanua,
oi ele'ele wa samaeri sato.
Me lö faute dödö ba wobanua,
lö faute dödönia ba mbarahao.

No ifanila adulo waolomasi,
ifanila adulo dödö wendroro.
Maoso zui nina Siwaria Mbawa,
maoso nina Siwaria Luo.
Ifaoso zui gama-gama fola'a,
i'owuloi wo'indrö fangehao.
I'indrö mbaru nina Bawaulu Mbatö,
ila'a mbaru nina Tuho nomo.

Baru ninada Barasi Saota,
baru nina Barasi Embo.
Ibe tane'a zotöra walangi,
ibe tane'a zotöra luo.
Da'ö zotöra, sobowo sangölu,
sotöra mane soyo gadulo.
Sotöra sa'usö mane ana'a,
sotöra sa'usö mane hamo.
Da'ö nifo'indrö me ifola'a,
da'ö ni'indrö ifohulayo.

Bira dötö'a songenge magai,
ifaogö zongenge dabai'oyo.
Ibe tane'a hulayo fasui,
ibe tane'a hulayo mboto.
Sotöra soyo uwu gorona,
da'ö sotöra uwu gasumbo.
Za'oi i'indrö i'otarai gahe,
numalö ba mbölökha ta'io.
Za'oi ifohambula famohaga,
zawai löfö-löfö na humombo.
Ibe ba hulu gangerata mböwö,
ibe ba hulu wangerai wukho.

Famaedo döla zigaru dora'a,
famaedo mbosi duha terongo.
Ifaogö wola'a lembe falangi,
ifao wola'a lembe wanaho.
Da'ö lembe soyo uwu gorona,
lembe khönia uwu gasumbo.
Ibe humba ba mbalö fatambai,
böna luo so'uli mbowo.
Ifohulayo zinga wa'enau,
ifohulayo ngai wolowolo.
Hulayo mböna, ana'a barasi,
hulayo mböna luo böna hamo.
Ibe ba mbalö mbara'a sohunö,
afu oi rumiti na manaho.

Na ifanari zaembunia ana'a,
na ifanari zaembunia hamo.
Saembu ana'a si fulu tugela,
da'ö zi siŵa bowo zikho.
Bö'ö lembe na mamaola lahina,
bö'ö lembe na mamaola afo.
Lembe falangi sowulu nesitö,
da'ö lembe sowulu zilimo.
Lembenia si so falu ba mbalö,
si so falu, famaiwö wamondro.
Ena na so zolau fehede bude,
ma fehede ba mbawa lö tumulo.

Mufaudugö khönia walu sörömi,
fa i'ila linia si lö boto.
Fa böi humufa ndra ono matua,
fa böi humufa ndraono latano.
Wanenawa fehede si lö göna,
wanegu bude wa lö ngaroro.
A'oi da wangenanö ndra ina,
da'ö wangenanö nina zato.
Fa lö endrahö niha si lö su'a,
ba böi endrahö zi lö ngaroro.
Ba bö'ö i lembe wamaondragö tome,
bö'ö lembe wamaondragö sato.

Tome salua ba mbulu golayama,
tome salua ba mbulu zebolo.
Lembe da'ö so'arö mbulu damo,
da'ö lembe safusi mane muko.
Wangoroma'ö fa'afusi dödö,
wangoroma'ö fa'afusi mbo.
Zi oi ni'indrö so'idanö höwa,
oi ni'indrö sobowo da'oro.
Wangoroma'ö böwö masi-masi,
ba wangoroma böwö fa'ehao.
Wa faolomasi böwö fa'ehao.
Wa faolomasi mufaewua-wua,
tödö no mufanila adulo.
Wa oi emali dome so ba lala,
ba ono luo i na so yomo.

Andrö yaŵa Ina Barasi Saota,
andrö yaŵa Ina Tuho Nomo.
Sahuwa ae ba wamaeri ngahönö,
sahuwa ae ba wamaeri sato.
Zi oi i'oniagö wonahia,
zi oi ifonahia wanaro'o.
Khö nina Siwaria Mbawa,
khö nina Siwaria Luo.

Wola'a nukha niha ba mbatö,
wamola'a nukha niha sato.
Morohiaö fetaro wamola'a,
morohiaö taroma wangehao.
He nukha mena'ö na mofanö,
nukha mbene'ö sawena so.
Za'oi ifo'atö wamongaoma,
za'oi ifo'atö wangaso.
Fa lö elungu zi bohou ebua,
fa lö elungu zi hino mboto.
Fa lö lawaö, iraono ae zatua,
fa lö lawaö, satua na sa ndraono.
Da'ö goroisa gere wobanua,
da'ö goroisa gere mbarahao.

Saohagölö..
Moroi khö zatuada
Ama Pasca Telaumbanua
Nisura me 10 Juli 2022


Fabaliŵa lala[edit source]

Fanolo ba wanura: Lala wanuraFama'oli nösiNgawalö templatNgawalö kategori

Bale zato: OlayamaAngombakhataBawagöli zatoMonganga afoNahia wamakoriNga'örö spesialNgawalö wanoloSafuria tebulöSanandrösaSangai halöŵö