Wb/nia/Hikaya Arakane
Ba ituhi danö föna wakake zinagunia Arakane. Isusu mbana ba ibali'ö khoi-khoi zinagu si sökhi. Ba wohalöŵönia, ba ihokhe-hokhe me ilau lailö sangomusoi'ö tödönia. Dozi niha moroi ba mbanua da'ö ba he ba mbanua zaröu, möi ira mangondrasi ya'ia ba wamaigi fa'asökhi zinagunia. Omasi sibai Arakane me lafatunö-tunö niha wa'onekhenia, ba hiza lua-luania ibali'ö fa'asilöyaŵania.
"Tola uhaogö zinagu si sökhi moroi khö Atena." fehede fa'asilöyaŵania khö samösa ndra'alawe satua.
"Hussh, tola manö irongo wehedemö da'a Atena," ngöngö ndra'alawe da'ö.
"Lö manö ibe'e dödögu," fanema Arakane.
No sa la'ila niha sato wa hadia ia gamatunöŵa zi fakhai ba zokhö fa'abölö tobali sikho. Na larongo hadia ia zi lö omasi ira, ba tola lahuku niha.
Ba i'oroma'ö ia Atena föna mbawandruhö nomo Arakane. Ilau manaoka Arakane ba ituhi danö ba ifaöga högönia föna Atena.
"Hulö urongo ötöi-töi döigu," fehede Atena. "Da'ö wa so do ba wamaigi sinagumö." Iboho mbawania me ilau muhede Atena, ba hiza no i'abua-bua'ö linia. A'oi ata'u niha si so andrö. Ba ifaigi zinagu Arakane Atena. "Sindruhu sa wa si sökhi sa zinagumö," fehedenia.
"Hadia tola öhaögö töra sökhi moroi ba da'a?" fanofu Arakane.
"Da tafaigi," fehede Atena. "He ya'o ba ya'ugö, talau wahulösa ba wangehaogö sinagu si sökhi, ta'ila na atö dania zabölö sökhi."
Ba lahenagö ira föna wakake wanagura zamösana, ba lalau managu mato ha'uga ngaluo. La'oguna'ö mbana si so la'a-la'a sohaga ba lahaogö khoi-khoi zinagu sabua sibai. Ba hiza no awai zinagura. Faoma laheta moroi ba wakake zinagura ba faoma lafasinga. Tohare niha sato ba wa'ahöli-höli dödöra ba latandraigö la'etu'ö zinagu sabölö sökhi.
Lö hede Athena me ifaigi zinagunia awö zinagu Arakane, ba aefa da'ö ilau fabötu-bötu. Heŵa'ae lö irai fatema ba dödönia, i'ila sa wa no abölö sökhi zinagu Arakane moroi ba zinagunia. Idöni zinagu Arakane ba irawi. "Börö me onekhe ndra'ugö wanagu, ba tobali sa'ae sanagu ndra'ugö sagötö tanö ba lö hadöi irai so niha somasi mamaigi sinagumö," fo'aonia khö Arakane si no ata'u.
Ba ida'i-da'i wamözi alisi Arakane, ba izumaigö aekhu Arakane tou ba zalo. Lafaigi Arakane niha sato ba wa'ata'ura me la'ila ia tobali kalaŵa, si ŵalu ngawua ahe, ba samini'ö ya'ia ba nahia sogömi-gömi. I'otarai da'ö, Arakane ba nga'ötönia mangehaogö sinagu-sinagu si sökhi. Tola mi'ila zinagura, ya'ia gu'öra si takile na göna namo mbanua sihulöwongi.
Nitöngöni
[edit | edit source]Omuso dödögu na öfazaewe nidunö-dunö andre ba media sosial ma Internet. Hiza i be'e fao gumbu heza tehalö ia. Be ba gahe zura: Moroi ba Wikibuku Nias. Nifa'anö ???. Aila ita ba niha na lö öbe'e gumbunia, me öhalö töiu zi tenga töiu.
Fabaliŵa lala
[edit | edit source]Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö