Wb/nia/Halöŵö Zinenge/8/Enoni razo, moroi ba danö Ndrawa saitö
26 IV. Ba muhede malaʼika Zoʼaya khö Wilifo, imane: Faoso, ae miraya, ba lala andrö, si otarai Yeruzalema, saekhu ba Gasa, sanörö tanö si mate.
27 Ba maoso ia, möi ia. Ba hiza niha, Dawa Gaitiofia, salaŵa, mandru yomo, khö Kandrake, razo Ndrawa Gaitiofia, ira alawe, nibeʼe barö mbawa anaʼa razo fefu; no möi ia mangandrö ba Yeruzalema. [1]
28 Ba mangawuli ia, dumadao ia ba guretania, mamaso sura Yesaya, samaʼeleʼö andrö.
29 Ba imane Eheha khö Wilifo: Ondrasi gureta andrö, ba böi röiröi ia.
30 Ba fagohi Wilifo, iʼondrasi ba irongo, mamaso sura Yesaya, samaʼeleʼö, niha andrö, ba imane: Hadia, aboto göi ba dödöu nibasomö?
31 Ba imane: He uwisa sa, na lö samobawa lala khögu? Ba iʼandrö khö Wilifo, möi ia yaŵa mudadao ba ngainia.
32 Ba si mané ba zura andrö, nibasonia: ”Hulö mibiri-biri teʼohe ia ba wanaba yaʼia, ba hulö nono mbiri-biri, si lö hede-hede ba danga zoguti bunia, si manö göi wa lö hede-hedenia. [2]
33 Ba waʼideʼidenia teʼetuʼö wanguhuku yaʼia; ha niha zanutunö ngaʼötönia? teheta sa ba guli danö nosonia.”
34 Ba itema li mandru andrö, imane khö Wilifo: uʼandrö khöu, ha niha nitörö li zamaʼeleʼö andrö, wangumaʼö daʼö? hadia, yaʼia, hadia niha böʼö?
35 Ba muhede Wilifo, iʼotarai zura daʼö, ituriagö khönia duria somuso dödö andrö, khö Yesu. [3]
36 Ba me latörö lala, ba larugi nidanö, ba imane mandru andrö: Hiza nidanö! Hadia wanenaŵa, na tebayagö idanö ndraʼo? [4]
37 Ba imane Filifo: Na ahori dödöu wamati, ba tola. Itema linia, imane khönia: Mamati ndraʼo Ono Lowalangi Yesu Keriso andrö. [5]
38 Ba iŵaʼö labadugö gureta, ba möi ira tou, ba nidanö, darua ira, Filifo mandru andrö, ba ibayagö idanö ia Filifo.
39 Ba me no möi ira miyaŵa moroi ba nidanö, ba iheta Wilifo Eheha Zoʼaya, ba löʼö saʼae iʼila ia mandru andrö; omuso sa dödönia, ba wanörö lalania. [6]
40 Ba ba Gasoto tesöndra Wilifo, ba itöröi danö wanuriagö turia somuso dödö andrö, idozigö banua, irugi Kaizaria. [7]
(Halöŵö Zinenge 8:26-40)
Famotokhi ba gahe[edit | edit source]
- ↑ (Sal. I. 8, 41. Sef. 3, 10. Yoh. 12, 20)
- ↑ (Yes. 53, 7. 8)
- ↑ (Kor. I. 15, 3 b. t.)
- ↑ (F. 10, 47)
- ↑ (Mar. 16, 16. Mat. 16, 16)
- ↑ (Sal. I. 18, 12)
- ↑ (F. 21, 8. 9)
Faza 8: Igohi mbanua Yesu Saulo (1-3) | Möi ba Zamaria Wilifo (4-8) | Simoni, sebua elemu (9-25) | Enoni razo, moroi ba danö Ndrawa saitö (26-40)
Fabaliŵa lala[edit source]
Fanolo ba wanura: Lala wanura • Fama'oli nösi • Ngawalö templat • Ngawalö kategori
Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö