Wb/nia/Halöŵö Zinenge/2/Huhuo Wetero andrö

From Wikimedia Incubator
< Wb‎ | nia‎ | Halöŵö Zinenge‎ | 2
Wb > nia > Halöŵö Zinenge > 2 > Huhuo Wetero andrö
FAZA 2

14 II. Ba maoso Wetero, awö zi felezara, muhede ia, imane khöra: He yaʼami, niha Yehuda, awö zi so ba Yeruzalema fefu, yaʼaboto ba dödömi daʼe, ba mifondro-ndrongo niŵaʼögu!

15 Tenga sa si mane niŵaʼömi, wa si no mabu daʼe, awena sa göi labözi siŵa.

16 Daʼö sa ia, niŵaʼö Yoëli, samaʼeleʼö andrö: [1]

17 ”Ba so dania, na luo safuria, iŵaʼö Lowalangi, ba ulau ba niha fefu wöfö Gehehagu, ba mamaʼeleʼö nonomi matua, awö nonomi alawe, ba laʼila gangilata ono matua khömi ba mangifi zatua khömi.

18 Ba genonigu ira matua ba ba genonigu ira alawe ulau ösa Gehehagu, na luo daʼö, ba mamaʼeleʼö ira.

19 Ba ufazökhi gilaʼila ba mbanua si yaŵa ba tandra ba guli danö si tou, do ba alitö ba simbo. [2]

20 Ba tobali sogömi-gömi luo ba do mbaŵa, fatua lö irugi luo Zoʼaya andrö, sebua.

21 Ba tobali auri dozi si angaröfi li töi Zoʼaya,” [3]

22 He yaʼami, Iraono Gizeraëli, mifondro-ndrongo daʼe! Yesu andrö, banua Nazareta, niha nifaduhuʼö, Lowalangi ba khömi, ba waʼabölö ba ba gilaʼila ba ba dandra, nifafazökhiʼö Lowalangi khönia, ba khömi, niʼilami andrö. [4]

23 Daʼö mege mihalö, me no mubeʼe ba dangami ia, me no ihonogöi ihuku Lowalangi, me no tohöna mege iʼila, ba no miʼosö ia ba röfa tanga niha baero, wamunu yaʼia. [5]

24 Daʼö nisusugi Lowalangi, me no iʼefaʼö khönia waʼafökhö waʼamate, me tebai sa atṍ itaha ia faʼamate. [6]

25 Imane sa Dawido ba khönia andrö: ”Lö aefaʼaefa ba duduma hörögu Zoʼaya yaʼo, noa sa so ia ba gambölögu, fa lö mangiwa ndraʼo. [7]

26 Andrö waomuso dödögu ba manunö lelagu, ba ösigu göi, ba molombase dania, ba wanötöna,

27 löʼö sa öröi ba mbanua tou nosogu, ba lö ötehe, iʼila waʼobou niʼamoniʼö andrö khöu. [8]

28 No öʼombakhaʼö khögu lala ba waʼauri, öhöna khögu waʼomuso dödö tánö fönau.”

29 He yaʼami, ira talifusö, akha lö aiwö ndraʼo muhede khömi, ba khö duada Dawido, wa no mate ia, awö wa no lakoʼo, ba so ba khöda lewatönia, irugi maʼökhṍ andre. [9]

30 Ba me no samaʼeleʼö ia, me no iʼila, no ifabuʼu khönia Lowalangi fahölusa, ifedadao ba dadaomania maʼuwunia, [10]

31 me no iʼila zi so na furi dania, ba itörö linia wemaoso Keriso, wa löʼö sa teröi ia ba mbanua tou, awö wa löʼö göi iʼila ösinia waʼobou.

32 Yesu andrö nisusugi Lowalangi, si so na mbörö ba daʼö ndraʼaga fefu. [11]

33 Ba me no teʼalaŵaʼö ia iadaʼe kambölö Lowalangi, ba me no itema gamabuʼula li andrö, Eheha niʼamoniʼö andrö, khö Nama, ba no ilau daʼe, niʼilami, nirongomi andre. [12]

34 Tenga sa Dawido zi möi yaŵa ba zorugo, ba yaʼia zangumaʼö: ”No iŵaʼö Soʼaya khö Zoʼaya yaʼo: Dadao ba gambölögu, [13]

35 irege ubeʼe tou barö gaheu zi faʼudu khöu.”

36 yaʼaboto sibai iadaʼe ba dödö maʼuwu Gizeraëli fefu, wa no ibaliʼö Soʼaya ba Keriso daʼö Lowalangi, Yesu andrö, niforöfami. [14]

37 Ba me larongo daʼö, ba manga ia ba dödöra ba lamane khö Wetero ba ba zinenge böʼö andrö: He mawisa enaʼö, yaʼami, ira talifusö? [15]

38 Ba imane khöra Fetero: Mifalalini geraʼerami ba mifabayagöʼö idanö ami, dozi ami, ba döi Yesu Keriso, ba wangefaʼö horömi andrö, ba mitema dania mbuala andrö, Eheha niʼamoniʼö. [16]

39 khömi sa gamabuʼula li andrö ba ba ndraonomi ba ba zi so ba zaröu fefu, gofu ha waʼato nikaoni Zoʼaya, Lowalangida. [17]

40 Ba so na niŵaʼönia, tánö böʼö, famaduhuʼö, ba ifarou dödöra, imane: Yaʼaefa ami ba niha si tefuyu tödö andre. [18]

41 Ba lafabayagöʼö idanö ira samonaha taroma linia ba dödöra, ba mato tölu ngahönö niha, si teʼanö, ha si maʼömaʼökhö andrö. [19]


(Halöŵö Zinenge 2:14-41)


Famotokhi ba gahe[edit | edit source]

  1. (Yoël. 2, 28—32)
  2. (Luk. 21, 25)
  3. (Rom. 10, 13)
  4. (F. 10, 38. Rom. 1, 4)
  5. (F. 4, 28; 3, 15 b. t.)
  6. (Luk. 11, 22)
  7. (Sin. 16, 8 b. t.)
  8. (F. 13, 35 b. t.)
  9. (Sal. I. 2, 10)
  10. (Sin. 132, 11 b. t. Luk. 1, 32. Rom. 1, 3)
  11. (F. 1, 8; 3, 15)
  12. (F. 5, 31. Yoh. 12, 32; 14, 26. Sin. 68, 19)
  13. (Sin. 110, 1)
  14. (Fil. 2, 11)
  15. (Heb. 4, 12. F. 16, 30)
  16. (F. 3, 19; 10, 45)
  17. (Yoël. 2, 28. Yoh. 10, 16)
  18. (Fil. 2, 15)
  19. (Yes. 53. 11. 12)


Faza 2: Folau Eheha niʼamoniʼö (1-13) | Huhuo Wetero andrö (14-41) | Amuata niha Keriso si föföna (42-47)


Fabaliŵa lala[edit source]

Fanolo ba wanura: Lala wanuraFama'oli nösiNgawalö templatNgawalö kategori

Bale zato: OlayamaAngombakhataBawagöli zatoMonganga afoNahia wamakoriNga'örö spesialNgawalö wanoloSafuria tebulöSanandrösaSangai halöŵö