Wb/nia/Galatia/2

From Wikimedia Incubator
< Wb‎ | nia‎ | Galatia
Wb > nia > Galatia > 2

Fe'amöi Waulo ba Yerusalema[edit | edit source]

I. 1 Ba aefa da'ö, meweleöfa fakhe furi ö, ba ufuli möi misi yaŵa ba Yeruzalema, awö Mbaranaba, ba u'ohe göi awögu Dito andrö. [1] 2 Ba fama'ele'ö mbörö, wa möido misi yaŵa, ba u'ombakha'ö khöra duria somuso dödö andrö, nituriagögu ba niha baero, oföna ba zi no motöi andrö, ba wamaigi na zaya-zaya gölögu halöŵögu, ba ma halöŵögu föna.[2] 3 Ba he Tito andrö, awögu, Dawa Heleni, ba lö mu'o'ou, ena'ö ifaboto'ö ia. 4 Ba ba dalifusö faya andrö, si no tetewu, si no manöndragö ya'ira bakha, ba wamaigi hadia zi tola khöma, ba khö Keriso Yesu, ena'ö labali'ö sawuyu ndra'aga.[3] 5 Ba saza lö alulu dödöma, ba wolo'ö khöra mena'ö, ena'ö lö tebulö khömi wa'aduhu duria somuso dödö andrö.

Ha sara dödöra zingenge bö'ö[edit | edit source]

II. 6 Ba ba zi so töi andrö — ha niha ira föna, ba ma'ifu lö ba dödögu da'ö; lö'ö sa ifaigi mbawa niha Lowalangi, — ba lö'ö sa ninönö zi so töi andrö khögu.[4] 7 Ba tenga ha da'ö; me larongo, wa no mube'e ba dangagu duria somuso dödö andrö, ba niha si lö muboto, si mane khö Wetero ba niboto[5]8 sanolo khö Wetero sa, ba halöŵö zinenge andrö, ba niboto, da'ö göi zanolo ya'o, ba niha baero,[6]9 ba me no aboto ba dödöra wa'ebua dödö andrö, si no falukha ndra'o, Yakobo andrö ba Kefa ba Yohane, si no amaedola gehomo, laŵa'ö niha sato, ba fara'u tanga ira khögu ba khö Mbaranaba, tandra wa fa'awö, ena'ö ba niha baero mangombakha ndra'aga, ba ya'ira, ba ba niboto;[7] 10 ha fa böi olifu ndra'aga zi numana, ba noa göi uforege wolo'ö da'ö.[8]

Itegu Wetero Faulo[edit | edit source]

III. 11 Ba me möi ba Gandriokhia Gefa, ba no utegu ia, muhededo khönia, me no mosinegu ia. 12 Me lö si so niha andrö sa, si otarai khö Yakobo, ba orudu manga ia ba zi no niha baero föna, ba me no so ira, ba iheta ia, ba i'oniagö ia, fa'ata'unia niboto.[9] 13 Ba mamini tödö göi, awönia, niha Yehuda bö'ö andrö, ba tobali adöni göi Mbaranaba, ba wamini tödö andrö khöra. 14 Ba me u'ila, lö sökhi nilaura, lö latörö zi duhu andrö, turia somuso dödö, ba muhededo khö Gefa, ba zi so ira fefu, umane: Na ö'o'ö huku ba niha baero, ya'ugö niha Yehuda, ba na tenga huku ba niha Yehuda ö'o'ö, ba hadia wa ö'o'ou niha baero, ba wolo'ö huku ba niha Yehuda![10] 15 Ya'ita, ba no to'ua niha Yehuda, ba tenga si so horö, nga'ötö niha baero.[11] 16 Ba me no ta'ila, wa tenga moroi ba wolo'ö oroisa atulö niha, iŵa'ö Lowalangi, ha moroi ba wamati andrö, khö Keriso Yesu, ba no mamati ita, khö Keriso Yesu, ena'ö atulö ita, iŵa'ö Lowalangi, moroi ba wamati andrö, khö Keriso, ba tenga moroi ba wolo'ö oroisa, me samösa lö'ö, satulö, iŵa'ö Lowalangi, moroi ba wolo'ö oroisa.[12] 17 Ba na no oroma, wa no niha si so horö göi ita, ya'ita sangalui ena'ö atulö ita, iŵa'ö Lowalangi, ba khö Keriso, ba ma no sanolo ba horö Keriso? Böi si manö! 18 Na ufuli sa ufazökhi zi no ududugö, ba tobali solalö ndra'o ube'e. 19 Ya'o sa, ba si no mate ba goroisa andrö, moroi ba goroisa, ena'ö khö Lowalangi auri ndra'o.[13] 20 No muforöfa ndra'o, awö Keriso; auri ndra'o, ba tenga sa'ae ya'o, Keriso zauri ba dödögu. Ba fa'aurigu iada'e, ba mboto andre, ba no fa'auri ba wamati khö Nono Lowalangi, si no mangomasi'ö ya'o, si no mame'e salahigu ya'ia.[14] 21 Lö u'ositengagö wa'ebua dödö Lowalangi andrö; na moroi ba goroisa wa'atulö dödö andrö mena'ö, ba no zaya-zaya gölö, wa no mate Keriso.[15]

Famotokhi ba gahe[edit | edit source]

  1. HalZin 15:2; KorII 8:23
  2. HalZin 13:2
  3. HalZin 15:24; Gal 5:1
  4. Rom 2:11
  5. HalZin 15:12; Rom 1:5
  6. Rom 15:15 b.t.
  7. Efes 3:8 b.t.
  8. KorI 16:1; HalZin 11:29,30
  9. HalZin 21:18; 11:3
  10. TimI 5:20
  11. Efes 2:3 b.t.
  12. Faigi 3:11; HalZin 15:10-11; Rom 3:20,28; 4:5
  13. Faigi 6:14; Rom 7:4; 6:4-6
  14. KorII 13:5; 5:15,17; Gal 1:4
  15. Heb 7:11

Fabaliŵa lala[edit source]

Olayama Zura Galatia: 123456

Amabu'ulali Sibohou: MataioMarekoLukaYohaneHalöŵö ZinengeRomaKorindro IKorindro IIGalatiaEfesoFilifiKoloseTesalonika ITesalonika IITimoteo ITimoteo IITitoFilemoHeberaioYakoboFetero IFetero IIYohane IYohane IIYohane IIIYudaFama'ele'ö

Bale zato: OlayamaAngombakhataBawagöli zatoMonganga afoNahia wamakoriNga'örö spesialNgawalö wanoloSafuria tebulöSanandrösaSangai halöŵö