Wb/nia/Filifi/2

Add links
From Wikimedia Incubator
< Wb‎ | nia‎ | Filifi
Wb > nia > Filifi > 2

Faramou ba wahasaradödö[edit | edit source]

I. 1 Ba na moguna na hadia ia wamarou tödö, ba khö Keriso, na moguna na hadia ia wondrara dödö, soroi ba wa'omasi, na so hadia ia wefao ba khö Geheha, na so hadia ia wa'ogolö dödö ba fa'ahakhö dödö,[1] 2 ba mifo'ahonoa wa'omuso dödögu andrö, ena'ö ha sara dödömi, ena'ö faoma wa'omasimi nawömi, ena'ö ha sambua dödö ba ha sambua gera-era.[2] 3 Böi mifonaha wasosota, ba he fayawasa; mi'ide-ide'ö ami, ba ya'ebua ba dödö zamösana nawönia, moroikhönia.[3] 4 Böi ha soguna khönia ibe'e ba dödönia zamösana, soguna khö nawönia göi yamube'e ba dödönia.[4]

Famarou ba wa'atobali famaedo Keriso[edit | edit source]

II. 5 Si mane tödö Yesu Keriso, ya si manö göi dödömi.[5] 6 Ya'ia, he ŵa'ae no nga'eu Lowalangi nga'eunia, ba ba dödönia, ba tenga sa nirabu, wa no fagölö-gölö ia khö Lowalangi;[6] 7 iheta khönia da'ö, ihalö nga'eu zawuyu, ba tobali fakhili-khili ia ba niha, ba amuatania, ba si mane amuata niha, wamaigi niha.[7] 8 I'ide-ide'ö ia, molo'ö ia, irugi wa'amate, fa'amate ba röfa.[8] 9 Andrö göi no ibali'ö salaŵa sebua ia Lowalangi, ba no ibe'e bualanla khönia döi andrö, sebua moroi ba döi bö'ö fefu.[9] 10 Ena'ö ba döi Yesu andrö latuhi danö dozi si so ba zorugo, awö zi so ba guli danö, awö zi so barö danö;[10] 11 ba ena'ö dozi bewe manehe, wa no So'aya Yesu Keriso, ba wamolakhömi Lowalangi Ama.[11]

Famarou ba wangalui fangorifi[edit | edit source]

III. 12 Andrö, ya'ami ni'omasi'ögu, si mane folo'ömi li, götö wa'ara, si manö göi mi'alui wangorifimi andrö ba mbanua furi, sata'u ami ba sanizi-nizi, böi ha si mane me sodo, mendrua manö na iada'e, me lö ya'odo.[12] 13 Faoma sa Lowalangi zanga'asogö ba dödömi, he fa'edöna, ba he famalua, börö wa'ebua dödönia andrö.[13] 14 Fefu, hadia ia, nilaumi, ba böi mikökö-kökö, ba böi manufa dödömi,[14] 15 ena'ö tobali si lö sinegu ami, ba sohau-hau, ono Lowalangi, si lö si sala, bakha ba hunö niha andre, sabila tödö, si no tefuyu; oroma ami, ba gotaluara, sohagaini ulidanö.[15] 16 Ena'ö böi miböhöli daroma li fangorifi andrö, ba wanunogu ya'o, na luo Keriso, wa no tenga faya nitörögu, awö wa no tenga zaya-zaya golö wa'erege dödögu andrö.[16] 17 Ba he tebe'e sumange ndra'o, ba wame'e sumange famatimi andrö, ba wo'ere ba da'ö, ba omuso dödögu, owua-wua dödögu, awömi fefu.[17] 18 Ba mi'omusoi'ö dödömi ba da'ö, mi'owua-wua'ö dödömi, awögu.[18]

Angombakhata wa'atohare Timoteo ba Efaforito[edit | edit source]

IV. 19 Ba udöna-döna sa khö Zo'aya, Yesu, alio ufatenge khömi Dimoteo andrö, ena'ö terara dödögu göi, na urongo he wisa khömi.[19] 20 Samösa lö khögu, si fagölö-gölö tödö khögu, si manö, si onorogöi tödö ya'ami, sindruhu-ndruhu.[20] 21 A'oi sa la'alui dana khöra, ba lö la'alui hadia ia khö Keriso Yesu. 22 Ba fa lö faröi ia, si no mutandra, ba no mi'ila, wa awögu ia, hulö nono, awö namania, ba halöwö ba duria somuso dödö andrö.[21] 23 Da'ö sa nidöna-dönagu, nifatenge; u'anema'ö, na no u'ila, he wisa khögu. 24 Faduhu sa dödögu khö Zo'aya, alio so ndra'odo göi.[22] 25 Ba no uŵa'ö tödögu, lö tola lö ufatenge khömi Gefaforito, talifusö andrö, awögu ba halöŵö ba awögu ba wasöndrata, sinengemi andrö, enonimi ba zoguna khögu,[23] 26 me no humulu dödönia khömi fefu, ba me no abu dödönia, me no mirongo, wa no mofökhö ia. 27 Ba duhu sa, no mofökhö ia, ahatö wa'amate, ba no ihakhösi tödö ia Lowalangi, ba tenga ha ya'ia, ya'odo sa göi, fa böi fatete khögu wa'abu dödö. 28 Andrö aösö sibai dödögu, wamatenge ya'ia, ena'ö ifuli omuso dödömi, na mi'ila ia, ba ena'ö anono göi wa'abu dödögu. 29 Andrö mifonaha ia khömi, khö Zo'aya, ya'omuso manö dödömi, ba mifosumange zi manö.[24] 30 Halöŵö Keriso sa mbörö, wa no irugi zahatö ba wa'amate, no i'ositengagö nosonia, ba we'amöi salahimi, enonigu, me lö ya'ami.

Famotokhi ba gahe[edit | edit source]

  1. ↑ Efes 4:1-3; Kol 3:12 b.t.
  2. ↑ Faigi 3:16; KorI 1:10
  3. ↑ Gal 5:26; Rom 12:10
  4. ↑ KorI 10:24
  5. ↑ Yoh 13:15
  6. ↑ Kol 1:15
  7. ↑ KorII 8:9; Yes 52:13 b.t.; Heb 2:14,17
  8. ↑ Yoh 14:31; Heb 5:8
  9. ↑ Efes 1:20 b.t.; Heb 1:4 b.t.
  10. ↑ Mat 28:18; Rom 14:11; Fam 5:13,14
  11. ↑ HalZin 2:36; 10:36; Rom 14:9
  12. ↑ FetI 1:17; Sin 2:11
  13. ↑ KorII 3:5
  14. ↑ Yak 1:6 b.t.
  15. ↑ FetI 2:12; Mat 5:14 b.t.
  16. ↑ KorII 1:14
  17. ↑ TimII 4:6; KorII 7:4
  18. ↑ Faigi 4:4
  19. ↑ TesI 3:2
  20. ↑ TimII 4:10,16
  21. ↑ TimI 1:2
  22. ↑ Faigi 1:25
  23. ↑ Faigi 4:18
  24. ↑ KorI 16:18; TimI 5:17

Fabaliŵa lala[edit source]

Olayama Zura Filifi: 1 • 2 • 3 • 4

Amabu'ulali Sibohou: Mataio • Mareko • Luka • Yohane • Halöŵö Zinenge • Roma • Korindro I • Korindro II • Galatia • Efeso • Filifi • Kolose • Tesalonika I • Tesalonika II • Timoteo I • Timoteo II • Tito • Filemo • Heberaio • Yakobo • Fetero I • Fetero II • Yohane I • Yohane II • Yohane III • Yuda • Fama'ele'ö

Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö
Retrieved from "https://incubator.wikimedia.org/w/index.php?title=Wb/nia/Filifi/2&oldid=6229821"