Wb/nia/Fanuno Sanari

a. Fagia moyo ana'a,
fawude ganöwö,
ba nomo zalaŵa helanö,
Simane zarari hae.

b. Gema.
He sanaelu sanari,
He sondröni bagi rambudi,
Böi migaozö mida-ida'i,
Böi mida'i-da'i wanari,
Lö moroi furida nemali,
Lö fönada zimanga mböli.
Manö wö zomasido fanari,
Hulö zumbila sanaha angi,
Hulö wönö sangaha-ngahani,
He wö'i ua zanaelu sanari,
Me lasi'u mbagi rambudi,
Hulö fagia nuwu nangi,
Okafu dödö zamaigi-maigi,
Hiza wö'i memanahae memanari,
Me labözi mbagi rambudi,
Hulö ni'ezoi nibözini,
Yomo dalinga mbatö sörömi,
Yomo zuzu hare balaki,
Yomo banomo zalaŵa hadi,
Ba nomo anöita balaki,
Hiza wö'i zanaya bagi rambudi,
Nukha zolaya sanari,
He na so töra si hönö böli,
Zi no mola'a-la'a lagasi,
Zi no mosua-sua mbaeŵa höni,
Zi hulö ndröfi sa mö'i-mö'i?
Wa'omasida wamaigi-maigi,
Me humaga rambudi,
Ba he wö'i zanaelu sanari,
Me lalega nösi sobari,
Ladölö danga sobaeŵa höni,
Ba hiza duru sawai urofusi,
Me lasi'u mbagi wanari,
Fagobi gela-gela mbalaki,
Ihaga-haga mbo'ö fatambai,
Fagobi naya fadoli mbagi,
Andrö tobali dödö zamaigi,
Andrö tödöda ahöli-höli,
Ba zanaelu sanari-nari,
Yöu nata Gindraöhö Gindali,
Donga mburuti si tafiö angi,
So aya niru töla zörömi,
Fanikhi mbua lagaene balaki,
Ba he wö nata Gindraöhö Gindrali,
Mo'aya kandra börö zi'öli,
Kandra da'ö zimatua nangi,
Na lö mukandra zimatua nangi,
Humombo mena'ö nga'ukhu nohi,
Moloi mena'ö nga'ukhu zi öli,
Fofo ena'ö sihombo gosali,
Fofo ena'ö soloi nose nowi,
Ba he wö'i nata Gindraöhö Gindrali,
Mo'aya sura uwu zörömi,
Hiza wö'i me ifalea ibokai?
Mane solokhoi dete holi,
Yaŵa dete holi balaki,
Banua sa Luo Mewöna Luo Holi,
Donga Nazarata Nazari,
Nazaria Nazarata Langi,
Ba datahalö wadaŵi-daŵi,
Tafamada-madaŵi torosi,
Tafamagimahie riti-riti,
Da'ö mböröta wanari-nari,
Börö me tebago mbarasi,
Alai mbarasi aetu ba ngingi,
Zaetu ba ngingi ndraono sa'iki!
Yaŵa khö Luo Mewöna Luo Holi,
Ba heza lahalö nuwu mbalaki,
Nitötö da'ö ba duho hösi,
Ba nifoloyo owo wanga'i,
Ba nifa'uröi köfa wogawisi,
Ba nifawude uwu wondra'ui,
Ba nifagia uwu gawa sauri,
Ba he wö'i melafawude mbarani,
Ba he wö'i melafagia gawa sauri,
Ba uliho nitefe'ö ba mbagi,
Ba uliho nitafi'ö ba gamuri,
Khöra naya uwu mbalaki,
Ba zi möi mamaigi balaki,
Ya'ia nata Gindröndra Gindröndri,
Ya'ia nata indrö-indrö lagi,
So'aya taka karimao nasi,
Ba ha samuza luo samuza i,
Me no awai tebago mbalaki,
Ba iŵaö tauranö balaki,
He inagu börö zamaeri,
Kaoni damba-tambagu wanari,
Ba wolili golu esöni,
Tou ba golayama ewali,
Na aekhu ba danö zisökhi,
Na lafolaya zaembu balaki,
Na lö samahea sanalikhi,
Ba ulau wohasa fa'igi-igi,
Usikhi wakhe fabaya limi,
Uwöwöi wakhe fabaya tamböni,
Ba iŵaö Nazarata Nazari,
He sa Luo Mewöna, Luo Holi!
Kaoni damba-tamba wanari.

Umbu: Marius Telaumbanua (Ama Pasca)