Wb/nia/Fanulöni Dumbao

Me föna ba zisambua banua ba Jepang, so samösa nonomatua sotöi Yosaku. Halöŵönia mangozaragö eu galitö ba i'amawa ba fasa. Kefe nisöndrania ba ibe'e böli gönia. Ero ma'ökhö simane-mane da'ö manö.

Samuza ma'ökhö me mangawuli ia moroi ba fasa, i'ila so zangafo-ngafo ba dete nidanö si no baku. Me ihatö'ö ia, i'ila sambua dumbao si no tokhai ba dandraŵa wofo. Sögö i'efasi ia Yosaku moroi ba dandraŵa andrö.

Omuso sibai dödö dumbao. Ilau manari-nari yaŵa ba högö Yosaku fatua lö muhombo ia ba mbanua. Börö me okafu-kafu sibai nangi ba da'ö, ba i'ewua'ö galitö Yosaku me irugi nomo. Irino gönia ba zibongi. Lö ara, ba izumaigö so zanoko bawandruhö nomonia moroi baero. Me ibokai mbawandruhö, no so fönania nono'alawe si sökhi sibai. No afönu högönia wöi-wöi deu si no baku.

"Ae yomo, no kafutö mbotomö. Leu mbotomö ba ngai galitö", fehede Yosaku.

"Hezo numalö ndra'ugö?" fehede Yosaku.

"Sindruhunia möi ndra'o ba wamalukhaisi awögu, börö me ilau teu si baku, ba elungu ndra'o wanörö lala. Hadia tola ulau molombase ba nahamö bongi da'a?" fehede nono'alawe.

"Tola, lö fasala khögu. Hiza'i niha sinumana ndra'ö, lö khögu ö awö wöröma", fanema Yosaku.

"Böi busi dödöu. Omuso dödögu me ötehegö khögu nahia andre", fehede nono'alawe.

Ba iföfö'ö mbate'enia ono'alawe andrö ba ilau mondrino gö. Me maoso ia sihulöwongi, ba no ihönagö gö yaŵa ba tete meza. Abu dödö Yosaku, i'ila wa lö ara tö mofanö nono'alawe andrö, ba irasoi tödönia wa lö awönia.

Ba itugu manö göi abölö-bölö wa'aekhu deu si baku.

"Iagö andre ndrege tebato deu si baku", fehede Yosaku.

Me no aefa lima ngaluo, ba lö manö tebato deu si baku. Imane ono'alawe khö Yosaku, "Bali'ö ndra'o fo'omomö, ba tehegö khögu toroi ba da'a." Omuso sibai dödö Yosaku ba wehede nono'alawe andrö.

"Kaoni döigu Otsuru," fehede nono'alawe. Me no tobali ia fo'omo Yosaku, ba ibabaya hadia ia halöŵö yomo Otsuru. Samuza ma'ökhö, i'andrö Yosaku ba wowöli bana me omasi ia managu.

Ibörögö managu Otsuru. I'oroisi khö Yosaku ena'ö lö ifaigi-faigi ia na inötö ilau managu. Me no irugi tölu ngaluo wanagunia, lö manga ba lö mamadu idanö, ba ilau ia baero Otsuru. No awai itagu nukha.

"Ya'e nukha ayanishiki. Na ö'amawa ba fasa, ba ebua gefe ötema", fehede Otsuru.

Omuso dödö Yosaku me no la'öli nukha nitagu Otsuru, ba ebua gefe isöndra. Fatua lö mangawuli ia, i'öli ngawalö gama-gama sedöna i'ohe na mangawuli ia ba nomo.

"Harazakigu ndra'ugö, iada'a tola usöndra gefe soya, saohagölö omasi'ögu. Omasi ndra saniaga ba fasa na oya mu'azökhi nukha simane da'ö", fehede Yosaku.

"Na simanö da ufuli zui utagu," fanema Otsuru. Awai itagu nukha andrö ba ngaluo si öfa. Ba hiza mofökhö-fökhö Otsuru irege afuo ia. I'andrö khö Yosaku ena'ö lö i'andrö khönia ba wanagu nukha sa'ae.

So göi samösa zaniaga ba fasa sangandrö Yosaku ba wanagu nukha Kimono. Na lö igo'ö da'ö Yosaku ba lataba mbaginia. Me mangawuli ia ba ifatunö zalua khönia khö wo'omonia.

"Lau, da utagu zambua tö, hiza'i ha sambua rozi mbu", fehede Otsuru.

Börö me so manö dödönia ba wökhö wo'omonia na aefa ilau managu, omasi Yosaku ba wamaigi mbate'e naha wanagu ndrongania.

Tokea ia ba ni'ilania. Hiza dumbao sanöbi bulunia, ba itagu ibali'ö nukha. Oroma sa'ae nösi dumbao andrö me itugu ahori mbulunia.

Ba irasoi tumbao da'ö wa ifaigi-faigi ia Yosaku. Ba ibali'ö ia niha tobali Otsuru.

"No ö'ila höröu sa'ae", fehede Otsuru. "Ya'odo dumbao nitolomö da'ö. Ba wanulöni fa'asökhimö khögu, ubali'ö ndra'o niha, ba ufalua zimane da'a. No irugi inötönia fabali ita", fehede Otsuru.

"Bologö dödöu khögu, böi röi ndra'o", fehede Yosaku sifao fege-ege.

Ba tobali tumbao Otsuru. Ilau muhombo aröu ba dalumbanua. Atö Yosaku moroi furi, maniasa ia ba zi no ifalua.

Nifa'anö Tiru Zendrato

Nitöngöni

Omuso dödögu na öfazaewe nidunö-dunö andre ba media sosial ma Internet. Hiza i be'e fao gumbu heza tehalö ia. Be ba gahe zura: Moroi ba Wikibuku Nias. Nifa'anö ???. Aila ita ba niha na lö öbe'e gumbunia, me öhalö töiu zi tenga töiu.

Fabaliŵa lala

Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö