Wb/nia/Fangowai Fame Afo

From Wikimedia Incubator
< Wb‎ | niaWb > nia > Fangowai Fame Afo

1. Sowatö:

Tamane amagu balugu...!
Ira salaŵa si te'oli
Me no tohare wö domeda soroi yefo nasi,
Ira balugu si oroi danö saröu
Hadia ena'ö niŵa'öda ba domeda
Si no tohare, no talata
Tou ba mbulu golayama?

2. Itema li sanuhe ma salaŵa:

Duhu wö ae da'ö amagu salaŵa
Tenga ha lala ho'ae lala umanö
Noa wa sarara lö mombombo mbalö newali
Ba lö mbörö mbulu golayama
Emali dome si so ba lala
Ono luo na so yomo
Tomeda zofeta ba newali
Tomeda salua ba mbulu golayama
Mitema'ö ira maola-maola,
Mifaondragö ira masi-masi.

3. Samösa moroi ba gotalua ndra salaŵa si te'oli:

Tamane amagu salaŵa (salaŵa dome)!
Ba ena'ö na lö hede-hedema khömi,
Ba ma miwalinga sabua khöma
Wangondrasi ya'aga sowatö.
Hana ba amagu balugu
Wa tema misösö mbalö nangi
Wa tema misui mbalö laöhö
Wogamö-gamö banua zowatö
Si no so ba höndrö danö?

4. Samösa moroi ba gotalua ndra salaŵa si te'oli
mangowai dome ba wame afo. Oi izara i'owai ira:

Balugu salaŵa zowatö, ta'owai domeda... Heee...
..................... Heee...
....................... Heee...
....................... Heee...
Fefu zalaŵa si te'oli, ta'owai domeda... Heee...
Fefu mbanuada ba zowatö, ta'owai domeda... Heee...

Aefa da'ö fangowai dome.

Tamane amagu balugu salaŵa dome!
Me no ha sara dödöma ya'aga sowatö.
Ba ma'owai wö ami si sambua fehede.
Ba si oföna ma'andrö wa'ebolo dödömi
Na lö ahori ma'ila döimi ba wa'asalaŵa.

Salaŵa dome ma'owai ndra'ugö... Heee...
.............. ma'owai ndra'ugö... Heeee...
............... ma'owai ndra'ugö... Heeee...
............... ma'owai ndra'ugö... Heeee...
Fefu dome sato sibai ma'owai ami... Heee...
Fefu ndra kaoniŵa moro yöu, moroi raya ma'owai ami... Heee...
Ma'owai ami tome he... He...


5. Fame afo

Ba hiza wö amagu balugu!
Me no ma'owai ami ya'ami tomema,
Ba ena'ö na mane föna
Ba sumiriti ena'ö zaramö uwu galimawa.
Lö wö na'i ba zinata mbawa
Me no aekhu ba danö si rimba-rimba
Mahundragö ba lö ae tanö ba gahema,
Hulö niŵa'ö-ŵa'ö ba humanö
Hulö niŵa'ö-ŵa'ö ba hoho,
"Hadia u'olembai me lö töla,
hadia uhalö me lö bua yaŵa."
Andrö ligu ba andrö da'ö.

6. Satua hada mangandrö wanehe moroi ba zowatö:
Ba fatua lö mafaehagö khömi amagu salaŵa
Ba da'ua ma'angona'ö zalaŵa si te'oli
Salaŵa zowatö börö zonuza.
Balugu salaŵa zowatö, tabe'e nafo awö mbago ba domeda... Heee...
Fefu zalaŵa si te'oli tabe'e nafo awö mbago ba domeda... Heee...
Fefu mbanuada ba zowatö tabe'e nafo awö mbago ba domeda... He...

Fame afo khö mbalugu salaŵa dome:

Ira salaŵa dome mitema nafo awö mbago... Heee...
Fefu domeda salua ba golayama, mitema nafo awö mbago... Heee...
Tomema sato sibai, mitema nafo awö mbago... Heee...

Aefa da'ö fanguhugö:

"Höli wanguhugö same afo fa'ebololo dödö... Hu...!"


7. Fanema'ö moroi khö zalaŵa dome:

Tamane ba Balugu salaŵa zowatö!
No mi'owai ndra'aga,
mitema'ö ndra'aga hau-hau idanö mbawa si sökhi,
ma'iki miboho mbawa.

Ba mifaola khöma nafo si sara manga,
lö ma'andrö saohagölö khömi
ba oroma si'ai wa serege tödö ndra'aga
ba wondugi banua zowatö andre khömi börö zebua,
banua sitaro ba hili-hili danö.

Duhu sibai maola-maolamö Amagu Salaŵa zowatö,
Wa no ofeta ita ba dalu galaŵatö mbawa,
No ofeta ita ba dangi-dangi ndröfi.
Ba tenga da'ö dani we'asoma,
Tenga da'ö dani wangondrasima ya'ami,
Möiga fatandra-tandra sumange,
Möiga fatandra-tandra böwö.
Wa hulö wö i masösö mbala nangi,
Wa hulö wö i masui mbalö laöhö,
Wogamö-gamö banua zowatö,
Banua zalaŵa sohadi,
Me no tehöngö teturia,
Me no tehöngö teholi,
Wa so khömi tou ba dalu golayama,
Wa so khömi tou ba dalu newali,
Geu sebua so töla balaki,
Geu sowua börö zami,
Bowonia wa'asökhi,
Ba bulunia masi-masi.
Da'ö zi möi manehesi Amagu Balugu,
Zai na madunö-dunö ba ndraono nafuri.

Fatua lö monganga nafo andre
ba dama'andrö saohagölö khömi,
awena dania mabagisi ia khöma.


Fagandrö saohagölö dome khö zowatö:

Balugu salaŵa zowatö moroi khöu zumange afo awö mbago... Heee...
Ira balugu salaŵa si te'oli ba zowatö
moroi khömi zumange afo awö mbago... Heee...
Fefu ndra satua ba zowatö moroi khömi zumange afo awö mbago... Heee...

Fombangisi afo khöra tome:

Salaŵa dome tatema zumange afo awö mbago si'oroi danga zalaŵa zowatö... Heee...
Fefu ita ndra satua dome tatema zumange afo awö mbago
moroi ba danga ndra satua si te'oli ba zowatö... Heee...
Fefu ndra satu-satua kaoniŵa sowulo ma'ökhö da'a,
tatema zumange afo awö mbago si'oroi danga zowatö... Heee...
Tatema nafo sumange basö-basö dödö tome he... He...!




Sura Ni'amoni'ö: Mataio | Mareko | Luka | Yohane | Halöŵö Zinenge | Roma | Korindro I | Korindro II | Galatia | Nefeso | Filifi | Kolose | Tesalonika I | Tesalonika II | Timoteo I | Timoteo II | Tito | Filemo | Heberaio | Yakobo | Fetero I | Fetero II | Yohane I | Yohane II | Yohane III | Yuda | Fama'ele'ö

Fanolo wanura: Lala wanura | Fama'oli nösi | Ngawalö templat | Ngawalö kategori
Kategori: Amaedola | Budaya | Cerpen | Fangi'ila (Ilmu Pengetahuan) | Hendri-hendri | Hoho | Hikaya | Kamus Nias-Jerman | Kese-Kese | Lala wondrino (Resep) | Maena | Manö-manö | Manö-manö Nono Niha | Uso dödö (Entertainment) | Novela | Sejarah | Seni | Sinanö | Sinunö | Sura Ni'amoni'ö | Taromali Ero Migu | Turia Somuso Dödö

Fanolo wofanö: Olayama | Angombakhata | Bawagöli zato | Monganga afo | Nahia wamakori | Nga'örö spesial | Ngawalö wanolo | Sangai halöŵö | Safuria tebulö | Wikibuku | Wikikamus | Wikipedia | Wikiyunior