Wb/nia/Fandrita Safökhö Tödö

Ba zi samuza inötö, so samösa wandrita so halöŵö ba gosali Santo Nikolas. No ara mohalöŵö ia ba gosali da'ö. He wa'ae simanö, ma'ifu lö akhötania, lö omonia, lö hadöi nahia toroi. Afatö dödönia. Andrö börö da'ö, i'owuloi fefu nono kusi gosali, aefa da'ö ifaigi gambara Santo Nikolas ba iböbözi. Aefa da'ö ilau mofanö, iröi gosali Santo Nikolas, ilau mofanö gofu heza i'ohe ia ahenia.

Ba dalu wofanönia, falukha ia khö ndramatua satua si lö irai ifalukhaisi ba zilalö. "Ya'ahowu, niha si sökhi," imanö niha satua da'ö. "Hezo numalö'ö? Hezo moroi mbanuau? Akha fao ndra'o awöu ba lala."

Me no awai fahuhuo ira sabata, ba lalau mofanö, fao ira. Me no la'ofanöi zi mato ha'uga fa'aröu, erege dödöra andrö wa labatogö ira, lalau molombase. Khö wandrita, so dua nga'örö roti side-ide. Khö niha satua da'ö, so dua nga'örö roti sanifi-nifi. Ba mohede wandrita, imane: "Ta'a'ua rotimö, aefa da'ö awena ta'a rotigu."

"Lau," imanö niha satua da'ö. "Ta'ofönai'ö wemanga rotigu, ba tenagö rotimö öda dania."

Ba la'a roti ni'ohe niha satua da'ö irege abuso ira, ba hiza so nasa zi töra. Me'i'ila roti sitöra da'ö fandrita, tumbu wa'afökhö dödö ba dödönia. Imane tödönia, "Utagö dania roti da'ö."

Meno awai manga ira, ba ilau mörö niha satua da'ö. Me no mörö ia, ba ihalö zi töra roti nomege fandrita Santo Nikolas, ihorigö i'a."

Me maoso niha satua da'ö, i'alui gönia roti si lö ahori la'a mege, ba hiza'i lö hadöi isöndra. Andrö ilau manofu khö wandrita. "Hezoso gögu roti? Haniha zimanga? Hadia ya'ugö, fandrita?"

"Tenga ya'o," imanö fandrita.

"Lau, lö salania," iŵa'ö niha satua.

Aefa da'ö latohugö wofanö. Ba ofeta ira ba zi sambua öri. Ono razo nöri da'ö, ononia alawe, mofökhö sabölö-bölö. Ba no ibe'e goroisania razo nöri da'ö wa gofu haniha zamadöhö ononia alawe la'amualagö khönia zi matonga nöri, ba hiza'i gofu haniha zi tebai mamadöhö lataba mbaginia.

Ba möi ira ba nomo razo samatörö öri andrö, ba laŵa'ö wa same'e dalu-dalu ira. Me no awai la fareso ira, ba latehegö khöra möi ira yomo. Ba la andrö ena'ö latehegö khöra sambua mbate'e, idanö, sara mbalatu saöndrö, ba sambua meza sebua. Fefu ni'andröra andrö ba la be'e khöra. Ba laböbö nono alawe, ono razo andrö ba dete ba meza, la ö'ötö, lasasai, ba lafuli lafahalö. Aefa da'ö, iwuwusi ia niha satua da'ö. I'anemaisi fahalö fefu mboto nono razo andrö ni'ö'ötöra no mege, ifuli auri, lö sambö ia hadia ia.

Omuso sibai dödö razo irege i'amualagö khöra oya gana'a ba firö. Niha satua andrö ihalö ma'ifu, sibönö nituyu duturunia sebua ba dua duturunia tanöbö'ö. Ba fandrita Santo Nikolas, i'oyakö wanga'i, irege afönu kabe-kabenia. Mohede khönia niha satua da'ö, imane, "Aine da tako'o gefe da'a ba da tatohugö wofanö ba wamadöhö niha.

Latohugö wofanö ba larugi nöri tanöbö'ö, ba hiza salua ba nöri nirugura andrö ba no simane ba nöri niröira: ono alawe razo ba nöri nirugira andrö mofökhö sabölö-bölö, ba no la hönagö mbuala sebua ba niha sitola mamadöhö ono razo andrö. Hiza'i ba zi samuza da'a, tumbunö ba dödö wandrita safökhö tödö da'ö wangokhögö fefu mbuala andrö. Börö da'ö möi ia samösa ba nomo razo, iŵa'ö khö razo tola ifadöhö nono razo andrö. Ba i'andrö ena'ö la asogö khönia fefu ngawalö wakake simane ni'oguna'ö niha satua me'ifadöhö nono razo ba nöri si'oföna. Ba ifalua simane nilau niha satua da'ö, i'ö'ötö mboto nono razo andrö. Hiza'i, me ifuli ifahalö ba iwuwusi, lö möi fahalö. Ifangörö wolau, ba lö hadöi salua hadia ia.

Mahemolunia, me'i'ila razo wa lö i'ila ifadöhö nononia fandrita, ifaretakö ena'ö la taŵigö wandrita andrö. Ba dalu wa'ata'unia, i'andrö fandrita ena'ö latehegö khönia i'alui ndramatua satua sifao khönia ba zilalö. Me falukha ira, i'akui zalania.

Mangawuli ira ba nomo razo. No lafali'ö tali ba mbagi wandrita, ba manofu khönia niha satua da'ö, imane: "He fandrita, haniha zimanga rotigu?" "Tenga ya'o," imanö fandrita. Ba lasöbi tali si no lafali ba mbagi wandrita irege tefazawa ia sambua beka. Ba ifuli manofu khönia niha satua da'ö, ba fanemania simane fehedenia silalö. Si'afuriania me arakhagö maulu tefesu mbaginia, i'akui zalania fandrita: "Ya'o! Ya'o zimanga roti da'ö!

Me no mangaku ia, ba imane niha satua da'ö khö razo, "Tehegö khögu wotandraigö mamadöhö onou alawe andrö. Na lö döhö, faogö ndra'o ötaŵi." Aefa da'ö, ifahalö mboto nono razo andrö niha satua da'ö, iwuwusi, ba hiza ifuli auri nono alawe razo andrö.

Ba i'amualagö khöra gana'a ba firö razo. Me mangawuli ira, ibagi tölu gana'a ba firö da'ö niha satua da'ö. Manofu wandrita, "Ha darua ita. Hakhö öbe'e si sambua faosatö gana'a da'ö?" "Tana khö niha simanga rotigu," imanö niha satua da'ö. Me irongo da'ö fandrita, imane: "Ya'o zimanga roti da'ö! Ubaya hölu." Itema li nia niha satua da'ö, "Na simanö, halö fefu gana'a da'a, fao amöi tana khögu. I'otarai ma'ökhö, angawuli ba falua halöwö wa'a'enoni ba gosalimö soroi sibai ba dödöu. Böi sa'ae so khöu wa'olu'a-lu'a, ba böi sa'ae böbözi Santo Nikolas faoma onokusimö." Me no aefa iwa'ö wehede da'ö, ba izumaigö taya niha satua da'ö.

Nifa'anö: Mestika Hulu

Nitöngöni

Omuso dödögu na öfazaewe nidunö-dunö andre ba media sosial ma Internet. Hiza i be'e fao gumbu heza tehalö ia. Be ba gahe zura: Moroi ba Wikibuku Nias. Nifa'anö Mestika Hulu. Aila ita ba niha na lö öbe'e gumbunia, me öhalö töiu zi tenga töiu.

Fabaliŵa lala

Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö