Wb/nia/Fanari ba Zitalu Mbongi

Me föna, so samösa razo ba danö Rusia, Eropa, si no iröi ia fo'omonia. Moroi khö wo'omonia si no ahuwa andrö, felendrua nonora, ono alawe manö. Fefu nononia ba oi mozökhi, baga-baga mbawa, töra moroi ba nono alawe tanöbö'ö ba zi sagörö soi nikuasoi razo andrö.

Ba so sambalö zahöli-höli dödö Razo, ero bongi ononia sifelendrua niha oi mofanö ba nahia si lö i'ila hezo. Lö göi i'ila hamega mangawuli ira. Manofu-nofu manö dödönia, hewisa watola badagahera oi oluo, mane nifake sarawongi manari. Lua-luania, ero ma'ökhö i'öli mbadagahe sibohou khö ndraononia razo andrö. Ha'uga kali inaö'ö wanofu ba no tebai nisusugi ira ba mbate'era. A'oi mörö sabölö ira. So zohago-hago.

Börö da'ö ba omasi sibai ia i'ila hezo möi ndraononia ero bongi ba hadia manö nifaluara ba zi sagötö bongi andrö. Ba lö ara aefa da'ö ifalua gowasa razo. Fefu ndra si'ulu ba salaŵa wareta ba zi faola banua, awö nono mbanua, lakaoini ba owulo möi ira ba gowasa andrö.

Me no tohare fefu dome, ba muhede razo. "Haniha zi tola manöndra nahia sero-ero la'ondrasi iraonogu, ba na ono matua ia ba tobali umönögu. Samösa nonogu alawe ubali'ö fo'omonia. Tenga hada'ö nasa, matonga moroi ba danö gamatöröŵagu ube'e ba dangania."

Melarongo da'ö niha sato, ato ndraono matua si hino döla fao ira ena'ö tola tobali ira umönö razo. La'alui lala ena'ö tola lasöndra nahia ni'alu-alui razo andrö. Ba no samigu, samösa lö sangila motahö hezo nahia möi ndraono razo.

So samösa nono matua ono salaŵa ia, ba hiza no aekhu ba wa'anumana, imane khö razo, "Amagu razo, tehegö khögu da utandraigö u'alui nahia ndraonomö andrö!"

"Lau, labu'ögö. Ma sa tola ösöndra nahia andrö," itema linia razo.

Ono matua ono zalaŵa andrö ibörötaigö i'alui he zo möi ndraono razo. Ba dödönia side'ide, sindruhunia ya'ia samösa lö sibai aboto ba dödönia hadia lala nitörönia. So wangiwa dödö khönia, arörö simane niha si no manandraigö ba me lö lasöndra nahiara gurunga.

"Na lö usöndra, eluahania kurunga nahagu. Ibörötaigö abu dödö nono zalaŵa andrö.

Me ilau modaodao ba golayama nomo razo ba tamanu-manu ia. Edöna mangawuli ia ba nomo, ba so samösa ndra'alawe, no atua sa'ae, isofu khönia.

"Hana no tamanu ndra'ugö, nogu. Hadia ni'era-eramö?"

"So sambua halöŵö sebua gawe, lö u'ila hewisa wangalui naha hezomöi nono razo ero bongi," imanö ono matua andrö.

Me irongo da'ö aweda, ba imane khö nono matua andrö, "Abua sa dahö-dahö da'ö, ba böi busi dödöu, oi so lala. Ya'e dofi andre, na öfake ba lö la'ila ndra'ugö niha."

I'anemai'ö tagoyomö mbawa nono matua andrö. Omuso sibai dödönia me so wanolo silö idöna-döna, tofi fombini'ö.

"Sambalö tö,duma-dumania, na la'ila ndra'ugö ira ono razo andrö, ba na labe'e öu nidanö famanuköu ena'ö alau höröu, böi badu! Oduwagö'ö nidanö andrö ba naha wemörömö," imanö aweda.

Ihalö dofi fombinö'ö andrö ono matua ono zalaŵa.

Me no bongi ba möi ia ba nomo razo, la be'e nahania ahatö ba mbate'e ndraono razo. So samösa nono razo, ba ifasao nidanö ba i'andrö ena'ö ibadu ono matua ono zalaŵa andrö.

"Badu da'a ena'ö aoha mbotomö," imanö ono razo samasao idanö andrö.

Itema nidanö ono matua ba i'osamadu idanö andrö ia, ba me no mofanö nono razo andrö ba i'oduwagö'ö. Igo'ö niŵa'ö gaweda khönia.

Ofeta talu mbongi, laligi'i hadia nomörö nono matua ono zalŵa andrö. Ba i'osimörö ia, i'ila wa so zohörö-hörögö ya'ia.

"No mörö niha so zago ya'ita. Talabu mofanö ita," imanö samösa ono Razo.

La'onukha mbaru sibaga ba badagahe sibohou. Ifadege waratenia ono razo sia'a. I'anemai'ö teboka mbawandruhö lalara ba we'amöi ba mbanua razo narödanö, razo ni'elefi ia.

Latörö nora si tobini ba mbawa ndruhö siteboka andrö.

Maoso nono matua nono zalaŵa ifake dofi fombini'ö ni'amualagö gaweda khönia ba igo'ö ndraono razo. Ba lö i'odödögö, ihundragö gahe mbaru nono razo siakhi. Tokea ziakhi, ba ifakhölö ia lö niha furinia.

"Haniha zohundragö barugu." Ikaoni ndra ga'ania i'ombakha'ö wa worasoinia so niha zohundragö ahe mbarunia. Manutu dödönia. "Arörö alua hada-hada'ia he."

Ba lafakhölö ia ira ga'ania, samösa lö niha bö'ö baero ira.

“Ah, dörö föfö wangifiu da'a. Lö niha bö'ö ba da'a." Imanö ono numero lima fao ifatörö hörönia ba zi fasui nahia siso ya'ira.

Irongo fefu hadia nidunö-dunö ndraono razo andrö ono matua ono zalaŵa solo'ö ya'ira. Me irugi sambua kabu mbunga, ba i'ila oya mbunga ana'a ibörötaigö mamoka mbowonia. Ba ifatö sara mbowo mbunga ana'a andrö, ba i'enemai'ö terongo li sihulö dorofe ba modögö ma'asagörö kabu.

Tokea ndraono razo.

"Mirongo da'ö!" Imanö siakhi. "No lö sökhi ginötö, alai na alua zambö baga da'a." Ifangelama ndraga'ania siakhi.

"Da'ö li dorofe moroi ba nomo razo ni'elifi," imanö sia'a.

Meno larugi nahia razo narödanö razo ni'elifi, ba latema'ö ira faoma li dorofe, ngawalö waritia ba so göi göndra. Labörötaigö lafoli damburu wanari. Famaena ndraono razo. Manari ira fao samösa sanari onomatua ero samösa ira. Lalau fagohe tanga, ba itaria fatalagu ira, ba lalau manari ba zitalu mbongi. Latöngö nawöra wanari hulö watöngösa fa'omasi, safönua fa'akhari-khari dödö nono alawe khö nono matua si no faoma mangomasi'ö.

No oi somuso tödö ndraono razo andrö. Lahene fefu golayama wanari lafaudugö ba li damburu. Ofeta ahatö moluo ba lalau manö manari irege ogoluo sa'ae mbadagahera.

Me inötö ndra sohalöŵö mamaosa nidanö, ba ihalö sambua soloki önia ono matua ono zalaŵa. Aefa ibadu, ba i'irö'ö soloki andrö ba nono mbarunia.

Moluo, oi miwo manu, ba labato wanari ono razo la'aliokö gahera mangawuli ba mbate'era zamösana. Fatua lö maoso namara ba no oi lafohani ira, ba aösö lalau mörö.

Maoso razo ba ifakaoni'ö nono matua ono zalaŵa.

"Hewisa, hadia no'ösöndra nahia zaŵatö ndraonogu alawe ba?"

"Sömbagu amagu razo. Naha razo ni'elifi siso barö danö, ba da'ö möi ndraonomö ero talu mbongi ofeta moluo. Lalau manari ba da'ö." Imanö wanema li razo ono matua andrö.

Ikaoni fefu ndraononia razo ba dalu luo, Me no oi owulo ira, no aefa manga ira, ba fahuhuo razo khöra.

"Hezo manö mi'otarai ero bongi. Hana wafefu ogoluo mbadagahemi? Böi falimo, miŵa'ö zindruhu." Ebua ba alaŵa na'ifu note li namara razo.

"Lö'ö sofanö-fanöga amagu razo. No so ndra'aga ba mbete'ema," ononia sia'a itema li razo. Felezara ndra akhinia no agata'au, lafaköu ira, latöngö dalu zalo. Lö nini-ninira.

Ba ihalö mbowo mbunga ana'a faoma galasi soloki moroi bakha ba nono mbarunia ono matua ono zalaŵa. Ibe'e ba danga razo.

Oi tokea fefu ndraono razo. Oi ahöli dödöra hana watola igo'ö ira ono matua ono zalaŵa andrö. Mangaku wasala sa'ae ndraono razo andrö khö namara.

Omuso dödö razo me no sa'ae teboka nibalugö, no tefaehagö nibini'ö. Ere tuka ba nomo razo ifaretagö ba wondruhö ba niba'agö faoma bagolö döfaö nilasi mbawa ndruhö si fatöla ba nomo razo narödanö ni'elifi si so barö nomora.

Dua wongi aefa da'ö, ifalua simane gatö-atö si no iŵa'ö razo. Ifangowalu nononia siakhi khö nono matua ono zalaŵa. Lalau zui gowasa sebua. Aduwa niha sato. Ba fefu ndraono matua si so ba gurunga labe'e aefa ira. Omuso dödöra göi tola falukha ira nösi nomora.

Ohahau dödöra sa'ae ba tobali tambalina ia khö razo. Tana khönia simatonga moroi ba danö nikuasoinia ituturu khö numönönia.

Nifa'anö: Apolonius Lase

Nitöngöni

Omuso dödögu na öfazaewe nidunö-dunö andre ba media sosial ma Internet. Hiza i be'e fao gumbu heza tehalö ia. Be ba gahe zura: Moroi ba Wikibuku Nias. Nifa'anö Apolonius Lase. Aila ita ba niha na lö öbe'e gumbunia, me öhalö töiu zi tenga töiu.

Fabaliŵa lala

Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö