Wb/nia/Fanörö Tödö Fa'auri Si Lö Aetu

'Fanörö tödö fa'auri si lö aetu' no sambua to'ölöŵa ba niha Keriso ba Danö Niha ba wa moadu lewatö niha nösi nomo. Ba ginötö andrö ba oi möi niha labarasikö lewatö, laheta ndru'u, la bözöni. Ba na no awai, ba la'osara'ö dödö ba wangandrö khö nama ba zorugo.

Famalua halöŵö andre la'osara'ö ba migu si'öfa ba mbaŵa si Felezara (November). Samigu föna'ö, no la'ombakha'ö ba gosali ena'ö fefu niha latörötödöra nösi nomora si no oföna ikaoni Sokhö.

Ba ginötö molowi lewate ba latörö tödö hewisa mböröta me auri ia, hewisa wa'omasinia. Alua daŵa hörö me abua sibai wabalisa, mendrua me lö sa'a tola falukha ma fahuo-huo simane niha sauri.

Hana wa mufalua ia?

Ba wamati Niha Keriso ba lafaduhusi tödö wa niha si no mondröi ulidanö ba no toföfö nahiara ba gulidanö tou ba hiza nosora ba ginötönia dania te'ohe ba nahia si lö aetu. So dombua nahia si lö aetu, ya'ia zorugo ba narako.

Nahia si lö aetu andrö eluahania lö sa'ae fa'amate simane niha sauri ba gulidanö ia da'a. Andrö dania latötöi ia nahia si so fa'auri si lö aetu.

Niha nifetaro ba narako, ba lö irai mate ia, irasoi hola-hola galitö, aukhu, ba famakao si lö aetu sagötö-götönia. Lö hadöi niha gulidanö sangila wa'anau ma zu'a-su'a ginötö andrö, me no alua ia molo'ö ginötö Zokhö

Fabö'ö nirasoi niha nifetaro ba zorugo. Lö göi irai mate ira sa'ae. Ero inötö halöŵöra manunö, manari, ba wamaosa wanunosa khö Yehowa.

Tötönafö niha sauri

Niha sauri ba idöna-döna ena'ö ösi nomora si no mondröi ulidanö tola lasöndra wa'ahakhö dödö Zokhö. La'andrö khö nama ba zorugo ena'ö Itehegö nahiara dania ba zorugo. Ba hiza fangandö niha sa'auri simanö, molo'ö wamati nifaduhusi tödö moroi ba Daroma Li, lö möi dane-dane wamulö'ö naha nihonogöi khö zamösana. Hadia nifalua niha me inötö auri ia ba gulidanö, hadia si sökhi ma si lö sökhi, da'ö zu'a-su'a nifahela, hadia abua tanö ba narako ba ma abua tanö ba zorugö. Irena simanö, Sokhö, ama ba Zorugo, somböi fefu ngawalö hada'ia, da'ö zo tatugui samösa niha möi ba zorugo ma ba narako.

So ba zura, ha niha si no tesura töi ba Mbuku Wa'auri, da'ö zi möi ba zorugo.

"Ba u'ila zi no mate fefu, he satua, ba he iraono, föna dadaoma andrö so ira, ba tebokai zura; ba tebokai zura bö'ö, ya'ia zura wa'auri andrö. Ba tehuku zi mate andrö, balazi nisura ba zura andrö, dali mbua-buara."

Ba na so zi lö musöndra töi, na lö mutanö ba zura wa'auri, ba tetibo'ö ba mbaŵa alitö andrö.

Hadia moguna ia?

Famalua fanörötödö fa'auri si lö aetu andre silö'önia so tölu wa'amogunania.

• Siföföna, mamoadu lewatö ena'ö sökhi wamaigi. Mendrua nalö mubale kara ma na lö musime, ba alio afönu du'u ba tola-tola taya, lö mu'ila mu'osisi'ö nahiania. Moguna lasese, laheta ndru'u sakali döfi. Heŵa'e tola lafalua göi ero-ero molo'ö wa'aso ginötö zamösana.

• Sidua, mangombakha khö niha sa'auri wa ha ba ginötö auri andre tola öhonogöi hezo möi'ö dania na öröi gulidanö. Na omasi'ö möi ba zorugo ba haogö mbua-buamö, o'ö hadia niŵa'ö ba Daroma Li-Nia. Ba natenga da'ö, ba narako nihiada.

• Sitölu, mangowuloi si sambua omo si fatalifusö irege tola orudu. Inötö da'ö tola te'oguna'ö falukha ba monönö ba aheta wa'asöndru dödö.

Fabaliŵa lala

Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö