Wb/nia/Fahuwusa ba nawö

Lö alölö afo wolombasema ba lafo si so ba ngai lala wangawuli ba nomo, mangawuli ga'ada si siga-siga moroi ba fasa. Awena ulau mudadao, ufakhölödo furi, eh Ka'uco itendro'ö gureta sebuania föna lafo.

"He Uco, ya'ugö i da'a. Heza ö'otarai?."

Ilau mudadao Ka'uco gamaudu fönagu, so meza gotaluama. Sifao i'osi mböböinia, ifahasu ia ba itema ligu: "U'otarai fasa, ga'a. No fasala wamondrongogu turia, wa ma'ökhö andre so wondrozi böra moroi ba zamatörö khö niha sinumana."

Hemmm, ufahasudu, uhalö nafogu si so ba mbolambagogu. Hiza lö utohugö wanofu khönia, ulau muzizio, ba ufahatödo föna sitele lafo.

Isofu khögu Sibaya Hezaya, "Hadia mibadu ga'a? So zaukhu ba so zokafu."

Ufalaha ma'ifu wanema linia. Na lafa'ele'ö khö Ga'uco wamadu saukhu, lö dombua wehededa, ha ba nibadunia da'ö. U'andrö ena'ö ifazökhi öma kofi susu, "He Sibaya Hezaya, akao ndra'ugö, fazökhi öma dombua kofi susu."

Ba zi lö ara sibai, i'ukhugö nidanö saukhu, ba ifazökhi öma kofi susu.

Fa'ofeta göma kofi susu, i'anema'ö ibörötaigö mbude-budenia Ka'uco. Afökhö dalugu wa'igi ba hikaya nitutunönia.

Usofu khönia, "He zo ösöndra-söndra khöu waö-waö hikaya da'a?"

Ha ihekhe manö mbo'ö khöda Ka'uco. Aetu hie dödögu wa'igi. Lö ösi-ösi hikaya nitutunönia. Hiza fa'onekhenia wanutunö da'ö zama'igi niha samondrongo.

Börötania, usofu khönia umane, "Harumani wa ökaokö sibai wombaloi ondrozi böra da'ö. Te no oi aboto ba dödöda wa ha khö niha sinumana latandrösaigö."

Ba wanofugu andrö, ba da'ö ibörötaigö wanutunö hadia zalua Ka'uco. Sifao fa'igi itema ligu, imane, "Tenga simanö, Pa Lase. Sindruhunia lö omasido wanga'i böra andrö. Hiza no latagö gefe menewi ba zibongi."

Tokea ndra'o ba wamondrongo niŵa'ö Ga'co, irege adö'ödo. U'anema'ö linia, "Hewisa sa le, Uco. Haniha zanagö kefeu."

Ma'ifu lö hadöi khögu fanahö tödö wa huhuonia andrö ha bude-bude. Itema ligu, no ihölu-hölu'ö, imane, "Ya'ia, Pa. Onali möido ukaoni ami. Hiza lö omasido fao ami ba wa'abu dödö."

No i'osindruhugö wanutunö Ka'uco, ma'ifu lö oroma wa ha bude-budenia.

Ifakea-kea röngö-röngönia khögu Sibaya Hezaya. Ba börö me no uhaogö wamondrongo, lö mamö'ido me ifaigi ndra'o Sibaya Hezaya.

Ifuli zui itohugö Ka'uco hewisa waö-waö wa'ataya gefenia. Usofu khönia umane, "Harumani wa lö taraso khöu me lahalö gefemö andrö?"

Ifahasu ia ba i'osabutödö salakhania nomege. "Ya'ia, Pa Lase. Fatahö-tahö ndra'aga zanagö kefegu. Hiza daöfaga ba mbalö meza. Ha ndrege alölö afo, sase lö sitoröi ba kofe-kofegu."

Me ifatunö wa fatahö-tahö ira zanagö kefenia andre, awena u'ila geluaha kea-kea hörö Zibaya Hezaya, wa no ibe'e khöda huhuo wangafi Ka'uco ba zitanö'owi andre. Hehehe, aetu hie dödögu wa'igi. Ya'ia khö Ga'uco, no isöndra-söndra niha sanagö sifatahö-tahö.

Hiza oroma sibai hewisa wahuwusa ba nawö niha ba Danö Niha. Heŵa'ae no ahori gefe Ga'uco ba wamaisa simane nitutunönia, ba ifatunö khöma wa lafuli khö Ga'uco ösa gefe simöna ira ya'ira simöna andrö. Ba da'a ta'ila wa tenga mangodödögö ba wangalui hare. Ha röröra me owulo ira ba zisambua lafo.

No tehöngö Nono Niha wa ebua wa'omasi ba nawö. Lö su'a-su'a sitobali famaedonia. Na mohalöŵö Nono Niha ba zisambua nahia, labe'e sibai ba dödöra halöŵöra, ba labelegö ira ba ngawalö zama'ala nahia sohalöŵö ira.

... edöna mutohugö

Fabaliŵa lala

Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö