Wb/nia/Dedaulo ba Ikaro
Mino, Razo Kireta, no samösa Razo fondrege ni'ata'ufi. Samuza ma'ökhö ifaohe'ö goroisa khö Dedaulo, samazökhi adu. "Ae'e ba hulo khögu awö nonomö matua," sinura Razo Mino. "So halöŵö nibe'egu khömö."
I'ohe nononia matua Dedaulo sotöi Ikaro. La'alio'ö we'amöi ba göfa nasi si lalö ba Kireta. Itema'ö ira razo ba gödo sebua sibai ba Konoso. "Omasido u'azökhi lala side-ide soya köi-köi barö danö tou gödo andre," fareta Razo Mino. "Böi fatunö da'a khö niha bö'ö. Omasido lala side-ide saköi-köi, si lö samösa niha sangila lala ba we'amöi baero."
Ambö aboto ba dödö Dedaulo wa omasi sibai razo wangazökhi lala side-ide saköi andrö. Bahiza he ya'ia awö Ikaro la'o'ö hadia ia goroisa razo ba labörögö wohalöŵö. Me no awai la'azökhi, i'ila mbini'öta razo Dedaulo. Sindruhunia lala da'ö mubali'ö kurunga. Ba gurunga da'ö, ba ikuru sageu zauri sata'u niha sotöi Minotauro, heza moboto ia hulö niha ba mohögö ia mane öröbao.
Me i'ondrasi razo Dedaulo ba wangandrö böli halöŵönia, lö itehe khönia Razo Mino. "Ha ya'ugö ba onomo zangila lala we'amöi bakha awö lala we'amöi baero moroi ba lala saköi-köi ni'azökhimi da'ö," fo'ao Mino. "Lö utehe aefa ami."
Ba ikaoni ndra saradadunia razo, ba la'ohe Dedaulo awö nononia wofanö. Lakuru ira ba nahia salaŵa sibai. Heŵa'ae sökhi nifalua khöra, no muhi'a dödöra ba woloi moroi ba gurunga andrö. I'ila Dedaulo wofo si hombo moroi ba hulo da'ö lumalö ba nasi. Ibörögö mangera ia ba isöndra lala.
Ero ma'ökhö, ibe'e gö wofo sanauge ba zandrelania ba idödöni ngarozi mbulura. Me no mowaŵa sa'ae, ibörögö wohalöwö ba zi lö la'ila-ila niha, ena'ö lö la'ila hadia ia nifaluania ndra sozago.
Samuza ma'ökhö, ahulöwongi isusugi Ikaro Dedaulo. "No awai fefu," ngöngönia, "talau mofanö." Ba tokea Ikaro me i'ila namania mondröni öfa ngawua gafi niböbögö faoma lili moroi ba narö waratera.
"Osindro," fehede Dedaulo khö Ikaro. "Da uböbö gafi da'a ba dangamö awö ba galisimö." Ba ifahaö Ikaro ba wamöbö afi andrö ba galisinia. "Atö fofanö khöda," fehedenia. "Hatö'ögö ba zandrela."
Ba lalau muzizio ba ngai zandrela. Ifaigi si tou Ikaro. "Ata'udo," fehedenia ba wanizi-nizinia. "Hadia ta'ila moloi ba gafi da'a?" "O'ö manö ndra'o," fehede Dedaulo, "ba ögo'ö hadia ia nifaluagu. Böi adogö'ö wohombo ahatö dete nasi, ibasöi gafimö tefe-tefe nidanönia. Böi göi alaŵa'ö wohombo, ombuyu lili si so ba gafimö ibe'e sino."
"Lau, ofönado he," mu'ao Dedaulo ba manaoka ia moroi ba ngai zandrela. Ifaigi ia Ikaro me manaoka ia si tou ba me ibologö gafinia. Ba itaha mbadunia Ikaro sabata, ba ilau manaoka aefa da'ö. I'aekhugö ia si tou. Lö ara ba irasoi itaha ia ba dalumbanua gafinia si no ibologö. Ba muhombo ia ida'i-da'i ahatö khö Dedaulo.
"Baga sibai da'a," fe'aonia. "Atulö-tulö wa ta'ila talau muhombo."
Ba lalau muhombo laröi hulo andrö. Lalau moloi moroi ba gurunga si so ira. Omuso sibai dödö Ikaro irege muhombo ia ahatö ba tete nasi ba aefa da'ö ilau ia ahatö ba zino. Olifu ia zagö-zagö Dedaulo ena'ö böi ilau muhombo ahatö zino. Ilau muhombo sate lumalö. Ibörögö göi ombuyu lili si so ba gafinia börö me göna wa'aukhu zino, irege atoto mbulu si so ba gafinia.
Ba ifaigi ia Dedaulo ba wa'ata'u me i'ila aekhu si tou Ikaro ba nasi hulö wa'aekhu gara, ba aefa da'ö ahöndrö ia. Lö si tola ifalua ba wanolo ononia. Ba wa'abu dödönia, ba itohugö wofanönia. Ilau muhombo ba ofeta ia ba danö Sisilia.
Nitöngöni
[edit | edit source]Omuso dödögu na öfazaewe nidunö-dunö andre ba media sosial ma Internet. Hiza i be'e fao gumbu heza tehalö ia. Be ba gahe zura: Moroi ba Wikibuku Nias. Nifa'anö ???. Aila ita ba niha na lö öbe'e gumbunia, me öhalö töiu zi tenga töiu.
Fabaliŵa lala
[edit | edit source]Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö