Wb/nia/Buaya si Falimo
So sambua nidanö sebua bakha ba gatua. Ba nidanö göi andrö, so ngawawa mbuaya sauri ba da'ö. So zola'a afusi, aitö, ba ohawu-hawu. Heŵa'ae na no fabö'ö-bö'ö la'a gulira, ba lö irai fa'udu ira.
Ba gotalua mbuaya da'ö, so göi Razo mbuaya, heza fondrege zebua boto. Tobali Razo ia ba gotaluara. Sökhi wamatörönia irege la'omasi'ö ia buaya sato.
Ba zisamuza inötö, ilau lökhö sara sibai. Ibörögö oköli ndru'u. A'oi zara otufo mbawa nidanö. Ba oya zimate gaurifö simanga du'u.
Simanö göi ndra buaya. Ibörögö itörö ira fa'olofo, me lö lasöndra göra. Ba mate ira fazambu-zambua.
Ero ma'ökhö ba so manö mbuaya sangondrasi razo. La'ombakha'ö zigöna ndra mbuaya sato. Me irongo da'ö Razo, ba abu dödönia.
Harazaki me so nasa khönia nagole mböhö awö zaŵi. Edöna dödönia ba wombagisi khö mbuaya sato.
Ba ikaoni mbuaya safusi faoma mbuaya saitö Razo mbuaya. Imane wehedenia, "Ufatenge ami ba wombagi-mbagisi nagole andre. Ero sihulöwongi mihalö ia ba da'a. Mibagisi ba nawö-nawömi sato!"
"Hasambalö mafalua ia," fanema mbuaya saitö awö zafusi faendronga.
"I'otarai ma'ökhö, mibabaya!" oroisa Razo mbuaya.
Ba mangona mbuaya sidarua khö Razo. Sögö möi lahalö nagole si no muhönagö. Lö ara aefa da'ö, ba mofanö ira ba wombagi-bagisi ba zato.
Ibagisi gö fagölötö buaya safusi. Lö hadöi samösa mbuaya si lö tefatutu. Fabö'ö göi ba mbuaya saitö, noa awai i'a gö sinangea ibagi-bagisi. Ba itugu ebua dalu mbuaya saitö.
Me no awai labagi-bagisi gö, ba möi ira la'ondrasi razo.
"No ufalua halöŵögu simane goroisa duagu razo," fehede mbuaya safusi.
"Sökhi sibai nifaluami. No mifalua fefu niŵa'ögu," isuno ira Razo.
Samuza ma'ökhö me no aefa labagisi gö, ilau ia ba naha mbuaya saitö buaya safusi. Tokea ia me ilau mamakhölö. I'ila oya goboula mbuaya ba zifasui.
Lö aröu moroi ba da'ö, ba oroma mbuaya saitö ifandrai-ndrai wemanga. I'ondrasi ia buaya safusi mege no.
"Hadia ö nibagisi ba danöbö'ö ni'amö andrö? Ötehe ira lataögö olofo!" fehede mbuaya safusi.
"Böi be'e ba hulugu zi lö nifaluagu!" fanema mbuaya saitö.
"Ba hiza, faigi zi so fönamö atö!" fehede mbuaya safusi me ituturu sageu mbuaya si no mate.
"Ya'odo zolau da'ö, böi halö tana khöu! Noa sa u'a dana göra, hadia zomasi'ö?" fanema mbuaya saitö.
"Sindruhu khönia ndra'ugö andre!" fehede mbuaya safusi ba i'anema'ö i'uduni mbuaya saitö. Tebai latimbagö wa'udusara. Faoma laforoma'ö wa'abölöra. Börö me no abuso mbuaya saitö, ba lö abölö-bölö ia. Irege ŵa i mangala ia khö mbuaya safusi.
Ba la'ohe mbuaya saitö föna-föna Razo. So göi ngarozi mbuaya si fao awöra ba lala. I'ombakha'ö gamuata mbuaya saitö buaya safusi. Me no irongo wamaduhu'ö moroi ba mbuaya tanöbö'ö, ba i'etu'ö huku nibe'e ba mbuaya saitö Razo.
"Me no isawö goroisagu, ba nibunu ia börö wa lö sökhinia. Ya'ugö buaya safusi, me sadölö tödö ndra'ugö me molo'ö. Na no dania mate ndra'o, ya'ugö zi tobali Razo fangaligu," simanö goroisa Razo khö mbuaya safusi.
Nitöngöni
[edit | edit source]Omuso dödögu na öfazaewe nidunö-dunö andre ba media sosial ma Internet. Hiza i be'e fao gumbu heza tehalö ia. Be ba gahe zura: Moroi ba Wikibuku Nias. Nifa'anö Tiru Zendratö. Aila ita ba niha na lö öbe'e gumbunia, me öhalö töiu zi tenga töiu.
Fabaliŵa lala
[edit | edit source]Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö