Wb/nia/Bualalangi Ana'a

Meföna so samösa nono'alawe side-ide. He ama ba inania no oi laröi gulidanö. Fondrege wa lumana ia, lö omo heza toröi ia, lö bate'e heza ileagö ia ba ilau mörö ba ba zi lö arara tö ahori göi gö si ha ma'ifu si toröi khönia, nibe'e niha sahakhö tödö. Töra moroi ba da'ö, edöna lö'ö göi sa'ae baru sangolohugö boto tanö khönia.

Heŵa'ae ono silumana ia, no si sökhi bakha dödönia, ba sangata'ufi Sokhö ia.

Ba börö me lö sondrorogö khönia, hatö khö Zokhö itou'ö wanötöna khönia.

Samuza ma'ökhö möi ia manörö ba gatua.

Ba falukha khönia samösa niha satua silumana. "Be'e ögu ösa gömö. Olofo sibai ndra'o."

Ba ibe'e khönia gönia balazo si ha ma'ifu. Lö sa'ae si tosai. Ba imane khönia niha satua andrö, "Yafao khöu howu-howu, nogu."

Ba me itohugö wofanö, lö ara falukha khönia samösa ndraono. "Okafu sibai delaugu. Tebai utaha. Be'e khögu nöumö."

Ba iheta mbala högönia ba ibe'e khö nono andrö. Ba ifuli itohugö wofanönia mibakha ba gatua satabö.

Ba falukha zui khönia samösa ndraono tanöbö'ö. I'ila maniri-niri ia ba wa'okafu. Ba tobali ahakhö dödönia khönia. Iheta nono mbarunia ba i'olohuni nono andrö.

Ba me arakhagö irugi dalu gatua, no göi arakhagö ogömi. Ba falukha khönia samösa nono'alawe. Oroma wa okafu sibai göi ia. I'andrö khönia mbarunia ono'alawe andrö. Ba lö i'ila hewisa wolau.

Ba imane tödönia, "No ogömi. Lö sa'atö la'ila niha wa lö baru-barugu." Ba iheta mbarunia ba ifowaru nono'alawe andrö.

Ba musindro ia ba dalu gatua lö baru-baru. Ba i'anema'ö agatoru mbulu gana'a si taki-takile moroi ba dalu mbanua, ihagaini nahia heza so ia. Heŵa'ae no i'amulagö mbarunia, i'ila wa no mobaru si sökhi ia iada'a.

Ba i'owuloi oi gana'a andrö. Ba i'otarai da'ö lö sa'ae mo'amböta ia ba wa'aurinia.

No isöndra mbuala langi ana'a. Isöndra howu-howu, fa'aebua dödö Zokhö, me si lö sinegu ia ba me ihakhösi tödö niha silumana, heŵa'ae silumana göi ia samösa.

I'otarai da'ö lakaoni khönia Bualalangi Ana'a, me tenga ha ana'a buala langi nisöndrania, bahiza tödö ana'a göi dödönia bakha.

Nifa'anö: Sirus Laia (Nifo'eluaha moroi ba li Jerman)

Nitöngöni

Omuso dödögu na öfazaewe nidunö-dunö andre ba media sosial ma Internet. Hiza i be'e fao gumbu heza tehalö ia. Be ba gahe zura: Moroi ba Wikibuku Nias. Nifa'anö Sirus Laia. Aila ita ba niha na lö öbe'e gumbunia, me öhalö töiu zi tenga töiu.

Fabaliŵa lala

Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö