Wb/nia/Belerofo ba Kudo Sohombo
No sa lafofanö Mbelerofo moroi ba mbanuania, bahiza somuso tödö ia ba wangiagönia gödo Razo Foretu. Fefu mowaö-waö sökhi irege samuza ma'ökhö ifatunö khö razo fo'omonia wa no ilau li si lö baga khönia Belerofo. Lö i'ila razo wa faya niŵa'ö wo'omonia, bahiza mofönu sibai ia. Edöna ia ba wamunu Belerofo. Bahiza i'ila wa mamunu tomenia andrö manga'asogö fönu ndra sokhö fa'abölö ba tola alua khönia zi lö sökhi.
Ena'ö tola ibunu Belerofo, ba muhede razo khönia, "Ohe zura da'a khö Lobate, Razo Lisia." Lö manahö dödö Belerofo, ihalö zura andrö ba lö i'ila sa wa ösi zura andrö no fareta khö Razo Lobate ba wamunu ya'ia.
Ba itörö lala saröu Belerofo. Me irugi gödo Lobate, ba itema'ö ia razo. I'irö'ö razo zura moroi khö Woretu irege olifu ia wamokai me no irugi sa'ae siŵa ngaluo. Me ibokai zura andrö, ba no tohöna omasi ia gamuata Belerofo, ba i'ila wa tebai ilau zi lö sökhi khö domenia.
Ba itörö tödönia Zimaera, sambua zauri sohögö zingo, soboto nambi, ba so'io ulö. "Omasido nonomatua si lö fa'ata'u simane ya'ugö," fehede Lobate khö Belerofo. "Efasi mbanuagu moroi barö mbawania. No oya ibunu nono mbanuagu ba ifakiko danöra. No ato zanandraigö mamunu ya'ia, bahiza te'ala ira ibe'e. Faduhu dödögu khömö wa tola öbunu ia," fehede Lobate heŵa'ae i'ila wa no sabölö Zimaera ba hasambalö si mate Belerofo.
Ba i'o'ö nifa'ema razo Belerofo. Fatua lö ilau mofanö, ba falukha ia niha satua si bihasa. Muhede ia khö Mbelerofo imane, "Lö tola öbunu Zimaera andrö, lölai na ö'okudo Wegasu, ya'ia kudo so'afi safusi sebua. Bahiza ofeta iada'a, lö hadöi samösa niha si tola mangokudo ya'ia."
Ba lö i'ila Belerofo na ifaduhusi tödö niŵa'ö niha satua mege no ba i'alui Zimaera. Ba dalu lala, i'oroma'ö ia Atena föna-föna Belerofo. "Faogö khöu da'a," fehede Atena me ibe'e mböbö sinali nihaogö moroi ba gana'a. Lö fakhamö i'andrö saohagölö Belerofo, ba izumaigö ataya Atena.
Ba zisambua bongi, ba i'ila Wegasu Belerofo mamadu idanö ba zisambua ngöfi nidanö. Ikela-kela wofanö wamahatö ya'ia, ba ifazaumba mbömbö ba mbagi Wegasu, ba ibabaya börö me edöna Wegasu ba woloi. Ba hiza, tobali ahono Wegasu, ba möi yaŵa Mbelerofo ba hulunia.
Ba ifangafo gafinia Fegasu ba muhombo ia ba dalumbanua. Lö ara aefa da'ö, ba no aröu danö latöröi, he tanö salo'o ba he botohili irege i'ila tou Zimaera. Ba idöni mböbö mbagi Wegasu ba muhombo ira ahatö tete danö.
Iköu ia Belerofo ba wanimba alitö moroi ba mbawa Zimaera me so ia yaŵa ba hulu Wegasu. Lö göi göna khönia mbözi-bözi gio sihulö ulö si so biso. Ba ifana dalu Zimaera, ba awena ilau ba mbawania, irege mate Zimaera.
Mangawuli Belerofo ba latema'ö ia tobali sangefa'ö ya'ira. Omuso dödö Razo Lobate me no aefa ia moroi ba mbawa Zimaera, ba muhede ia khö Mbelerofo, "Halö fo'omomö nonogu alawe, ba ube'e khöu danö si tola ö'iagö bakha ba gamatöröŵagu."
Ha'uga fakhe aefa da'ö, ba tehöngö-höngö duria Belerofo ba wa'abölönia. Lahöni-höni ia niha na ero hezo manö möi ia. Börö me la'amedolagö ia simane sokhö fa'abölö, ba ibörögö ifaduhusi tödö wehede andrö. Ibali-bali tödönia wa hasambalö möi ia wangondrasi ndra sokhö fa'abölö tanöbö'ö. Ilau manaoka ba hulu Wegasu ba lalau muhombo ba hili Olifusu.
Mofönu sibai Zeuse, sondrönia'ö ndra sokhö fa'abölö. Ifatenge geto ba wanuo mboto Wegasu. Ba ifaligoi ia Wegasu börö me no tetuo ia irege aekhu Mbelerofo moroi ba hulunia. I'ila ia Zeuse me aekhu ia tou ba danö. Lö sa mate Mbelerofo, hiza'i mesokho ia. Fa'afökhö nitörönia me atö ya'ia samösa zanöröi tanö. Lö hadöi samösa niha sangahatö'ö ya'ia khö Mbelerofo börö me no i'öndru wönu Zeuse.
Nitöngöni
[edit | edit source]Omuso dödögu na öfazaewe nidunö-dunö andre ba media sosial ma Internet. Hiza i be'e fao gumbu heza tehalö ia. Be ba gahe zura: Moroi ba Wikibuku Nias. Nifa'anö ???. Aila ita ba niha na lö öbe'e gumbunia, me öhalö töiu zi tenga töiu.
Fabaliŵa lala
[edit | edit source]Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö