Wb/nia/Banua si Tobali Kara

Ba zisambua amatöröŵa, ba zisambua banua sebua, so samösa zaradadu si no ara mohalöŵö ba gödo khö Tsar. No ara fao ia khö Tsar ba i'ila fefu zo'amakhaita ba wasuwöta. To'ölö ia mamauze, ba si toföfö ia na monukha na ero owulo ero sihulowongi. Me arakhagö ahori ginötönia ba wa'asaradadunia, ba so zalua khönia si lö baga. Lö omasi ndra kafalonia ia, irege lafatörö khönia huku sabe'e. Sabu tödö ia, irege i'alui lala ba woloi.

Ilu'i tasi awö wanania, ba mangona ia khö ndra awönia. Lasofu lamane, "Hezo numalö ndra'ugö? Hadia so dödöu wefao ba gangowuloa zaradadu bö'ö?"

"Böi sofu da'ö, talifusö. Fadoli tasigu andre, böi angeragö zi lö baga si falukha khögu.

Ba mofanö ia lö tatu. Itörö gofu hezo lala ni'ila hörönia. He aröu, ba he ahatö, ifowaö-waö manö irege ofeta ia ba zisambua amatöröŵa. I'ila zozago bawandruhö ba manofu ia, "Hadia tola ulau molombase ba da'a?"

Ba ifatunö da'ö khö gafalonia saradadu sozago, ofeta tetohu irongo Razo. Ba ifaretakö Razo ba wolohe fönania zaradadu andrö, ena'ö i'ila hörönia. Ba i'ondrasi Razo saradadu andrö, heza fao khönia wanania awö mbaru wa'asaradadunia.

Manofu Razo, "Fatunö zatulö khögu ba ae'e ba hölu, hezo moroi ndra'ugö ba hezo numalö'ö?"

"Böi huku ndra'o Tua. Da ufatunö khöu wofanögu." Ba ifatunö fefu hikaya wa'asaradadunia ba i'andrö ena'ö latema ia saradadu bakha ba gamatöröŵa Razo.

"Lau na simanö," fehede Razo. "Barö mbawagu ndra'ugö, ba tobali sozago kabu bakha ba gödo ndra'ugö. So zambö baga zalua ba da'ö. Lö u'ila hadia ia zamakiko geu rorogöfögu. Öbe'e fefu wa'abölömö ba wanimba samakiko andrö. Si tobali ömögu, ba lö lafalua khöu zi lö sökhi ba da'a.

Fao dödö zaradadu andrö ba ibörögö izago kabu. Döfi no mulalöi, dua fakhe no mulalöi, lö hadia-hadia ia zalua ba kabu. Hiza'i me döfi si tölu, me ifasui kabu, i'ila matonga moroi ba ngarozi geu si sökhi no mufakiko.

"He Lowalangi, haniha zamalua da'a?" fehedenia. Na i'ila Razo da'a hasambalö nihuku ndra'o ba nitaŵi.

Ihalö wanania ba muzizio ia föna-föna geu. Sangera-ngera ia. Izumaigö irongo li safatö ba so'ugu-ugu. Ifakhölö ia ba i'ila wofo sebua si ra'iö si hombo ba kabu, sano'agö eu tou. Ifana ia saradadu andrö, ba lö möi mate ia. Noa sa mesokho gafi kambölö wofo da'ö me göna khönia nonowana, irege atoto tölu rozi mbulunia. Ba ilau muhombo ba zaröu.

Igohi ia saradadu. Ba i'alio'ö wohombo fofo, numalö ia ba zisambua tögi, ba izumaigö ataya ia moroi ba hörö. Me lö fa'ata'unia, ba manaoka zaradadu mege no bakha ba dögi. Aekhu ia ba dögi sabakha sibai irege teköröbu ia ba lö i'ila zalua.

Me ibokai hörönia, ifazaŵa ia, ba i'ila wa so ia ba mbanua barö danö, si haga sihulö mbanua ba tete danö. "Te so ba da'a niha," fehedenia ba dödönia.

Itohugö wowaö-waö ba i'ila mbanua sebua sibai. No so fönania golu nizago darua niha. Ilau manofu, ba lö latema linia, lö göi liŵa-liŵara. Ibabaya danga zozago andrö ba irasoi no tobali kara.

Numalö ia bakha, ba i'ila niha sato, he sozizio ba sodadao no tobali kara fefu. Ba itöröi fefu lala si so bakha ba mbanua, ba lö isöndra zi fabö'ö. Lö hadöi samösa niha sauri.

Ofeta ia ba gödo sebua sibai, si no ehao ba sökhi. Möi ia bakha ba ifakhölö ia ba mbate-mbate'e si sökhi, heza no tohöna yaŵa gö awö nidanö si no murino ba tete meza. Ba hiza, lö nini-nini ba da'ö, hulö zi lö fa'auri. Ilau manga ba molombase ia.

Ba itahö tödönia me hulö so niha si lumalö mi yaŵa sanörö ora. Ihalö wanania ba ihatö'ö ia ba mbawandruhö.

Ba i'ila samösa nono'alawe si sökhi sibai awö ndra alawe sohalöŵö khönia si lumalö bakha. Ifaköu ia saradadu andrö, ba ilau muhede khönia ono'alawe.

"Ya'ahowu, saradadu," fehedenia. "Angi hadia zolohe ya'ugö ba da'a?"

Ifatunö fefu zalua khönia saradadu. "No labe'e khögu halöŵö ba wozago kabu ba gödo. No u'ila wofo sebua sangondrasi kabu, samakiko eu. Me ufana ia, no atoto tölu rozi mbulunia, ba ugohi ia ofeta ba da'a."

Imane khönia ono'alawe, "Fofo da'ö talifusögu alawe. No oya ifalua horö, i'elifi mbanuagu, ba ibali'ö kara fefu niha mbanuagu. Fondrondrongo! Ube'e khöu sambua mbuku. Osindro tanö andre ba baso ia i'otarai aekhu luo ofeta miwo zilatao sihulöwongi. Gofu hadia wamakao salua khöu, böi faduligö. Rorogö mbuku da'ö ena'ö lö larabu moroi ba dangamö. Na lö'ö ba si möi te'ala ndra'ugö. Na tola öbaloi ndrege tölu wongi, u'ondrasi ndra'ugö ba ubali'ö ndra'ugö fo'omogu."

"Fao dödögu," fanema zaradadu andrö.

Tohare mbongi. Ihalö mbuku mege no ba ibörögö ibaso. Izumaigö terongo li zanoko-noko awö li so'ugu-ugu, ba sangawawa zauri si lö i'ila samönui gödo. Fefu ndra kafalonia tohare fönania, lalele ia, ba la'andrö ena'ö lahuku mate ia. Lafazaŵa fefu wanara ba lafaudugö fönania. Ba lö ifaduligö ira saradadu andrö. Lö i'efasi mbuku moroi ba dangania, itohugö manö wombaso. Me miwo zilatao, ba ataya fefu ira.

Bongi ganete da'ö töragö ra'iö, ba ba mbongi si tölu zabölö-bölö. Tohare ndra sanguhuku, heza la'ohe garagazi, fato, ba si'öli. Edöna ira ba wamatö tölania, mamakao ya'ia, manunu ya'ia, afu tola la'okhögö mbuku si so ba dangania. Abua sibai wamakao nitörönia, ba arakhagö tebai mbotonia ba wanörö famakao andrö. Hiza'i me miwo manu silatao, ba ataya fefu zi ra'iö mege no.

Ba ginötö da'ö göi ba ifuli maliŵa fefu niha si no tobali kara. Fefu mbalö lala awö mbumbu nomo tobali rami me so li niha. Ba gödo, ba oroma nono'alawe, ndra kafalo zaradadu, awö zohalöwö fefu. La'andrö saohagölö khö zaradadu ba labali'ö ia razora.

Moluo mahemolu, ba ihalö nono'alawe da'ö tobali fo'omonia, ba mongambatö ira sifao fa'omasi awö fa'owua-wua dödö.

Ba hiza hikaya zaradadu andrö, ono niha sangahalö ba danö, si tobali Razo. Razo si sökhi tödö ia ba mbanuania ba sanolo sahakhö tödö ia ba zaradadu bö'ö.

Nifa'anö Tiru Zendratö. Tehalö nidunö-dunö andre moroi ba Rusia.

Nitöngöni

Omuso dödögu na öfazaewe nidunö-dunö andre ba media sosial ma Internet. Hiza i be'e fao gumbu heza tehalö ia. Be ba gahe zura: Moroi ba Wikibuku Nias. Nifa'anö ???. Aila ita ba niha na lö öbe'e gumbunia, me öhalö töiu zi tenga töiu.

Fabaliŵa lala

Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö