Wb/nia/Baeŵa Somömö Gana'a

From Wikimedia Incubator
< Wb‎ | niaWb > nia > Baeŵa Somömö Gana'a

Hiza me momolö mbombo Moro'ö,
Molö sebua so nönöi tanö,
Baso nösi nidanö sangahani,
Sogöi nösi mbombo sofanö,
Fefu nono matua ba Moro'ö,
Oi fahana oi fa'alai ndra'o,
So zanofu-nofu he'uwisa,
Oi manofu-nofu heza möido,
So nemali si lö mutötöna,
So mbaloho si lö murongo,
Balugu sindroi zalaŵa mbanua,
Balugu sindroi zalaŵa zato,
Samene-mene niha ba mbanua,
Sanguma-nguma'ö si sökhi ba ndraono,
Sangatulö niha na fasala,
Samaogö niha na no fasoso,
Iwa'ö ba nono matua sabölö töla,
Iwa'ö ba nono matua sebua boto,
Böi muröga-röga lö tandrösa,
Böi humufa ba zi lö boto,
Datalau mangenu ba zi bongi,
Talau manaro na no moluo,
Ena'ö fefu ita mofangöna,
Ena'ö fefu ita manoho,
Mi'oguna'ö remo-remo eu,
Fanuwu döla mbagi mbaloho,
Böi mifosirahagö ba wanuwu,
Böi mirugi mi'etu'ö noaso,
Misofu na khögu he'iwisa,
Me no ya'odo gubalo zato,
Mi ae miraya ba lulu nidanö,
Mi ele mi'uröi zinga mbombo,
Momöi ösa nono matua sabölö töla,
La'o'ö li wakhölö, sanuhe zato,
Mo möi ira datölu ba lulu nidanö,
La ohe mbaluse awö doho,
Lö aukhu nidanö ba mbowoa,
Lö irugi aboto afo,
Mo'ira-ira moroi raya,
Fayae gulö sosöfu sangahani,
Ha yae haria fondrege zesolo,
Lö mate ia naha ba niböbözi,
Lö akae'a ia sara toho,
Mibözi khöda garamba ba zaita,
Mibözi khöda garamba watao,
Ena'ö fefu mbanuada oi momöi,
Tebai mamunu na lö sanolo,
Me la'ila ulö sosöfu sangahani,
Me la'ila ulö sosöfu sesolo,
So zamugö ya'ia barö gambala,
So zamugö ya'ia barö dufo,
Fa datölu niha si möi mamaigi,
Fa darua tö zame'e fanolo,
Niha wö i oi zara mamini,
Me la'ila gulö sobiso sesolo,
Awena lanehegö sagabölö töla,
Awena lanehegö sagabölö boto,
Tenga ulö sosöfu sangahani,
Tenga haria fondrege zesolo,
No baeŵa somömö gana'a,
Baeŵa salösö-lösö boto,
Momöi baero ba naha mbini-mbini,
Fagohi ira la'ohe doho,
So zanendre ba gara sebua,
Oi so zi fabesu ta'io,
Me la'ila löfö lö mudöna-döna,
Me la'ila ö niha sato,
Omuso dödö lahegö-hegö,
Omuso dödö mu'ao-ao,
So zanaoka ba dalu mbanua,
So zamözi-mözi tatawo,
So zi tebura hörö ba wamaigi,
So ösa ira zanölö ilo,
Fahulö fefu ira ba wamunu,
Ena'ö ya'o ba mbalö zi föföna,
Ena'ö furigu niha sato,
Ya'o zatarö bawa mbalatu,
Ya'o zatarö ikhu doho,
Ena'ö tana khöra ba zi hoho,
Ena'ö khögu zohalu gi'o,
Da'ö mbaewa nidanö ba Moro'ö,
Izai bagi nohi usö wa'esolo,
Ulinia no'ozö-zönö,
Mowöi wanikha na mubinögö,
Meno maulu khönia wa'atabö
Böi mi'eŵa mbaeŵa ba giŵö-iŵö,
Öbalo-baloi wa'adölö,
Ö'eŵa dete gaheu ba wa'aösö,
Furi wa'akhri-khari dödö.




Sura Ni'amoni'ö: Mataio | Mareko | Luka | Yohane | Halöŵö Zinenge | Roma | Korindro I | Korindro II | Galatia | Nefeso | Filifi | Kolose | Tesalonika I | Tesalonika II | Timoteo I | Timoteo II | Tito | Filemo | Heberaio | Yakobo | Fetero I | Fetero II | Yohane I | Yohane II | Yohane III | Yuda | Fama'ele'ö

Fanolo wanura: Lala wanura | Fama'oli nösi | Ngawalö templat | Ngawalö kategori
Kategori: Amaedola | Budaya | Cerpen | Fangi'ila (Ilmu Pengetahuan) | Hendri-hendri | Hoho | Hikaya | Kamus Nias-Jerman | Kese-Kese | Lala wondrino (Resep) | Maena | Manö-manö | Manö-manö Nono Niha | Uso dödö (Entertainment) | Novela | Sejarah | Seni | Sinanö | Sinunö | Sura Ni'amoni'ö | Taromali Ero Migu | Turia Somuso Dödö

Fanolo wofanö: Olayama | Angombakhata | Bawagöli zato | Monganga afo | Nahia wamakori | Nga'örö spesial | Ngawalö wanolo | Sangai halöŵö | Safuria tebulö | Wikibuku | Wikikamus | Wikipedia | Wikiyunior