Wb/nia/Baeŵa Sifaero

Fabali nulura nidanö Noyo, nidanö Zusua yaŵa ba hili sotöi Lali Goholu. Me föna ba hili andrö yaŵa, so goholu sesolo solali. Niŵa'ö zangala-ngalahi, so mato sadumba tanömö dadaoma mbayania. Ta'ila tagölöigö tödöda wa'esolo goholu andre. Oholu andre, ba töi geu da'ö si fakhili ba döla zukhu. Sinanö so daha, sawe'e-we'e uli, tola mubali'ö baru me föna guli goholu, na no muhaogö ia.

Samuza ma'ökhö, barö lali goholu andre, tumbu nono mbaeŵa sifaero. Nofagölö-gölö wa'esolo, no baga-baga, a'usö la'a-la'a mae baeŵa ana'a. Me ise-ise na ira ba awai halöŵöra ha femörö-mörö manö. Na olofo ira ba ladou öra nono guro sahatö ba da'ö. Me no faoma egesolo ira, ba lalau fahuohuo khö nawöra darua ira.

Imane si sara, ”Na so manö ita ba da'a ba ambö nahada dögi andre. Tenga simanö datafawu'a ita. Tarongo-rongo so nidanö sebolo sibai sotöi asi.”

Imane si sara, "Lau! Hawa'ara mofanö ita ? Da ta'endrongagö wofanö. Lö na atö ata'u ita ba lala."

Imane si sara, "Hewisa na ba zidua wongi mofanö ita wanawa asi?”

Itema si sara imane, "Te ya'ia da'ö. Da ua tafa'anö ita, da tahalö khöda wa'abölö ba wofanö ba lala. Ba abölö sökhi na arakhagö moluo mofanö ita. Lö na'atö fakhamö aukhu khöda zino ba lala.

Irugi khöda mbongi sino la'osara'ö, irugi khöda mbongi si no lahonogöi. Maoso khöda zi sara, imane tödönia, "Da uhulö ia i wofanö. Alio na atö urugi moroi khönia. Da uröi ia furi. Akha erege dödönia wolohi ya'o." Andrö dania ha talu mbongi, ilau mofanö. No nasa mörö-mörö zi sara.

Me'arakhagö moluo tokea khöda zi sara. Ifaigi ifakhölö ia, muhede ia imane, "Heza so ndra'ugö le! Mofanö ita." Lö nini-nini. No sa mofanö ia. Hatö ondröniŵania ni’ilania. Mofönu sibai mbaeŵa niröi no mege.

Imane, "Ba me no ölimodo, ba me no ösawö zi no ta’osara’ö ba meno ösawö zi no tahonogöi, ba ya'ösöndra wa’afökhö ba lala. Ya'anau lala nitöröu, ya'ahiwö-hiwö lala nitöröu, ya'öfasui-sui gahe hili ba ya'ötörö lala arö danö. Ba me no ölimo ndra’o ba wa'atulö dödögu, ba ya'aoha khögu wanörö lala nitörögu, ya'aruru hili fönagu ba ya'adölö lala nitörögu.”

Mofanö mege mbaeŵa niröi no mege. Lö göi sa’ae igo’ö lala nitörö zi oföna no mege. Itörö lala bö’ö ba ifabali lalania. Hewisa mbaeŵa safuria mofanö no mege? Aoha sibai khönia wanörö lalania. Agaruru hili fönania, fataba manö lalania, ba adölö manö lalania. Adogo-dogo göi lala nitörönia. Lö ara, lö moluo sibai no irugi tou nasi. Töinia mbaeŵa sesolo sibai, tobali ungo nidanö gondröniŵania moroi furinia. Ondröniŵania si tobali ungo nidanö andrö dania, ya’ia siraya nidanö Zusua andrö.

Hewisa göi mege mbaeŵa si'oföna mofanö no mege? Erege dödönia wanörö lalania. Anau sibai lala nitörönia, irege itörö lala arö danö ua awena alua ia ba nasi. Hewisa göi gondröniŵaönia mbalazi wa’esolonia? Ondröniŵania tobali ungo nidanö, ya’ia sitou nidanö Noyo andrö si tehöngö teturia fa’ebua ba fa’enau ba Danö Niha.

Umbu

Baeŵa sifaero, blogspot.com, mufaigi me 13/10/2025.

Fabaliŵa lala

Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö