Wb/nia/Baŵa Toba
Meföna, ba danö Sumatera so samösa zohalöŵö ba danö sotöi Toba. Baero wohalöŵö ba danö asese göi möi ia fagai. Ero tanö'owi aefa mangawuli ia moroi ba nowi, möi ia fagai ba nidanö sahatö ba nomo khönia. Hiza samuza ma'ökhö lö ahulu-hulu ia. No ara ibaloi ba lö i'a sondra'u behu gainia.
Afatö sibai dödö Toba. Me edöna iböhöli fagai, i'anema'ö i'ila wa so zondröni gainia. Börö abölö-bölö wondröni, imane tödönia te i'a sesolo ia andrö. Ba sindruhu göi. Me idöni ba nöfi i'ila sageu gi'a sesolo. Ha wa omuso dödönia. I'aösö'ö wolohe ahuluania ba nomo.
Ba nomo, me edöna iföfölö gi'a andrö, muhede khönia gi'a da'ö, Böi föfölö ndra'o. Ösöndra howu-howu na ö'orifi ndra'o.
Ahöli-höli dödö Toba. Ba imane, Ba hewisa. Lö ndriwoma bongi.
Böi busi dödöu. Edöna ösöndra howu-howu na ö'efasi ndra'o, itema linia i'a andrö.
Alu dödö Toba ba möi ia i'efasi mangawuli gi'a andrö ba nidanö.
Tobali sibai dödönia me mangawuli ia ba nomo. No oi so gö yaŵa ba meza. Ba ba naha nawu so samösa nono alawe sondrino-ndrino.
Saohagölö me no öhakhösi tödö ndra'o, iŵaö khönia ira'alawe da'ö. Ya'o wö gi'a nira'umö andrö.
Ya'ia andrö no ono'alawe ni'elifi tobali i'a. Ba iada'a no aefa ia moroi ba wangelifi börö wa'ahakhö dödö Toba.
Lö ara aefa da'ö i'otura'ö nösi dödönia Toba khö galawe andrö. Omasi ia ihalö ia tobali ndrongania.
Tola, itema linia ira'alawe andrö, bahiza ha na öfabu'u khögu wa lö ö'ombakha'ö khö niha dania waö-waö heza moroi ndra'o. Na ösawö wawu'usali andre, ba edöna tohare wa'abu dödö sabölö-bölö.
Ba itema linia Toba wa ifabu'u khönia da'ö.
Lö ara aefa da'ö tumbu khöra nono, onomatua. Labe'e töinia Samosir. Owua-wua sibai dödöra.
Bahiza no ono ni'omasi'ö sibai Samosir, irege tobali ia iraono sareu. Töra moroi ba da'ö asilöyaŵa göi ia.
Samuza ma'ökhö i'andrö khö Samosir inania, ena'ö möi ia ba mbenua wamasao ö namania.
Bahiza ba dalu lala olofo ia. Itema ibokai löwö-löwö gö namania ba i'a ösa.
Ba no ibalo-baloi manö gönia Toba. Lö aetu ifakhölö ia ba wamaigi na tohare zolohe gönia ba mbalö lala. Wa omuso sibai dödönia me i'ila tohare Samosir.
Bahiza i'anema'ö aukhu dödönia me i'ila hatö ma'ifu zi toröi gönia, me no i'a ia ösa Samosir. Ono si lö nga'öla ndra'ugö. Ono sabila lala! Ö'a gö namau. Simanö sa me ono gi'a! Ba iböbözi Samosir.
Me irugi nomo i'ombakha'ö Samosir khö ninania wa no ibözi ia amania ba wa no ilele ia "ono gi'a".
Tokea sibai ninania.
I'anema'ö mu'ugu mbanua ba ilau gari mbanua sabölö-bölö. Ba tohare deu sabölö.
Oloi miyaŵa ba hili, iŵa'ö khö Samosir inania.
Ba ya'e wa'ebua molö ifönui fefu ndraso si so ya'ira.
Ba i'anema'ö tobali i'a mangawuli wo'omo Toba.
Me i'ila hadia zalua, itörö tödönia Toba wabu'usali khö wo'omonia. Ba abu sibai dödönia. Bahiza lö sa'ae tola ifangawuli furi zi no isawö.
Itugu ara itugu anönö fefu ndraso ba tobali sambua baŵa sebua. Da'ö mböröta wa so nidanö Toba samasui hulo Samosir irugi ma'ökhö.
Nitöngöni
[edit | edit source]Omuso dödögu na öfazaewe nidunö-dunö andre ba media sosial ma Internet. Hiza i be'e fao gumbu heza tehalö ia. Be ba gahe zura: Moroi ba Wikibuku Nias. Ni'ali Sirus Laia. Aila ita ba niha na lö öbe'e gumbunia, me öhalö töiu zi tenga töiu.
Fabaliŵa lala
[edit | edit source]Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö